Home / ਪੰਜਾਬ (page 5)

ਪੰਜਾਬ

ਪਾਦਰੀ ਦਾ ਕੈਸ਼: ਥਾਣੇਦਾਰਾਂ ਦੀ ਭਾਲ ਲਈ ਸਰਗਰਮੀ ਤੇਜ਼

ਚੰਡੀਗੜ੍ਹ-ਪੰਜਾਬ ਪੁਲੀਸ ਨੇ ਦੋ ਥਾਣੇਦਾਰਾਂ ਜੋਗਿੰਦਰ ਸਿੰਘ ਤੇ ਰਾਜਪ੍ਰੀਤ ਸਿੰਘ ਅਤੇ ਸੁਰਿੰਦਰ ਪਾਲ ਸਿੰਘ ਦੀ ਤਲਾਸ਼ ਲਈ ਸੂਬੇ ਦੀ ਪੁਲੀਸ ਨੂੰ ਮਦਦ ਲਈ ਲਿਖਿਆ ਹੈ। ਸੂਤਰਾਂ ਮੁਤਾਬਕ ਰਾਜ ਦੇ ਸਾਰੇ ਜ਼ਿਲ੍ਹਾ ਪੁਲੀਸ ਮੁਖੀਆਂ ਨੂੰ ਤਿੰਨਾਂ ਦੀਆਂ ਫੋਟੋਆਂ ਵੀ ਭੇਜੀਆਂ ਗਈਆਂ ਹਨ। ਪੁਲੀਸ ਵੱਲੋਂ ਗੁਆਂਢੀ ਸੂਬਿਆਂ ਦੀ ਪੁਲੀਸ ਨੂੰ ਵੀ ਪੱਤਰ ਲਿਖਿਆ ਗਿਆ ਹੈ। ਪੰਜਾਬ ਦੇ ਡੀਜੀਪੀ ਦਿਨਕਰ ਗੁਪਤਾ ਨੇ ਭਾਵੇਂ ਇਸ ਸਨਸਨੀਖ਼ੇਜ਼ ਮਾਮਲੇ ਦੀ ਜਾਂਚ ਲਈ ਵਿਸ਼ੇਸ਼ ਜਾਂਚ ਟੀਮ (ਸਿਟ) ਬਣਾ ਦਿੱਤੀ ਹੈ ਪਰ ਜਦੋਂ ਤਕ ਇਸ ਮਾਮਲੇ ਵਿੱਚ ਨਾਮਜ਼ਦ ਦੋਵੇਂ ਥਾਣੇਦਾਰਾਂ ਅਤੇ ਤੀਜੇ ਵਿਅਕਤੀ ਦੀ ਗ੍ਰਿਫ਼ਤਾਰੀ ਨਹੀਂ ਹੋ ਜਾਂਦੀ, ਉਦੋਂ ਤਕ ‘ਸਿਟ’ ਦੇ ਪੱਲੇ ਕੱਖ ਵੀ ਪੈਣ ਦੀ ਸੰਭਾਵਨਾ ਨਹੀਂ ਹੈ। ਪੁਲੀਸ ਦੇ ਕਰਾਈਮ ਪੁਲੀਸ ਥਾਣੇ ਨੇ ਜਲੰਧਰ ਦੇ ਪਾਦਰੀ ਦੇ ਪੈਸੇ ‘ਗਾਇਬ’ ਕਰਨ ਦੇ ਦੋਸ਼ਾਂ ਹੇਠ ਦੋ ਥਾਣੇਦਾਰਾਂ ਜੋਗਿੰਦਰ ਸਿੰਘ, ਰਾਜਪ੍ਰੀਤ ਸਿੰਘ ਅਤੇ ਸੁਰਿੰਦਰ ਪਾਲ ਸਿੰਘ ਨਾਮੀ ਵਿਅਕਤੀ ਵਿਰੁੱਧ ਪਰਚਾ ਦਰਜ ਕੀਤਾ ਸੀ। ਪਾਦਰੀ ਦੇ ਪੈਸੇ ਗਾਇਬ ਕਰਨ ਦੇ ਮਾਮਲੇ ਵਿੱਚ 10 ਅਫ਼ਸਰਾਂ ਤੇ ਆਮ ਬੰਦਿਆਂ ਦੀ ਸ਼ਮੂਲੀਅਤ ਮੰਨੀ ਜਾ ਰਹੀ ਹੈ। ਥਾਣੇਦਾਰਾਂ ਦੀ ਗ੍ਰਿਫ਼ਤਾਰੀ ਨਾਲ ਹੀ ਹੋਰਨਾਂ ਚਿਹਰਿਆਂ ਨੇ ਬੇਨਕਾਬ ਹੋਣਾ ਹੈ। ਸੂਤਰਾਂ ਮੁਤਾਬਕ ਇਸ ਮਾਮਲੇ ਨੂੰ ਲੈ ਕੇ ਕਈ ਸ਼ਰੀਫ ਤੇ ਇਮਾਨਦਾਰ ਸਮਝੇ ਜਾਂਦੇ ਪੁਲੀਸ ਅਫ਼ਸਰਾਂ ਨੂੰ ਵੀ ਤਰੇਲੀਆਂ ਆ ਰਹੀਆਂ ਹਨ।
ਚੋਣ ਕਮਿਸ਼ਨ ਵੀ ਹਰਕਤ ਵਿੱਚ ਆਇਆ
ਪਾਦਰੀ ਐਂਥਨੀ ਮੈਡਾਸਰੀ ਦੇ 6.66 ਕਰੋੜ ਰੁਪਏ ਗੁੰਮ ਹੋਣ ਦੇ ਮਾਮਲੇ ’ਚ ਚੋਣ ਕਮਿਸ਼ਨ ਆਖਰਕਾਰ ਹਰਕਤ ’ਚ ਆ ਗਿਆ ਹੈ। ਉਸ ਨੇ ਸੂਬਾ ਪੁਲੀਸ ਤੋਂ ਵਿਆਪਕ ਰਿਪੋਰਟ ਮੰਗਣ ਦਾ ਫ਼ੈਸਲਾ ਲਿਆ ਹੈ ਅਤੇ ਇਹ ਅੱਗੇ ਦਿੱਲੀ ਭੇਜੀ ਜਾਵੇਗੀ। ਸੂਤਰਾਂ ਨੇ ਕਿਹਾ ਕਿ ਖੰਨਾ ਪੁਲੀਸ ਨੇ ਚੋਣ ਕਮਿਸ਼ਨ ਦੇ ਦਿਸ਼ਾ ਨਿਰਦੇਸ਼ਾਂ ਬਹਾਨੇ ਸਥਾਨਕ ਪੁਲੀਸ ਨੂੰ ਦੱਸੇ ਬਿਨਾਂ ਜਲੰਧਰ ’ਚ ਗ਼ੈਰਕਾਨੂੰਨੀ ਢੰਗ ਨਾਲ ਛਾਪਾ ਮਾਰਿਆ ਅਤੇ ਬਾਅਦ ’ਚ ਨਾਕੇ ਤੋਂ ਅਣਐਲਾਨੀ ਨਗਦੀ ਫੜਨ ਦਾ ਦਾਅਵਾ ਕੀਤਾ। ਪੰਜਾਬ ਦੇ ਮੁੱਖ ਚੋਣ ਅਧਿਕਾਰੀ ਐਸ ਕਰੁਣਾ ਰਾਜੂ ਨੇ ਕਿਹਾ,‘‘ਅਸੀਂ ਵਧੀਕ ਡੀਜੀਪੀ (ਚੋਣ ਸੈੱਲ) ਤੋਂ ਵਿਆਪਕ ਰਿਪੋਰਟ ਲੈਣ ਦਾ ਫ਼ੈਸਲਾ ਲਿਆ ਹੈ ਅਤੇ ਲੋੜੀਂਦੇ ਨਿਰਦੇਸ਼ਾਂ ਲਈ ਇਸ ਨੂੰ ਦਿੱਲੀ ਭੇਜਿਆ ਜਾਵੇਗਾ।’’ ਉਨ੍ਹਾਂ ਕਿਹਾ ਕਿ ਉਹ ਪਹਿਲਾਂ ਵਿਸ਼ੇਸ਼ ਜਾਂਚ ਟੀਮ (ਸਿਟ) ਦੀ ਰਿਪੋਰਟ ਦਾ ਇੰਤਜ਼ਾਰ ਕਰ ਰਹੇ ਸਨ ਪਰ ਇਸ ਦੇ ਮੁਕੰਮਲ ਹੋਣ ’ਚ ਅਜੇ ਸਮਾਂ ਲਗਣਾ ਹੈ ਜਿਸ ਕਰਕੇ ਪੂਰੇ ਮਾਮਲੇ ’ਤੇ ਚੋਣ ਕਮਿਸ਼ਨ ਨੇ ਕਾਰਵਾਈ ਕਰਨ ਦਾ ਫ਼ੈਸਲਾ ਲਿਆ ਹੈ। ਉਨ੍ਹਾਂ ਕਿਹਾ ਕਿ ਜ਼ਰੂਰ ਕੁਝ ਕੋਤਾਹੀਆਂ ਹੋਈਆਂ ਹਨ ਕਿਉਂਕਿ ਮੋਟੀ ਰਕਮ ਗੁੰਮ ਹੈ। ਪੁਲੀਸ ਵਿਭਾਗ ਦੇ ਸੂਤਰਾਂ ਮੁਤਾਬਕ ਖੰਨਾ ਪੁਲੀਸ ਦੀ ਕਾਰਵਾਈ ਪੁਲੀਸ ਨੇਮਾਂ ਅਤੇ ਚੋਣ ਜ਼ਾਬਤੇ ਦੀ ਉਲੰਘਣਾ ਹੈ ਅਤੇ ਦੋਸ਼ੀਆਂ ਨੂੰ ਮਿਸਾਲੀ ਸਜ਼ਾਵਾਂ ਮਿਲਣੀਆਂ ਚਾਹੀਦੀਆਂ ਹਨ। ਉਧਰ ਸੀਨੀਅਰ ਵਕੀਲ ਬਰਜਿੰਦਰ ਸਿੰਘ ਸੋਢੀ ਨੇ ਇਸ ਕੇਸ ਨੂੰ ‘ਹਥਿਆਰਬੰਦ ਡਕੈਤੀ’ ਕਰਾਰ ਦਿੱਤਾ ਹੈ। ਉਨ੍ਹਾਂ ਕਿਹਾ ਕਿ ਪੂਰੀ ਖੰਨਾ ਪੁਲੀਸ ਟੀਮ ਖ਼ਿਲਾਫ਼ ਧਾਰਾ 392 ਅਤੇ 120-ਬੀ ਤਹਿਤ ਐਫਆਈਆਰ ਦਰਜ ਹੋਣੀ ਚਾਹੀਦੀ ਹੈ।

ਪ੍ਰੇਮੀ ਦੀ ਪੈਨਸ਼ਨ ਪਾਉਣ ਲਈ ਵਿਧਵਾ ਬਣ ਗਈ ਔਰਤ

ਲੁਧਿਆਣਾ-ਲਿਵ ਇਨ ਰਿਲੇਸ਼ਨਸ਼ਿਪ ਵਿਚ ਰਹਿ ਰਹੀ ਔਰਤ ਨੇ ਰੋਡਵੇਜ਼ ਮੁਲਾਜ਼ਮ ਦੀ ਮੌਤ ਤੋਂ ਬਾਅਦ ਫਰਜ਼ੀ ਵਾਰਸ ਨਾਮਾ ਤਿਆਰ ਕਰਵਾ ਲਿਆ। ਉਸ ਦੇ ਆਧਾਰ ‘ਤੇ ਉਸ ਨੇ ਨਾ ਸਿਰਫ ਉਸ ਦੇ ਸਾਰੇ ਸਰਕਾਰੀ ਫੰਡ ਹਥਿਆ ਲਏ, ਬਲਕਿ ਉਸ ਦੀ ਪੈਨਸ਼ਨ ਤੱਕ ਲੈਂਦੀ ਰਹੀ। ਮਾਮਲੇ ‘ਤੇ ਇੰਜ ਹੀ ਪਰਦਾ ਪਿਆ ਰਹਿੰਦਾ ਜੇਕਰ ਮ੍ਰਿਤਕ ਦਾ ਬੇਟਾ ਕਾਨੂੰਨ ਦਾ ਸਹਾਰਾ ਨਾ ਲੈਂਦਾ। ਪੁਲਿਸ ਨੇ ਉਸ ਦੇ ਖ਼ਿਲਾਫ਼ ਕੇਸ ਦਰਜ ਕਰਕੇ ਭਾਲ ਸ਼ੁਰੂ ਕਰ ਦਿੱਤੀ ਹੈ। ਏਐਸਆਈ ਚਾਂਦ ਅਹੀਰ ਨੇ ਦੱਸਿਆ ਕਿ ਮੁਲਜ਼ਮ ਮਹਿਲਾ ਦੀ ਪਛਾਣ ਅਮਨ ਨਗਰ ਨਿਵਾਸੀ ਸਤਿਆ ਦੇਵੀ ਦੇ ਰੂਪ ਵਿਚ ਹੋਈ। ਪੁਲਿਸ ਨੇ ਜਲੰਧਰ ਦੇ ਅਲੀ ਮੁਹੱਲਾ Îਨਿਵਾਸੀ ਜਗਦੇਵ ਸਿੰਘ ਦੀ ਸ਼ਿਕਾਇਤ ‘ਤੇ ਉਸ ਦੇ ਖ਼ਿਲਾਫ਼ ਕੇਸ ਦਰਜ ਕੀਤਾ।
ਪੁਲਿਸ ਕਮਿਸ਼ਨਰ ਨੂੰ ਦਿੱਤੀ ਸ਼ਿਕਾਇਤ ਵਿਚ ਉਸ ਨੇ ਦੱਸਿਆ ਕਿ ਉਸ ਦੇ ਪਿਤਾ ਬਨਾਰਸੀ ਦਾਸ ਰੋਡਵੇਜ਼ ਦੇ ਲੁਧਿਆਣਾ ਡਿੱਪੂ ਵਿਚ ਮਕੈਨਿਕ ਦੀ ਨੌਕਰੀ ਕਰਦੇ ਸੀ। ਉਹ ਲੁਧਿਆਣਾ ਵਿਚ ਹੀ ਰਹਿੰਦੇ ਸਨ। 1996 ਵਿਚ ਉਸ ਦੇ ਪਿਤਾ ਦੇ ਅਮਨ ਨਗਰ ਨਿਵਾਸੀ ਸਤਿਆ ਪਤਨੀ ਹਰਮੇਸ਼ ਲਾਲ ਦੇ ਨਾਲ ਪ੍ਰੇਮ ਸਬੰਧ ਬਣ ਗਏ। ਇਸ ਤੋਂ ਬਾਅਦ ਦੋਵੇਂ ਲਿਵ ਇਨ ਰਿਨੇਸ਼ਨਸ਼ਿਪ ਵਿਚ ਰਹਿਣ ਲੱਗੇ। 2001 ਵਿਚ ਉਸ ਦੇ ਪਿਤਾ ਦੀ ਮੌਤ ਹੋ ਗਈ। ਇਸ ਤੋਂ ਬਾਅਦ 2004 ਵਿਚ ਸੱਤਿਆ ਨੇ ਫਰਜ਼ੀ ਵਾਰਸ ਨਾਮਾ ਤਿਆਰ ਕੀਤਾ।
ਇਸ ਵਿਚ ਉਸ ਨੇ ਖੁਦ ਨੂੰ ਹਰਮੇਸ਼ ਲਾਲ ਦੀ ਵਿਧਵਾ ਦੱਸਿਆ। ਉਸ ਦੇ ਆਧਾਰ ‘ਤੇ ਮਹਿਲਾ ਨੇ ਰੋਡਵੇਜ਼ ਵਿਚ ਬਕਾਇਆ ਨਿਕਲ ਰਹੇ ਸਾਰੇ ਵਿੱਤੀ ਲਾਭ ਹਾਸਲ ਕੀਤੇ। ਮੁਲਜ਼ਮ ਮਹਿਲਾ ਅੱਜ ਤੱਕ ਬਨਾਰਸੀ ਦਾਸ ਦੀ ਵਿਧਵਾ ਬਣ ਕੇ ਉਸ ਦੀ ਪੈਨਸ਼ਨ ਲੈਂਦੀ ਰਹੀ, ਜਦ ਕਿ ਉਸ ਦਾ ਅਸਲੀ ਪਤੀ ਹਰਮੇਸ਼ ਲਾਲ ਅਜੇ ਜ਼ਿੰਦਾ ਹੈ। ਏਐਸਆਈ ਚਾਂਦ ਅਹੀਰ ਨੇ ਦੱਸਿਆ ਕਿ ਮਹਿਲਾ ਵਲੋਂ ਦਿੱਤੇ ਵਾਰਸਨਾਮੇ ਦੀ ਜਾਂਚ ਤੋਂ ਬਾਅਦ ਉਪ ਮੰਡਲ ਮੈਜਿਸਟ੍ਰੇਟ ਨੇ ਉਸ ਨੂੰ ਫਰਜ਼ੀ ਫਰਾਰ ਦਿੱਤਾ ਅਤੇ ਮਹਿਲਾ ਦੇ ਖ਼ਿਲਾਫ਼ ਕੇਸ ਦਰਜ ਕਰਨ ਦੀ ਸਿਫਾਰਸ਼ ਕਰ ਦਿੰਤੀ।

ਸਿੱਖ ਜਥੇ ਨਾਲ ਵਿਸਾਖੀ ਦਾ ਤਿਉਹਾਰ ਮਨਾਉਣ ਪਾਕਿਸਤਾਨ ਗਏ ਸ਼ਰਧਾਲੂ ਦੀ ਮੌਤ

ਅੰਮ੍ਰਿਤਸਰ- ਖ਼ਾਲਸੇ ਦਾ ਸਾਜਨਾ ਦਿਵਸ ਵਿਸਾਖੀ ਦਾ ਤਿਉਹਾਰ ਮਨਾਉਣ ਲਈ ਭਾਰਤ ਤੋਂ ਸਿੱਖ ਜਥੇ ਨਾਲ ਪਾਕਿਸਤਾਨ ਗਏ ਇੱਕ ਸ਼ਰਧਾਲੂ ਦੀ ਮੌਤ ਦੀ ਖ਼ਬਰ ਪ੍ਰਾਪਤ ਹੋਈ ਹੈ। ਮ੍ਰਿਤਕ ਸ਼ਰਧਾਲੂ ਹੁਸ਼ਿਆਰ ਸਿੰਘ (71) ਵਾਸੀ ਪਿੰਡ ਹਥਣ ਨਜ਼ਦੀਕ ਮਲੇਰਕੋਟਲਾ ਜ਼ਿਲ੍ਹਾ ਸੰਗਰੂਰ ਦਾ ਰਹਿਣ ਵਾਲਾ ਸੀ। ਜਾਣਕਾਰੀ ਮੁਤਾਬਕ ਗੁਰਦੁਆਰਾ ਪੰਜਾ ਸਾਹਿਬ ਹਸਨ ਅਬਦਾਲ ਵਿਖੇ 13 ਅਪ੍ਰੈਲ ਨੂੰ ਹੁਸ਼ਿਆਰ ਸਿੰਘ ਨੂੰ ਦਿਲ ਦਾ ਦੌਰਾ ਪਿਆ। ਇਸ ਮਗਰੋਂ ਉਸ ਨੂੰ ਆਰ. ਆਈ. ਸੀ. ਹਸਪਤਾਲ ਰਾਵਲਪਿੰਡੀ ਵਿਖੇ ਦਾਖ਼ਲ ਕਰਾਇਆ ਗਿਆ, ਜਿੱਥੇ 14 ਅਪ੍ਰੈਲ ਦੁਪਹਿਰ 3 ਵਜੇ ਉਸ ਦੀ ਮੌਤ ਹੋ ਗਈ।

ਨਹਿਰ ਵਿਚ ਡਿੱਗੀ ਕਾਰ, 4 ਨੌਜਵਾਨਾਂ ਦੀ ਮੌਤ

ਫਾਜ਼ਿਲਕਾ-ਪਿੰਡ ਇਸਲਾਮਵਾਲਾ ਦੇ ਬਸ ਅੱਡੇ ‘ਤੇ 12 ਅਪ੍ਰੈਲ ਰਾਤ Îਇੱਕ ਏਸੈਂਟ ਕਾਰ ਬੇਕਾਬੂ ਹੋ ਕੇ ਨਹਿਰ ਵਿਚ ਡਿੱਗ ਗਈ। ਹਾਦਸੇ ਦੌਰਾਨ ਕਾਰ ਵਿਚ ਸਵਾਰ ਚਾਰਾਂ ਨੌਜਵਾਨਾਂ ਦੀ ਮੌਤ ਹੋ ਗਈ। ਕਾਰ ਵਿਚ ਸਵਾਰ ਨੌਜਵਾਨ ਮੱਧ ਪ੍ਰਦੇਸ਼ ਵਿਚ ਕਣਕ ਦੀ ਕਟਾਈ ਕਰਕੇ ਵਾਪਸ ਫਾਜ਼ਿਲਕਾ ਪਰਤੇ ਸਨ। Îਇੱਥੋਂ ਉਹ ਕਾਰ ਰਾਹੀਂ ਅਪਣੇ ਪਿੰਡ ਮਿੱਡਾ ਲਈ ਰਵਾਨਾ ਹੋਏ ਪਰ ਜਦੋਂ ਇਹ ਨੌਜਵਾਨ ਘਰ ਨਹੀਂ ਪੁੱਜੇ ਤਾਂ ਪੜਤਾਲ ਕਰਨ ਅਤੇ ਘੰਟਿਆਂ ਦੀ ਭਾਲ ਪਿੱਛੋਂ ਪਤਾ ਲੱਗਾ ਕਿ ਉਨ੍ਹਾਂ ਦੀ ਕਾਰ ਗੰਗ ਕੈਨਾਲ ਵਿਚ ਡਿੱਗ ਗਈ ਹੈ।
13 ਅਪ੍ਰੈਲ ਦੀ ਬੀਤੀ ਰਾਤ ਤੋਂ ਅਗਲੇ ਦਿਨ ਦੁਪਹਿਰ ਇੱਕ ਵਜੇ ਤੱਕ ਗੰਗ ਕੈਨਾਲ ਵਿਚ ਗੋਤਾਖੋਰਾਂ ਦੀ ਟੀਮ ਵਲੋਂ ਚਲਾਈ ਗਈ ਮੁਹਿੰਮ ਦੌਰਾਨ ਕਾਰ ਘਟਨਾ ਸਥਾਨ ਤੋਂ 50 ਮੀਟਰ ਦੂਰੀ ‘ਤੇ ਮਿਲ ਗਈ। ਕਰੇਨ ਦੀ ਮਦਦ ਨਾਲ ਕਾਰ ਨੂੰ ਬਾਹਰ ਕੱਢਿਆ ਗਿਆ ਤਾਂ ਉਸ ਵਿਚ ਸਵਾਰ ਚਾਰ ਨੌਜਵਾਨਾਂ ਦੀਆਂ ਦੇਹਾਂ ਵੀ ਮਿਲ ਗਈਆਂ। ਹਾਦਸੇ ਦੇ ਮ੍ਰਿਤਕਾਂ ਦੀ ਪਛਾਣ ਗੁਰਪ੍ਰੀਤ ਸਿੰਘ 21, ਗੁਰਲਾਲ ਸਿੰਘ 19, ਜੱਸਾ ਸਿੰਘ 20, ਪ੍ਰਤਾਪ ਸਿੰਘ 20 ਵਜੋਂ ਹੋਈ। ਇਨ੍ਹਾਂ ਵਿਚੋਂ ਗੁਰਪ੍ਰੀਤ ਸਿੰਘ ਨੂੰ 14 ਅਪ੍ਰੈਲ ਲੂੰ ਸ਼ਗਨ ਪੈਣਾ ਸੀ ਅਤੇ 19 ਅਪ੍ਰੈਲ ਲੂੰ ਉਸ ਦਾ ਵਿਆਹ ਸੀ। ਉਹ ਮੱਧ ਪ੍ਰਦੇਸ਼ ਤੋਂ ਫਾਜ਼ਿਲਕਾ ਦੇ ਪਿੰਡ ਓਡੀਆਂ ਵਿਚ ਅਪਣੇ ਕੰਬਾਈਨ ਮਾਲਕ ਦੇ ਘਰ ਕਣਕ ਦੀ ਫਸਲ ਕੱਟਣ ਪਿੱਛੋਂ ਕੰਬਾਈਨ ਲੈ ਕੇ 12 ਅਪ੍ਰੈਲ ਨੂੰ ਵਾਪਸ ਆਇਆ ਸੀ। ਪਿੰਡ ਓਡੀਆਂ ਤੋਂ ਹੀ ਉਹ ਅਪਣੇ ਸਾਥੀਆਂ ਨਾਲ ਵਾਪਸ ਘਰ ਲਈ ਚੱਲੇ ਸਨ ਤਾਂ ਹਾਦਸਾ ਵਾਪਰ ਗਿਆ। 13 ਅਪ੍ਰੈਲ ਨੂੰ ਕੰਬਾਈਨ ਮਾਲਕ ਨੇ ਫੋਨ ‘ਤੇ ਘਰ ਵਾਲਿਆਂ ਨੂੰ ਦੱਸਿਆ ਸੀ ਕਿ ਚਾਰੇ ਲੜਕੇ ਪਿੰਡ ਲਈ ਚਲ ਪਏ ਹਨ ਪਰ ਪਿੰਡ ਨਾ ਪੁੱਜਣ ‘ਤੇ ਇਸ ਦੀ ਸੂਚਨਾ ਪੁਲਿਸ ਨੂੰ ਦਿੱਤੀ ਗਈ। ਭਾਲ ਕਰਨ ਤੋਂ ਬਾਅਦ ਪੁਲਿਸ ਨੇ 14 ਅਪ੍ਰੈਲ ਨੂੰ ਕਾਰ ਨੂੰ ਨਹਿਰ ਤੋਂ ਬਾਹਰ ਕੱਢਿਆ। ਚਾਰਾਂ ਨੌਜਵਾਨਾ ਦੀਆਂ ਲਾਸ਼ਾਂ ਕਾਰ ਦੀ ਪਿਛਲੀ ਸੀਟ ‘ਤੇ ਪਈਆਂ ਸਨ।

ਬੀ. ਐੱਸ. ਐੱਫ. ਨੇ ਕਰੋੜਾਂ ਰੁਪਏ ਦੀ ਹੈਰੋਇਨ ਸਣੇ ਤਸਕਰ ਕੀਤਾ ਕਾਬੂ

ਫ਼ਿਰੋਜ਼ਪੁਰ- ਭਾਰਤ-ਪਾਕਿ ਕੌਮਾਂਤਰੀ ਸਰਹੱਦ ‘ਤੇ ਤਾਇਨਾਤ 29 ਬਟਾਲੀਅਨ ਬੀ. ਐੱਸ. ਐੱਫ. ਨੇ ਮਮਦੋਟ ਸੈਕਟਰ ‘ਚ ਪੈਂਦੀ ਚੌਕੀ ਲੱਖਾ ਸਿੰਘ ਵਾਲਾ ਨੇੜਿਓਂ ਇੱਕ ਨਸ਼ਾ ਤਸਕਰ ਨੂੰ ਕਾਬੂ ਕੀਤਾ ਹੈ। ਉਸ ਕੋਲੋਂ ਦੋ ਪੈਕਟ ਹੈਰੋਇਨ ਬਰਾਮਦ ਹੋਈ ਹੈ, ਜਿਸ ਦਾ ਕੁੱਲ ਵਜ਼ਨ 1 ਕਿਲੋ, 690 ਗ੍ਰਾਮ ਦੱਸਿਆ ਜਾ ਰਿਹਾ ਹੈ। ਫੜੇ ਗਏ ਮੁਲਜ਼ਮ ਦੀ ਪਛਾਣ ਕਸ਼ਮੀਰ ਸਿੰਘ ਪੁੱਤਰ ਠਾਕੁਰ ਸਿੰਘ ਵਾਸੀ ਬਾਰੇ ਕੇ ਵਜੋਂ ਹੋਈ ਹੈ, ਜਿਹੜਾ ਕਿ ਪਾਕਿਸਤਾਨੋਂ ਆਈ ਹੈਰੋਇਨ ਦੀ ਖੇਪ ਲੈ ਕੇ ਆਇਆ ਸੀ।

ਅੰਮ੍ਰਿਤਸਰ ‘ਚ ਗੁਰਬਾਣੀ ਪੋਥੀਆਂ ਦੀ ਬੇਅਦਬੀ

ਅੰਮ੍ਰਿਤਸਰ -ਅੰਮ੍ਰਿਤਸਰ ਦੇ ਗੁਰੂ ਨਾਨਕਪੁਰਾ ਇਲਾਕੇ ਵਿਚ ਗੁਰਬਾਣੀ ਪੋਥੀਆਂ ਨੂੰ ਅੱਗ ਲਾ ਕੇ ਬੇਅਦਬੀ ਕਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਮੌਕੇ ‘ਤੇ ਪੁੱਜੀ ਸਿੱਖ ਜਥੇਬੰਦੀ ਦੇ ਆਗੂਆਂ ਨੇ ਕਿਹਾ ਕਿ ਗੁਰਬਾਣੀ ਪੋਥੀਆਂ ਨੂੰ ਅੱਗ ਲੱਗਣ ਸਮੇਂ 7 ਸਾਲ ਦਾ ਇਕ ਬੱਚਾ ਨੇੜੇ ਖੜ•ਾ ਸੀ। ਉਧਰ ਪੁਲਿਸ ਅਧਿਕਾਰੀਆਂ ਨੇ ਮੌਕੇ ‘ਤੇ ਪਹੁੰਚ ਜਾਂਚ ਸ਼ੁਰੂ ਕਰ ਦਿਤੀ।

ਸਿੱਧੂ ਨੇ ਸਾਂਭੀ ਔਜਲਾ ਦੀ ਚੋਣ ਕਮਾਨ

ਅੰਮ੍ਰਿਤਸਰ -ਲੋਕ ਸਭਾ ਹਲਕਾ ਅੰਮ੍ਰਿਤਸਰ ਤੋਂ ਕਾਂਗਰਸ ਦੀ ਟਿਕਟ ‘ਤੇ ਦੂਜੀ ਵਾਰ ਚੋਣ ਮੈਦਾਨ ਵਿਚ ਉਤਰੇ ਗੁਰਜੀਤ ਸਿੰਘ ਔਜਲਾ ਦੀ ਹਮਾਇਤ ਵਿਚ ਕੈਬਨਿਟ ਮੰਤਰੀ ਨਵਜੋਤ ਸਿੰਘ ਸਿੱਧੂ ਦੀ ਪਤਨੀ ਤੇ ਸਾਬਕਾ ਸੰਸਦੀ ਸਕੱਤਰ ਨਵਜੋਤ ਕੌਰ ਸਿੱਧੂ ਨੇ ਚੋਣ ਪ੍ਰਚਾਰ ਦੀ ਕਮਾਨ ਸੰਭਾਲਦਿਆਂ ਹਲਕੇ ਨਾਲ ਸਬੰਧਤ ਕੌਂਸਲਰ, ਪੰਚ-ਸਰਪੰਚ ਅਤੇ ਸੀਨੀਅਰ ਕਾਂਗਰਸੀ ਆਗੂਆਂ ਨਾਲ ਚੋਣ ਮੀਟਿੰਗ ਕੀਤੀ।
ਮੀਟਿੰਗ ਨੂੰ ਸੰਬੋਧਨ ਕਰਦਿਆਂ ਸਿੱਧੂ ਨੇ ਸੰਵਿਧਾਨਿਕ ਸੰਸਥਾਵਾਂ ਦਾ ਘਾਣ ਕਰਨ, ਦੇਸ਼ ਦੀ ਕੱਖੋਂ ਹੌਲੀ ਹੋਈ ਆਰਥਕ ਵਿਵਸਥਾ, ਦੇਸ਼ ਦੀਆਂ ਫ਼ੌਜਾਂ ਦੇ ਨਾਮ ‘ਤੇ ਕੀਤੀ ਜਾ ਰਹੀ ਘਟੀਆ ਸਿਆਸਤ, ਘੱਟ ਗਿਣਤੀ ਸੰਸਥਾਵਾਂ ਅਤੇ ਘੱਟ ਗਿਣਤੀ ਲੋਕਾਂ ‘ਤੇ ਹੋਏ ਹਮਲਿਆਂ ਅਤੇ ਦੇਸ਼ ਵਾਸੀਆਂ ਨਾਲ ਝੂਠੇ ਵਾਅਦੇ ਕਰ ਕੇ ਮੁੱਕਰ ਜਾਣ ਵਾਲੀ ਜੁਮਲੇਬਾਜ਼ ਮੋਦੀ ਸਰਕਾਰ ਦੇ ਰਾਜਕਾਲ ਨੂੰ ਗੁੰਡਾਰਾਜ ਐਲਾਨਦਿਆਂ ਔਜਲਾ ਨੂੰ ਵੱਡੀ ਲੀਡ ਨਾਲ ਜਿਤਾਉਣ ਦੀ ਅਪੀਲ ਕੀਤੀ। ਸਿੱਧੂ ਨੇ ਕਾਂਗਰਸੀ ਵਰਕਰਾਂ ਨੂੰ ਸੰਬੋਧਨ ਕਰਦਿਆਂ ਕਿਹਾ ਕਿ ਕਾਂਗਰਸੀ ਸਰਕਾਰ ਦੇ ਕੰਮ ਬੋਲਦੇ ਹਨ ਜਦਕਿ ਪਿਛਲੇ ਸਮੇਂ ਵਿਚ ਸੂਬੇ ਦੀ ਸੱੱਤਾ ‘ਤੇ ਕਾਬਜ਼ ਰਹੇ ਇਕ ਪਰਵਾਰ ਵਲੋਂ ਪੰਜਾਬੀਆਂ ਨੂੰ ਕੱਖੋਂ ਹੌਲੇ ਕਰ ਕੇ ਸੂਬਾ ਵਾਸੀਆਂ ਨਾਲ ਧੋਖਾ ਕੀਤਾ ਗਿਆ ਸੀ।
ਸਿੱਧੂ ਨੇ ਪ੍ਰਧਾਨ ਮੰਤਰੀ ਮੋਦੀ ‘ਤੇ ਸਿਆਸੀ ਵਾਰ ਕਰਦਿਆਂ ਕਿਹਾ ਕਿ ਉਨ੍ਹਾਂ ਦੀਆਂ ਵਿਦੇਸ਼ ਫੇਰੀਆਂ ਸਬੰਧੀ ਲਗਦਾ ਹੈ ਕਿ ਮੋਦੀ ਦੇਸ਼ ਵਾਸੀਆਂ ਦੀਆਂ ਸਮੱਸਿਆਵਾਂ ਦੇ ਹੱਲ ਲਈ ਪ੍ਰਧਾਨ ਮੰਤਰੀ ਨਹੀਂ ਬਣੇ ਸਗੋਂ ਵਿਸ਼ਵ ਸੈਰ ਲਈ ਪ੍ਰਧਾਨ ਮੰਤਰੀ ਬਣਾਏ ਗਏ ਸਨ। ਗੁਰਜੀਤ ਸਿੰਘ ਔਜਲਾ ਨੇ ਕਿਹਾ ਕਿ ਨਵਜੋਤ ਕੌਰ ਸਿੱਧੂ ਦੀ ਅਗਵਾਈ ਹੇਠ ਉਨ੍ਹਾਂ ਦੇ ਹੱਕ ਵਿਚ ਅੰਮ੍ਰਿਤਸਰ ਪੂਰਬੀ ਹਲਕੇ ਦੇ ਡਟਣ ਵਾਲੇ ਕਾਂਗਰਸੀ ਵਰਕਰਾਂ ਦਾ ਉਹ ਧਨਵਾਦ ਕਰਦੇ ਹਨ।
ਔਜਲਾ ਨੇ ਕਿਹਾ ਕਿ ਉਹ ਗੁਰੂਆਂ, ਪੀਰਾਂ, ਦੇਵੀ ਦੇਵਤਿਆਂ ਤੇ ਸੰਤਾਂ ਮਹਾਂਪੁਰਖਾਂ ਦੀ ਚਰਨ ਛੋਹ ਧਰਤੀ ਅੰਮ੍ਰਿਤਸਰ ਦੀ ਸੇਵਾ ਲਈ ਹਮੇਸ਼ਾ ਹਾਜ਼ਰ ਰਹਿਣਗੇ ਤੇ ਅੰਮ੍ਰਿਤਸਰ ਨੂੰ ਵਿਕਾਸ ਪੱਖੋਂ ਵਿਸ਼ਵ ਦੇ ਚੋਣਵੇਂ ਸ਼ਹਿਰਾਂ ਵਿਚ ਸ਼ੁਮਾਰ ਕਰਾਉਣ ਲਈ ਯਤਨਸ਼ੀਲ ਰਹਿਣਗੇ। ਇਸ ਮੌਕੇ ਜੁਗਲ ਕਿਸ਼ੋਰ ਸ਼ਰਮਾ, ਜ਼ਿਲ੍ਹਾ ਕਾਂਗਰਸ ਕਮੇਟੀ ਅੰਮ੍ਰਿਤਸਰ ਸ਼ਹਿਰੀ ਸਮੇਤ ਹਲਕੇ ਨਾਲ ਸਬੰਧਤ ਕਾਂਗਰਸੀ ਕੌਂਸਲਰ, ਪੰਚ-ਸਰਪੰਚ ਤੇ ਸੀਨੀਅਰ ਕਾਂਗਰਸੀ ਆਗੂ ਹਾਜ਼ਰ ਸਨ।

ਸਾਬਕਾ ਵਿਧਾਇਕ ਨੰਦ ਲਾਲ ਦਾ ਦਿਹਾਂਤ

ਚੰਡੀਗੜ੍ਹ-ਸ਼ੋ੍ਰਮਣੀ ਅਕਾਲੀ ਦਲ ਦੇ ਸਾਬਕਾ ਵਿਧਾਇਕ ਨੰਦ ਲਾਲ ਦਾ ਲੰਬੀ ਬਿਮਾਰੀ ਦੇ ਬਾਅਦ ਮੁਹਾਲੀ ਦੇ ਹਸਪਤਾਲ ‘ਚ ਦਿਹਾਂਤ ਹੋ ਗਿਆ | ਉਹ 73 ਸਾਲਾਂ ਦੇ ਸਨ | ਨੰਦ ਲਾਲ ਬਲਾਚੌਰ ਵਿਧਾਨ ਸਭਾ ਹਲਕੇ ਤੋਂ ਚਾਰ ਵਾਰ ਵਿਧਾਇਕ ਰਹਿ ਚੁੱਕੇ ਹਨ | ਉਹ ਆਪਣੇ ਪਿੱਛੇ ਦੋ ਬੇਟੇ ਛੱਡ ਗਏ ਹਨ | ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਉਨ੍ਹਾਂ ਦੇ ਦਿਹਾਂਤ ‘ਤੇ ਦੁੱਖ ਦਾ ਪ੍ਰਗਟਾਵਾ ਕੀਤਾ ਹੈ | ਉਨ੍ਹਾਂ ਨੇ ਆਪਣੇ ਸ਼ੋਕ ਸੁਨੇਹੇ ‘ਚ ਨੰਦ ਲਾਲ ਨੂੰ ਉੱਘੇ ਰਾਜਨੀਤੀਵਾਨ ਅਤੇ ਲੋਕਾਂ ਦਾ ਨੇਤਾ ਕਰਾਰ ਦਿੱਤਾ, ਜਿਨ੍ਹਾਂ ਨੇ ਹੇਠਲੇ ਤਬਕੇ ਦੇ ਲੋਕਾਂ ਦੀ ਭਲਾਈ ਅਤੇ ਖੇਤਰ ਦੇ ਵਿਕਾਸ ਲਈ ਅਣਥੱਕ ਮਿਹਨਤ ਕੀਤੀ | ਮੁੱਖ ਮੰਤਰੀ ਨੇ ਕਿਹਾ ਕਿ ਨੰਦ ਲਾਲ ਨੂੰ ਸਾਰਿਆਂ ਵਲੋਂ ਖ਼ਾਸ ਤੌਰ ‘ਤੇ ਬਲਾਚੌਰ ਖੇਤਰ ਦੇ ਲੋਕਾਂ ਵਲੋਂ ਹਮੇਸ਼ਾ ਯਾਦ ਰੱਖਿਆ ਜਾਵੇਗਾ | ਉਨ੍ਹਾਂ ਕਿਹਾ ਕਿ ਨੰਦ ਲਾਲ ਦੇ ਤੁਰ ਜਾਣ ਨਾਲ ਸਿਆਸੀ ਸਫ਼ਾਂ ‘ਚ ਇਕ ਖਲਾਅ ਪੈਦਾ ਹੋ ਗਿਆ ਹੈ ਜਿਸ ਨੂੰ ਭਰਨਾ ਮੁਸ਼ਕਿਲ ਹੈ |

ਮੋਗਾ ‘ਚ ਕਬੱਡੀ ਖਿਡਾਰੀ ਦੀ ਮੌਤ

ਮੋਗਾ-ਪਿੰਡ ਦੌਲੇਵਾਲਾ ਵਿਚ ਨਸ਼ੇ ਦੀ ਓਵਰਡੋਜ਼ ਨਾਲ ਇੱਕ 30 ਸਾਲਾ ਕਬੱਡੀ ਖਿਡਾਰੀ ਦੀ ਮੌਤ ਹੋਣ ਬਾਰੇ ਪਤਾ ਚਲਿਆ। ਪੁਲਿਸ ਚੌਕੀ ਦੌਲੇਵਾਲਾ ਦੇ ਇੰਚਾਰਜ ਏਐਸਆਈ ਰਾਮ ਲੁਭਾਇਆ ਨੇ ਦੱਸਿਆ ਕਿ ਵੀਰਵਾਰ ਵਾਲੇ ਦਿਨ ਪਿੰਡ ਦੌਲੇਵਾਲਾ ਦੇ ਕੋਲ ਇੱਕ ਨੌਜਵਾਨ ਬੇਹੋਸ਼ੀ ਦੀ ਹਾਲਤ ਵਿਚ ਮਿਲਿਆ। ਨਸ਼ੇ ਦੀ ਓਵਰਡੋਜ਼ ਦੇ ਕਾਰਨ ਉਸ ਦੇ ਮੂੰਹ ਤੋਂ ਝੱਗ Îਨਿਕਲ ਰਹੀ ਸੀ। ਜਿਸ ਨੂੰ ਐਂਬੂਲੈਂਸ ਜ਼ਰੀਏ ਕੋਟਈਸੇ ਖਾਂ ਦੇ ਸਰਕਾਰੀ ਹਸਪਤਾਲ ਵਿਚ ਦਾਖ਼ਲ ਕਰਾਇਆ। ਹਾਲਤ ਗੰਭੀਰ ਹੋਣ ਕਾਰਨ ਨੌਜਵਾਨ ਨੂੰ ਮੋਗਾ ਸਿਵਲ ਹਸਪਤਾਲ ਰੈਫਰ ਕਰ ਦਿੱਤਾ। ਜਿੱਥੇ ਇਲਾਜ ਦੌਰਾਨ ਸ਼ੁੱਕਰਵਾਰ ਨੂੰ ਮੋਗਾ ਸਿਵਲ ਹਸਪਤਾਲ ਰੈਫਰ ਕਰ ਦਿੱਤਾ ਗਿਆ। ਜਿੱਥੇ ਇਲਾਜ ਦੌਰਾਨ ਉਸ ਦੀ ਮੌਤ ਹੋ ਗਈ। ਜਾਂਚ ਅਧਿਕਾਰੀ ਅਨੁਸਾਰ ਮ੍ਰਿਤਕ ਦੀ ਪਛਾਣ 30 ਸਾਲਾ ਹਰਦੇਵ ਸਿੰਘ ਪਿੰਡ ਰੰਡਿਆਲਾ ਦੇ ਰੂਪ ਵਿਚ ਹੋਈ। ਮਾਮਲੇ ਦੀ ਮੁਢਲੀ ਜਾਂਚ ਦੌਰਾਨ ਪਤਾ ਚਲਿਆ ਕਿ ਹਰਦੇਵ ਸਿੰਘ ਕਬੱਡੀ ਦਾ ਖਿਡਾਰੀ ਸੀ। ਕੁਝ ਦਿਨ ਪਹਿਲਾਂ ਉਹ ਕੰਬਾਈਨ ਲੈ ਕੇ ਮੱਧ ਪ੍ਰਦੇਸ਼ ਗਿਆ ਸੀ। ਉਹ ਮੰਗਲਵਾਰ ਨੂੰ ਵਾਪਸ ਪਰਤਿਆ ਸੀ। ਹਰਦੇਵ ਨੇ ਵਾਪਸ ਆਉਣ ਦੀ ਸੂਚਨਾ ਅਪਣੇ ਪਰਵਾਰ ਨੂੰ ਨਹੀਂ ਦਿੱਤੀ ਸੀ।

ਹੁਣ ਸੂਰਤ ਤੋਂ ਆਉਣ ਵਾਲੇ ਕੱਪੜੇ ਦੇ ਲਿਫਾਫਿਆਂ ’ਤੇ ਲਿਖਿਆ ‘ਨਮੋ ਅਗੇਨ’

ਲੁਧਿਆਣਾ-ਬ੍ਰਾਂਡਿੰਗ ’ਚ ਹਮੇਸ਼ਾ ਨੰਬਰ-1 ਰਹਿਣ ਵਾਲੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ਨਾਅਰਿਆਂ ਦੇ ਨਾਲ ਹੁਣ ਸੂਰਤ ਤੋਂ ਆਉਣ ਵਾਲੇ ਕੱਪੜੇ ਦੇ ਲਿਫ਼ਾਫ਼ੇ ਵੀ ਰੰਗੇ ਗਏ ਹਨ। ਸੂਰਤ ਦੀਆਂ ਕੱਪੜਾ ਮਿੱਲਾਂ ਤੋਂ ਆਉਣ ਵਾਲੇ ਲਿਫਾਫਿਆਂ ’ਤੇ ‘ਨਮੋ ਅਗੇਨ’ ਤੇ ‘ਬੇਟੀ ਬਚਾਓ ਬੇਟੀ ਪੜ੍ਹਾਓ’ ਦੇ ਨਾਅਰੇ ਲਿਖੇ ਹੋਏ ਹਨ। ‘ਨਮੋ ਅਗੇਨ’ ਭਾਜਪਾ ਦੀ ਇਨ੍ਹਾਂ ਚੋਣਾਂ ਸਬੰਧੀ ਵੱਡੀ ਮੁਹਿੰਮ ਹੈ, ਜਿਸ ਰਾਹੀਂ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੂੰ ਦੁਬਾਰਾ ਪ੍ਰਧਾਨ ਮੰਤਰੀ ਬਣਾਉਣ ਲਈ ਅਪੀਲ ਕੀਤੀ ਜਾ ਰਹੀ ਹੈ। ਇਹ ਲਿਫਾਫੇ ਗਾਹਕਾਂ ਨੂੰ ਤਾਂ ਨਹੀਂ ਦਿੱਤੇ ਜਾ ਰਹੇ, ਪਰ ਦੁਕਾਨਦਾਰਾਂ ਤੱਕ ਸਿੱਧੇ ਜ਼ਰੂਰ ਪੁੱਜ ਰਹੇ ਹਨ ਤੇ ਉਥੇ ਖਰੀਦਾਰੀ ਕਰਨ ਆਉਣ ਵਾਲੇ ਲੋਕ ਇਸ ਇਸ਼ਤਿਹਾਰਬਾਜ਼ੀ ਤੋਂ ਹੈਰਾਨ ਵੀ ਹਨ। ਦਰਅਸਲ, ਲੋਕ ਸਭਾ ਚੋਣਾਂ 2019 ਦੇ ਆਗਾਜ਼ ਦੇ ਨਾਲ ਹੀ ਭਾਰਤੀ ਜਨਤਾ ਪਾਰਟੀ ਨੇ ‘ਨਮੋ ਅਗੇਨ’ ਮੁਹਿੰਮ ਦੀ ਸ਼ੁਰੂਆਤ ਕੀਤੀ ਸੀ। ਇਸ ਤਹਿਤ ਭਾਜਪਾ ਵੱਲੋਂ ਟੋਪੀਆਂ, ਟੀ-ਸ਼ਰਟਾਂ, ਬੈਜ ਤੇ ਪੈੱਨ ਬਣਾ ਕੇ ਮਸ਼ਹੂਰੀ ਕੀਤੀ ਜਾ ਰਹੀ ਸੀ, ਪਰ ਹੁਣ ਸੂਰਤ (ਗੁਜਰਾਤ) ਦੇ ਕੱਪੜਾ ਵਪਾਰੀਆਂ ਨੇ ਵੀ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਅਤੇ ਭਾਜਪਾ ਦਾ ਚੁਣਾਵੀਂ ਪ੍ਰਚਾਰ ਕਰਨ ਦਾ ਨਵਾਂ ਤਰੀਕਾ ਲੱਭ ਲਿਆ ਹੈ। ਪਿਛਲੇ ਕਈ ਦਿਨਾਂ ਤੋਂ ਸੂਰਤ ਦੀਆਂ ਕੱਪੜਾ ਮਿੱਲਾਂ ਤੋਂ ਜੋ ਵੀ ਕੱਪੜੇ ਦੇ ਥਾਨ ਆ ਰਹੇ ਹਨ, ਉਨ੍ਹਾਂ ’ਤੇ ਲੱਗੇ ਲਿਫਾਫਿਆਂ ’ਤੇ ਪਹਿਲਾਂ ਕੱਪੜਾ ਮਿੱਲਾਂ ਦਾ ਨਾਂ ਲਿਖਿਆ ਹੁੰਦਾ ਸੀ ਪਰ ਹੁਣ ਇਸ ’ਤੇ ‘ਨਮੋ ਅਗੇਨ’ ਤੇ ‘ਬੇਟੀ ਬਚਾਓ ਬੇਟੀ ਪੜ੍ਹਾਓ’ ਲਿਖਿਆ ਆ ਰਿਹਾ ਹੈ।
ਲੁਧਿਆਣਾ ਵਿੱਚ ਕੱਪੜੇ ਦਾ ਕਾਰੋਬਾਰ ਕਰਨ ਵਾਲੇ ਕੁਲਵੰਤ ਸਿੰਘ ਨੇ ਦੱਸਿਆ ਕਿ ਜਦੋਂ ਤੋਂ ਲੋਕ ਸਭਾ ਚੋਣਾਂ ਦਾ ਪਿੜ ਭਖਿਆ ਹੈ, ਉਸ ਤੋਂ ਕੁੱਝ ਦਿਨ ਬਾਅਦ ਹੀ ਲੁਧਿਆਣਾ ਦੀ ਕੱਪੜਾ ਮੰਡੀ ਵਿਚ ਆਉਣ ਵਾਲੇ ਕੱਪੜਿਆਂ ਦੇ ਲਿਫ਼ਾਫ਼ੇ ਮੋਦੀ ਦੇ ਪ੍ਰਚਾਰ ਦੇ ਰੰਗ ਵਿੱਚ ਰੰਗ ਗਏ ਸਨ। ਹਰ ਲਿਫਾਫੇ ’ਤੇ ‘ਨਮੋ ਅਗੇਨ’ ਲਿਖਿਆ ਆ ਰਿਹਾ ਹੈ। ਉਨ੍ਹਾਂ ਨੂੰ ਇਹ ਤਾਂ ਨਹੀਂ ਪਤਾ ਕਿ ਇਹ ਭਾਜਪਾ ਖ਼ੁਦ ਲਿਖਵਾ ਰਹੀ ਹੈ ਜਾਂ ਸੂਰਤ ਦੇ ਕੱਪੜਾ ਮਿੱਲ ਵਪਾਰੀ ਆਪਣੇ ਪੱਧਰ ’ਤੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦਾ ਪ੍ਰਚਾਰ ਕਰ ਰਹੇ ਹਨ ਪਰ ਉਹ ਇਸ ਤਰ੍ਹਾਂ ਦੇ ਪ੍ਰਚਾਰ ਨੂੰ ਦੇਖ ਕੇ ਹੈਰਾਨ ਹੋ ਰਹੇ ਹਨ ਕਿ ਭਾਰਤੀ ਜਨਤਾ ਪਾਰਟੀ ਪ੍ਰਧਾਨ ਮੰਤਰੀ ਮੋਦੀ ਦਾ ਕਿਸ ਤਰੀਕਿਆਂ ਨਾਲ ਪ੍ਰਚਾਰ ਕਰ ਰਹੀ ਹੈ। ਉਨ੍ਹਾਂ ਦੱਸਿਆ ਕਿ ਇਹ ਲਿਫਾਫੇ ਗਾਹਕਾਂ ਕੋਲ ਤਾਂ ਨਹੀਂ ਜਾ ਰਹੇ, ਪਰ ਸੈਂਕੜੇ ਦੁਕਾਨਦਾਰਾਂ ਤੇ ਉਨ੍ਹਾਂ ਦੇ ਵਰਕਰਾਂ ਕੋਲ ਜ਼ਰੂਰ ਪਹੁੰਚ ਰਹੇ ਹਨ, ਜਿਸ ਜ਼ਰੀਏ ਭਾਜਪਾ ਦੀ ‘ਨਮੋ ਅਗੇਨ’ ਮੁਹਿੰਮ ਦਾ ਪ੍ਰਚਾਰ ਹੋ ਰਿਹਾ ਹੈ।
ਲੁਧਿਆਣਾ ਕੱਪੜੇ ਦੀ ਹੋਲਸੇਲ ਤੇ ਰਿਟੇਲ ਦੀ ਵੱਡੀ ਮੰਡੀ ਹੈ। ਇੱਥੇ ਰੋਜ਼ਾਨਾ ਸੈਂਕੜੇ ਥਾਨ ਕੱਪੜਾ ਸੂਰਤ ਦੀਆਂ ਵੱਖ ਵੱਖ ਮਿੱਲਾਂ ਤੋਂ ਲੁਧਿਆਣਾ ਆਉਂਦਾ ਹੈ। ਸੂਰਤ ਦੇ ਨਾਲ ਲੁਧਿਆਣਾ ਦਾ ਕਰੋੜਾਂ ਰੁਪਏ ਦਾ ਵਪਾਰ ਹੈ ਤੇ ਲੱਖਾਂ ਲੋਕ ਇਸ ਕਪੜੇ ਦੇ ਧੰਦੇ ਨਾਲ ਜੁੜੇ ਹੋਏ ਹਨ।