ਮੁੱਖ ਖਬਰਾਂ
Home / ਭਾਰਤ (page 10)

ਭਾਰਤ

ਪ੍ਰਧਾਨ ਮੰਤਰੀ ਵਲੋਂ ਬਹਾਦਰੀ ਪੁਰਸਕਾਰ ਜਿੱਤਣ ਵਾਲੇ ਬੱਚਿਆਂ ਨਾਲ ਮੁਲਾਕਾਤ

ਨਵੀਂ ਦਿੱਲੀ-ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਅੱਜ ਪ੍ਰਧਾਨ ਮੰਤਰੀ ਰਾਸ਼ਟਰੀ ਬਾਲ ਪੁਰਸਕਾਰ 2019 ਹਾਸਲ ਕਰਨ ਵਾਲੇ ਬੱਚਿਆਂ ਨੂੰ ਵਧਾਈ ਦਿੰਦਿਆਂ ਅਪੀਲ ਕੀਤੀ ਕਿ ਇਹ ਬਹਾਦਰ ਬੱਚੇ ਕੁਦਰਤ ਨਾਲ ਜੁੜੇ ਰਹਿਣ। ਮੋਦੀ ਨੇ ਬਹਾਦਰੀ ਪੁਰਸਕਾਰ ਜੇਤੂਆਂ ਦੇ ਰੂਬਰੂ ਹੁੰਦੇ ਕਿਹਾ ਕਿ ਇਹ ਪੁਰਸਕਾਰ ਪ੍ਰਤਿਭਾਸ਼ਾਲੀ ਬੱਚਿਆਂ ਦੀ ਪਛਾਣ ਲਈ ਇਕ ਮੌਕਾ ਪ੍ਰਦਾਨ ਕਰਦੇ ਹਨ ਅਤੇ ਉਨ੍ਹਾਂ ਵਰਗੇ ਹੋਰਾਂ ਲਈ ਵੀ ਪ੍ਰੇਰਨਾ ਸਰੋਤ ਹਨ। ਇਸ ਮੌਕੇ ਬੱਚਿਆਂ ਨੇ ਆਪਣੀਆਂ ਪ੍ਰਾਪਤੀਆਂ ਬਾਰੇ ਵਿਸਥਾਰ ਨਾਲ ਦੱਸਿਆ ਅਤੇ ਆਪਣੀਆਂ ਪ੍ਰੇਰਨਾਦਾਇਕ ਕਹਾਣੀਆਂ ਸਾਂਝੀਆਂ ਕੀਤੀਆਂ। ਇਸ ਮੌਕੇ ਮੋਦੀ ਨੇ ਵੀ ਬੱਚਿਆਂ ਨਾਲ ਕੁਝ ਹਲਕੇ ਫੁਲਕੇ ਪਲ ਸਾਂਝੇ ਕੀਤੇ ਅਤੇ ਬੱਚਿਆਂ ਨੂੰ ਆਟੋਗ੍ਰਾਫ਼ ਦਿੱਤੇ। ਜ਼ਿਕਰਯੋਗ ਹੈ ਕਿ ਦੋ ਸ਼੍ਰੇਣੀਆਂ ਵਿਅਕਤੀਗਤ ਤੌਰ ‘ਤੇ ਬਾਲ ਸ਼ਕਤੀ ਪੁਰਸਕਾਰ ਅਤੇ ਸੰਸਥਾਵਾਂ ਤੇ ਬੱਚਿਆਂ ਲਈ ਕੰਮ ਕਰਨ ਵਾਲਿਆਂ ਲਈ ਬਾਲ ਕਲਿਆਣ ਪੁਰਸਕਾਰ ਦਿੱਤੇ ਗਏ। ਇਸੇ ਤਰ੍ਹਾਂ ਪ੍ਰਧਾਨ ਮੰਤਰੀ ਨੇ ਆਪਣੀ ਰਿਹਾਇਸ਼ ‘ਤੇ ਇਕ ਵੱਖਰੇ ਪ੍ਰੋਗਰਾਮ ਦੌਰਾਨ ਝਾਕੀਆਂ ਦੇ ਕਲਾਕਾਰਾਂ, ਐਨ.ਸੀ.ਸੀ. ਕੈਡਿਟਾਂ ਅਤੇ ਐਨ.ਐਸ.ਐਸ. ਵਲੰਟੀਅਰਾਂ ਨਾਲ ਵੀ ਮੁਲਾਕਾਤ ਕੀਤੀ। ਗੱਲਬਾਤ ਦੌਰਾਨ ਉਨ੍ਹਾਂ ਗਣਤੰਤਰ ਦਿਵਸ ਪਰੇਡ ਅਤੇ ਇਸ ਨਾਲ ਸਬੰਧਿਤ ਸਮਾਰੋਹਾਂ ‘ਚ ਹਿੱਸਾ ਲੈਣ ਵਾਲੇ ਕਲਾਕਾਰਾਂ ਨੂੰ ਵਧਾਈ ਦਿੰਦਿਆਂ ਕਿਹਾ ਕਿ ਪੂਰਾ ਦੇਸ਼ ਤੁਹਾਡੇ ਤੋਂ ਪ੍ਰੇਰਨਾ ਲੈਂਦਾ ਹੈ।

ਪ੍ਰਿਯੰਕਾ ਦੇ ਆਉਣ ਨਾਲ ਯੂਪੀ ਵਿਚ ਆਵੇਗੀ ਨਵੀਂ ਸੋਚ : ਰਾਹੁਲ ਗਾਂਧੀ

ਅਮੇਠੀ-ਕਾਂਗਰਸ ਪ੍ਰਧਾਨ ਰਾਹੁਲ ਗਾਂਧੀ ਨੇ ਪ੍ਰਿਯੰਕਾ ਗਾਂਧੀ ਵਾਡਰਾ ਨੂੰ ਪਾਰਟੀ ਦਾ ਅਹੇਦਦਾਰ ਬਣਾਉਣ ਮਗਰੋਂ ਕਿਹਾ ਕਿ ਪ੍ਰਿਯੰਕਾ ਦੇ ਆਉਣ ਨਾਲ ਯੂਪੀ ਵਿਚ ਨਵੇਂ ਤਰੀਕੇ ਦੀ ਸੋਚ ਆਵੇਗੀ ਅਤੇ ਰਾਜਨੀਤੀ ਵਿਚ ਹਾਂਪੱਖੀ ਤਬਦੀਲੀ ਆਵੇਗੀ। ਰਾਹੁਲ ਨੇ ਕਿਹਾ, ‘ਮੈਂ ਯੂਪੀ ਵਿਚ ਪ੍ਰਿਯੰਕਾ ਗਾਂਧੀ ਅਤੇ ਸਿੰਧੀਆ ਨੂੰ ਮਿਸ਼ਨ ਦਿਤਾ ਹੈ ਕਿ ਉਹ ਰਾਜ ਵਿਚ ਕਾਂਗਰਸ ਦੀ ਸੱਚੀ ਵਿਚਾਰਧਾਰਾ ਯਾਨੀ ਗ਼ਰੀਬਾਂ ਅਤੇ ਕਮਜ਼ੋਰ ਲੋਕਾਂ ਦੀ ਵਿਚਾਰਧਾਰਾ- ਸਾਰਿਆਂ ਨੂੰ ਅੱਗੇ ਲੈ ਕੇ ਵਧਣ ਦੀ ਵਿਚਾਰਧਾਰਾ ਨੂੰ ਅੱਗੇ ਵਧਾਉਣ। ਉਨ੍ਹਾਂ ਕਿਹਾ, ‘ਅਸੀਂ ਕਦੇ ਵੀ ਬੈਕਫ਼ੁਟ ‘ਤੇ ਨਹੀਂ ਖੇਡਾਂਗੇ। ਅਸੀਂ ਰਾਜਨੀਤੀ ਜਨਤਾ ਲਈ, ਵਿਕਾਸ ਲਈ ਕਰਦੇ ਹਾਂ।
ਜਿਵੇਂ ਮੌਕਾ ਮਿਲੇਗਾ, ਅਸੀਂ ਫ਼ਰੰਟਫ਼ੁਟ ‘ਤੇ ਖੇਡਾਂਗੇ।’ ਉਨ੍ਹਾਂ ਕਿਹਾ ਕਿ ਉਹ ਬਸਪਾ ਮੁਖੀ ਮਾਇਆਵਤੀ ਅਤੇ ਸਮਾਜਵਾਦੀ ਮੁਖੀ ਅਖਿਲੇਸ਼ ਯਾਦਵ ਦਾ ਪੂਰਾ ਆਦਰ ਕਰਦੇ ਹਾਂ। ਉਨ੍ਹਾਂ ਕਿਹਾ ਕਿ ਪ੍ਰਿਯੰਕਾ ਤੇ ਸਿੰਧੀਆ ਨੂੰ ‘ਮਿਸ਼ਨ ਯੂਪੀ’ ਦੇ ਦਿਤਾ ਹੈ। ਕਾਂਗਰਸ ਅਤੇ ਸਮਾਜਵਾਦੀ-ਬਸਪਾ ਦੀ ਵਿਚਾਰਧਾਰਾ ਵਿਚ ਕਾਫ਼ੀ ਸਮਾਨਤਾਵਾਂ ਹਨ। ਸਾਡੀ ਲੜਾਈ ਭਾਜਪਾ ਵਿਰੁਧ ਹੈ।
ਰਾਹੁਲ ਨੇ ਕਿਹਾ ਕਿ ਸਮਾਜਵਾਦੀ ਅਤੇ ਬਸਪਾ ਨਾਲ ਸਾਡਾ ਜਿਥੇ ਵੀ ਸਹਿਯੋਗ ਹੋ ਸਕਦਾ ਹੈ, ਅਸੀਂ ਕਰਨ ਨੂੰ ਤਿਆਰ ਹਾਂ। ਜਿਥੇ ਵੀ ਅਸੀਂ ਭਾਜਪਾ ਨੂੰ ਹਰਾਉਣ ਲਈ ਇਕੱਠੇ ਕੰਮ ਕਰ ਸਕਦੇ ਹਾਂ, ਅਸੀਂ ਕਰਾਂਗੇ। ਉਨ੍ਹਾਂ ਕਿਹਾ, ‘ਪਰ ਕਾਂਗਰਸ ਪਾਰਟੀ ਦੀ ਥਾਂ ਬਣਾਉਣ ਦਾ ਕੰਮ ਸਾਡਾ ਹੈ। ਅਸੀਂ ਇਹ ਜਗ੍ਹਾ ਬਣਾਉਣ ਲਈ ਵੱਡਾ ਕਦਮ ਚੁਕਿਆ ਹੈ। ਮੈਨੂੰ ਬਹੁਤ ਖ਼ੁਸ਼ੀ ਹੋ ਰਹੀ ਹੈ ਕਿ ਮੇਰੀ ਭੈਣ ਜੋ ਬਹੁਤ ਮਿਹਨਤੀ ਹੈ, ਹੁਣ ਸਾਡੇ ਨਾਲ ਕੰਮ ਕਰੇਗੀ।’

ਆਮਦਨ ਤੋਂ ਵੱਧ ਜਾਇਦਾਦ ਬਣਾਉਣ ਦੇ ਮਾਮਲੇ ’ਚ ਹਾਈ ਕੋਰਟ ਪੁੱਜੇ ਵੀਰਭੱਦਰ

ਨਵੀਂ ਦਿੱਲੀ-ਹਿਮਾਚਲ ਪ੍ਰਦੇਸ਼ ਦੇ ਸਾਬਕਾ ਮੁੱਖ ਮੰਤਰੀ ਵੀਰਭੱਦਰ ਸਿੰਘ ਤੇ ਉਨ੍ਹਾਂ ਦੀ ਪਤਨੀ ਪ੍ਰਤਿਭਾ ਸਿੰਘ ਨੇ ਆਮਦਨ ਤੋਂ ਵੱਧ ਜਾਇਦਾਦ ਬਣਾਉਣ ਦੇ ਮਾਮਲੇ ’ਚ ਟ੍ਰਾਇਲ ਕੋਰਟ ਦੇ ਇਕ ਫ਼ੈਸਲੇ ਖ਼ਿਲਾਫ਼ ਦਿੱਲੀ ਹਾਈ ਕੋਰਟ ਪਹੁੰਚ ਕੀਤੀ ਹੈ। ਟ੍ਰਾਇਲ ਕੋਰਟ ਨੇ ਇਕ ਹੁਕਮ ਰਾਹੀਂ ਇਸ ਮਾਮਲੇ ਵਿਚ ਉਨ੍ਹਾਂ ਖ਼ਿਲਾਫ਼ ਦੋਸ਼ ਆਇਦ ਕਰਨ ਬਾਰੇ ਕਿਹਾ ਸੀ। ਸੀਬੀਆਈ ਵੱਲੋਂ ਦਰਜ ਕੀਤੇ ਇਸ ਕੇਸ ਵਿਚ ਟ੍ਰਾਇਲ ਕੋਰਟ ਦਾ ਇਹ ਫ਼ੈਸਲਾ 10 ਦਸੰਬਰ 2018 ਵਿਚ ਆਇਆ ਸੀ। ਸਾਬਕਾ ਮੁੱਖ ਮੰਤਰੀ ਦੀ ਅਰਜ਼ੀ ’ਤੇ ਸੁਣਵਾਈ ਭਲਕੇ ਹੋਵੇਗੀ। ਟ੍ਰਾਇਲ ਕੋਰਟ ਨੇ ਦੋਸ਼ ਆਇਦ ਕਰਨ ਲਈ 29 ਜਨਵਰੀ ਦੀ ਤਰੀਕ ਤੈਅ ਕੀਤੀ ਹੋਈ ਹੈ।

ਠਾਕਰੇ ਮੈਮੋਰੀਅਲ: ਨੀਂਹ ਪੱਥਰ ਮੌਕੇ ਭਾਜਪਾ ਤੇ ਸ਼ਿਵ ਸੈਨਾ ਨੇ ਦਿਖਾਈ ਇਕਜੁੱਟਤਾ

ਮੁੰਬਈ-ਇੱਥੇ ਦਾਦਰ ਇਲਾਕੇ ਦੇ ਸ਼ਿਵਾਜੀ ਪਾਰਕ ਵਿਚ ਸ਼ਿਵ ਸੈਨਾ ਦੇ ਬਾਨੀ ਬਾਲ ਠਾਕਰੇ ਦੇ 93ਵੇਂ ਜਨਮ ਦਿਨ ਮੌਕੇ ਕਰਵਾਏ ਸਮਾਗਮ ਵਿਚ ਸ਼ਿਵ ਸੈਨਾ ਦੇ ਮੁਖੀ ਊਧਵ ਠਾਕਰੇ ਨੇ ਸੂਬੇ ਦੇ ਮੁੱਖ ਮੰਤਰੀ ਦੇਵਿੰਦਰ ਫੜਨਵੀਸ ਨਾਲ ਸਨੇਹ ਭਰਪੂਰ ਹੱਥ ਮਿਲਾਇਆ ਅਤੇ ਆਪਣੀਆਂ ਸ਼ੁਭਕਾਮਨਾਵਾਂ ਵੀ ਦਿੱਤੀਆਂ ਪਰ ਇਸ ਦੇ ਨਾਲ ਹੀ ਸ਼ਿਵ ਸੈਨਾ ਨੇ ਇਸ ਨੂੰ ਕਿਸੇ ਚੋਣ ਗੱਠਜੋੜ ਦੀ ਕੋਸ਼ਿਸ਼ ਵਜੋਂ ਦੇਖਣ ਤੋਂ ਇਨਕਾਰ ਕਰ ਦਿੱਤਾ ਹੈ। ਦੋਵੇਂ ਆਗੂ ਇੱਥੇ ਬਾਲ ਠਾਕਰੇ ਦੀ ਯਾਦਗਾਰ ਉਸਾਰਨ ਲਈ ਰੱਖੇ ਨੀਂਹ ਪੱਥਰ ਸਮਾਗਮ ਮੌਕੇ ਸਮਾਰੋਹ ਵਿਚ ਸ਼ਾਮਲ ਹੋਏ। ਇਸ ਦੌਰਾਨ ਹੀ ਮੁੱਖ ਮੰਤਰੀ ਨੇ ਆਪਣੀਆਂ ਅਤੇ ਊਧਵ ਠਾਕਰੇ ਦੀਆਂ ਯਾਦਗਾਰ ਦਾ ਨੀਂਹ ਪੱਥਰ ਰੱਖਣ ਮੌਕੇ ਦੀਆਂ ਤਸਵੀਰਾਂ ਵੀ ਸਾਂਝੀਆਂ ਕੀਤੀਆਂ ਹਨ। ਮਹਾਂਰਾਸ਼ਟਰ ਸਰਕਾਰ ਨੇ ਯਾਦਗਾਰ ਦੀ ਉਸਾਰੀ ਲਈ ਇੱਕ ਸੌ ਕਰੋੜ ਦੀ ਰਾਸ਼ੀ ਪ੍ਰਵਾਨ ਕੀਤੀ ਹੈ। ਨਵੀਂ ਦਿੱਲੀ ਵਿਚ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਸ਼ਿਵ ਸੈਨਾ ਦੇ ਬਾਨੀ ਨੂੰ ਉਨ੍ਹਾਂ ਦੇ ਜਨਮ ਦਿਨ ਮੌਕੇ ਯਾਦ ਕਰਦਿਆਂ ਕਿਹਾ ਕਿ ਸਤਿਕਾਰਯੋਗ ਬਾਲਾ ਸਾਹਿਬ ਦਲੇਰ ਵਿਅਕਤੀ ਸਨ ਤੇ ਲੋਕਾਂ ਦੇ ਹਿਤਾਂ ਦੀ ਰਾਖੀ ਕਰਨ ਲਈ ਜਾਣੇ ਜਾਂਦੇ ਰਹਿਣਗੇ। ਉਹ ਲੱਖਾਂ ਲੋਕਾਂ ਦੀਆਂ ਭਾਵਨਾਵਾਂ ਦੀ ਤਰਜਮਾਨੀ ਕਰਦੇ ਸਨ।
ਜ਼ਿਕਰਯੋਗ ਹੈ ਕਿ ਹੁਣ ਤੱਕ ਸੈਨਾ ਕੇਂਦਰ ਅਤੇ ਮਹਾਂਰਾਸ਼ਟਰ ਵਿਚ ਆਪਣੀ ਭਾਈਵਾਲ ਭਾਜਪਾ ਨੂੰ ਰਾਮ ਮੰਦਰ, ਰਾਫਾਲ ਜਹਾਜ਼, ਕਿਸਾਨੀ ਸੰਕਟ ਅਤੇ ਤੇਲ ਕੀਮਤਾਂ ਵਿਚ ਵਾਧੇ ਵਰਗੇ ਮੁੱਦਿਆਂ ਉੱਤੇ ਆਪਣੀ ਸਖਤ ਆਲੋਚਨਾ ਦਾ ਸ਼ਿਕਾਰ ਬਣਾਉਂਦੀ ਰਹੀ ਹੈ।

ਅਮਰੀਕਾ ‘ਚ ਅਰੁਣ ਜੇਤਲੀ ਦਾ ਹੋਇਆ ਆਪਰੇਸ਼ਨ, ਡਾਕਟਰਾਂ ਨੇ ਦਿਤੀ 2 ਹਫ਼ਤੇ ਆਰਾਮ ਕਰਨ ਦੀ ਸਲਾਹ

ਨਵੀਂ ਦਿੱਲੀ – ਕੇਂਦਰੀ ਮੰਤਰੀ ਅਰੁਣ ਜੇਤਲੀ ਦਾ ਮੰਗਲਵਾਰ ਨੂੰ ਅਮਰੀਕਾ ਦੇ ਨਿਊਯਾਰਕ ਵਿਚ ਆਪਰੇਸ਼ਨ ਹੋਇਆ ਹੈ। ਜਿਸ ਤੋਂ ਬਾਅਦ ਜੇਤਲੀ ਨੂੰ ਦੋ ਹਫ਼ਤੇ ਆਰਾਮ ਦੀ ਸਲਾਹ ਦਿਤੀ ਗਈ ਹੈ। ਉਦੋਂ ਤੱਕ ਲਈ ਅਰੁਣ ਜੇਤਲੀ ਤੋਂ ਵਿੱਤ ਮੰਤਰਾਲਾ ਦਾ ਜਿੰਮਾ ਲੈ ਲਿਆ ਗਿਆ ਹੈ ਅਤੇ ਰੇਲ ਮੰਤਰੀ ਪੀਊਸ਼ ਗੋਇਲ ਨੂੰ ਚਾਰਜ ਦਿਤਾ ਗਿਆ ਹੈ। ਉਮੀਦ ਜਤਾਈ ਜਾ ਰਹੀ ਹੈ ਕਿ ਪੀਊਸ਼ ਗੋਇਲ ਹੀ ਮੋਦੀ ਸਰਕਾਰ ਦੇ ਕਾਰਜਕਾਲ ਦਾ ਆਖਰੀ ਬਜਟ ਪੇਸ਼ ਕਰਨਗੇ। 66 ਸਾਲ ਦੇ ਅਰੁਣ ਜੇਤਲੀ 13 ਜਨਵਰੀ ਨੂੰ ਅਮਰੀਕਾ ਗਏ ਸਨ।
ਸੂਤਰਾਂ ਨੇ ਕਿਹਾ ਕਿ ਇਸ ਹਫ਼ਤੇ ਹੀ ਉਨ੍ਹਾਂ ਦੀ ‘ਸਾਫਟ ਟਿਸ਼ਿਊ’ ਕੈਂਸਰ ਲਈ ਜਾਂਚ ਕੀਤੀ ਗਈ ਸੀ। ਹਾਲਾਂਕਿ ਇਸ ਦੌਰਾਨ ਵੀ ਜੇਤਲੀ ਸੋਸ਼ਲ ਮੀਡੀਆ ਉਤੇ ਸਰਗਰਮ ਰਹੇ। ਫੇਸਬੁਕ ਉਤੇ ਪੋਸਟ ਲਿਖਣ ਤੋਂ ਇਲਾਵਾ ਉਨ੍ਹਾਂ ਨੇ ਮੌਜੂਦਾ ਮੁੱਦਿਆਂ ਉਤੇ ਟਵੀਟ ਵੀ ਕੀਤੇ। ਧਿਆਨ ਯੋਗ ਹੈ ਕਿ ਇਸ ਤੋਂ ਪਹਿਲਾਂ ਪਿਛਲੇ ਸਾਲ 14 ਮਈ ਨੂੰ ਜੇਤਲੀ ਦਾ ਏਮਜ਼ ਵਿਚ ਗੁਰਦਾ ਟ੍ਰਾਂਸਪਲਾਂਟ ਹੋਇਆ ਸੀ, ਉਸ ਤੋਂ ਬਾਅਦ ਤੋਂ ਉਹ ਵਿਦੇਸ਼ ਨਹੀਂ ਗਏ ਸਨ।
ਇਸ ਮਹੀਨੇ ਅਰੁਣ ਜੇਤਲੀ ਨੂੰ ਲੋਕਸਭਾ ਚੋਣ ਲਈ ਭਾਜਪਾ ਦਾ ਪ੍ਰਚਾਰ ਪ੍ਰਮੁੱਖ ਬਣਾਇਆ ਗਿਆ ਸੀ। ਇਸ ਦੌਰਾਨ ਅਰੁਣ ਜੇਤਲੀ ਮੰਤਰੀ ਅਹੁਦੇ ਉਤੇ ਬਰਕਰਾਰ ਰਹਿਣਗੇ। ਪਰ ਉਨ੍ਹਾਂ ਦੇ ਕੋਲ ਕੋਈ ਪੋਰਟਫੋਲੀਓ ਨਹੀਂ ਹੋਵੇਗਾ। ਦੱਸ ਦਈਏ ਕਿ ਇਸ ਤੋਂ ਪਹਿਲਾਂ ਵੀ ਜਦੋਂ ਅਰੁਣ ਜੇਤਲੀ ਹਸਪਤਾਲ ਵਿਚ ਭਰਤੀ ਸਨ, ਉਦੋਂ ਵੀ ਪੀਊਸ਼ ਗੋਇਲ ਨੇ ਹੀ ਵਿੱਤ ਮੰਤਰਾਲਾ ਦਾ ਕਾਰਜਭਾਰ ਸੰਭਾਲਿਆ ਸੀ।

25 ਸਰਜਰੀ ਤੋਂ ਬਾਅਦ ਵੀ ‘ਟ੍ਰੀ ਮੈਨ’ ਦੀ ਹਾਲਤ ਖ਼ਰਾਬ, ਫਿਰ ਹੱਥਾਂ ‘ਤੇ ਉੱਗਣ ਲੱਗੇ ਰੁੱਖ

ਢਾਕਾ-ਬੰਗਲਾਦੇਸ਼ ਵਿਚ ਟ੍ਰੀ ਮੈਨ ਨਾਮ ਤੋਂ ਮਸ਼ਹੂਰ ਅਬੁਲ ਬਾਜੰਦਰ ਦੀ ਹਾਲਤ ਫਿਰ ਤੋਂ ਖ਼ਰਾਬ ਹੋ ਗਈ ਹੈ। ਉਨ੍ਹਾਂ ਦੇ ਹੱਥਾਂ ਅਤੇ ਪੈਰਾਂ ਦੀ ਚਮੜੀ ‘ਤੇ ਫਿਰ ਰੁੱਖ ਵਰਗਾ ਢਾਂਚਾ ਉੱਗਣ ਲੱਗਾ ਹੈ। ਦੱਸ ਦਈਏ ਕਿ 2016 ਤੋਂ ਹੁਣ ਤੱਕ ਉਨ੍ਹਾਂ ਦੀ 25 ਸਰਜਰੀ ਹੋ ਚੁੱਕੀ ਹੈ। ਇਸ ਦੇ ਬਾਵਜੂਦ ਡਾਕਟਰਾਂ ਨੇ ਕਿਹਾ ਕਿ ਇਸ ਰੋਗ ਨੂੰ ਠੀਕ ਕਰਨ ਲਈ ਫਿਰ ਤੋਂ ਸਰਜਰੀ ਦੀ ਜ਼ਰੂਰਤ ਹੈ। ਦੱਸ ਦਈਏ ਕਿ ਬਾਜੰਦਰ ਨੂੰ Epidermodysplasia verruciformis ਨਾਮ ਦੀ ਬਿਮਾਰੀ ਹੈ। ਇਸ ਬਿਮਾਰੀ ਨੂੰ ਟ੍ਰੀ ਮੈਨ ਸਿੰਡਰੋਮ ਵੀ ਕਿਹਾ ਜਾਂਦਾ ਹੈ।
ਬਾਜੰਦਰ ਨੇ ਦੱਸਿਆ ਕਿ ਰੁੱਖ ਵਰਗੀ ਸੰਰਚਨਾ ਮੇਰੇ ਹੱਥ ਪੈਰਾਂ ਦੇ ਨਵੇਂ ਹਿੱਸਿਆਂ ਵਿਚ ਵੀ ਵੱਧਣ ਲੱਗੀ ਹੈ, ਮੈਨੂੰ ਉਮੀਦ ਹੈ ਕਿ ਡਾਕਟਰ ਮੇਰੀ ਬਿਮਾਰੀ ਨੂੰ ਇਸ ਵਾਰ ਬਿਲਕੁੱਲ ਠੀਕ ਕਰ ਦੇਣਗੇਂ। ਦੱਸ ਦਈਏ ਕਿ ਕਿ ਬਾਜੰਦਰ ਇਲਾਜ ਦੌਰਾਨ ਹਸਪਤਾਲ ਤੋਂ ਫਰਾਰ ਹੋ ਗਿਆ ਸੀ, ਜਿਸ ਕਾਰਨ ਉਸ ਦਾ ਇਲਾਜ ਅਧੂਰਾ ਰਹਿ ਗਿਆ ਸੀ। ਕਿਹਾ ਜਾਂਦਾ ਹੈ ਕਿ ਇਹ ਰੋਗ ਪੂਰੀ ਦੁਨੀਆ ਵਿਚ ਕੁਲ ਅੱਧਾ ਦਰਜਨ ਲੋਕਾਂ ਨੂੰ ਹੀ ਹੈ। ਅਬੁਲ ਦੀ ਹਾਲਤ ਹੁਣ ਬਹੁਤ ਵਿਗੜ ਗਈ ਹੈ।
ਦੱਸ ਦਈਏ ਕਿ ਅਬੁਲ ਪਹਿਲਾਂ ਰਿਕਸ਼ਾ ਚਲਾਕੇ ਜ਼ਿੰਦਗੀ ਦਾ ਗੁਜ਼ਾਰਾ ਕਰਦਾ ਸੀ ਪਰ ਜਦੋਂ ਤੋ ਉਸ ਨੂੰ ਇਹ ਬਿਮਾਰੀ ਹੋਈ, ਉਹ ਕੰਮ ਕਰਨ ਤੋਂ ਅਸਮਰਥ ਹੋ ਗਿਆ। ਉਸਦੀ ਬਿਮਾਰੀ ਦੇ ਬਾਰੇ ਪੂਰੀ ਦੁਨੀਆ ਵਿਚ ਗੱਲ ਹੁੰਦੀ ਹੈ ਕਿਉਂਕਿ ਇਹ ਇਕ ਹੈਰਾਨ ਕਰ ਦੇਣ ਵਾਲਾ ਮਾਮਲਾ ਹੈ ਜੋ ਕਿ ਬਹੁਤ ਘੱਟ ਸੁਣਨ ਵਿਚ ਆਉਂਦਾ ਹੈ।

ਮੁੰਬਈ-ਔਰੰਗਾਬਾਦ ਤੋਂ 9 ਸ਼ੱਕੀ ਗ੍ਰਿਫ਼ਤਾਰ, ਆਈਐਸਆਈਐਸ ਮਾਡਿਊਲ ਦਾ ਸ਼ੱਕ

ਮੁੰਬਈ -ਗਣਤੰਤਰ ਦਿਵਸ ਤੋਂ ਪਹਿਲਾਂ ਮਹਾਰਾਸ਼ਟਰ ਐਟੀ ਟੈਰਿਸਟ ਸਕਾਟ (ਐਟੀਐਸ) ਨੇ ਇਕ ਵੱਡੀ ਕਾਰਵਾਈ ਕੀਤੀ ਹੈ। ਐਟੀਐਸ ਨੇ ਮੁੰਬਈ ਨਾਲ ਲਗਦੇ ਠਾਣੇ ਜਿਲ੍ਹੇ ਦੇ ਮੁੰਬਰਾ ਤੋਂ ਚਾਰ ਅਤੇ ਔਰੰਗਾਬਾਦ ਤੋਂ ਪੰਜ ਸ਼ੱਕੀਆਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਮਹਾਰਾਸ਼ਟਰ ਐਟੀਐਸ ਨੇ ਜਿਨ੍ਹਾਂ ਸ਼ੱਕੀਆਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ ਉਹ ਸਾਰੇ ਬੈਗਲੁਰੂ ਦੀ ਮਸ਼ਹੂਰ ਫਰੰਟ ਆਫ਼ ਇੰਡੀਆ ਦੇ ਦੱਸੇ ਗਏ ਹਨ। ਸ਼ੱਕੀਆਂ ਦੇ ਆਈਐਸਆਈਐਸ ਮਾਡਿਊਲ ਉਤੇ ਕੰਮ ਕਰਨ ਦਾ ਅੰਦਾਜ਼ਾ ਲਗਾਇਆ ਗਿਆ ਹੈ।
ਮੁੰਬਰਾ ਤੋਂ ਹਿਰਾਸਤ ਵਿਚ ਲਏ ਗਏ ਯੁਵਕ ਮੁਹੰਮਦ ਮਜਹਰ ਸ਼ੇਖ, ਮੋਹਸੀਨ ਖ਼ਾਨ, ਫਹਾਦ ਸ਼ਾਹ ਅਤੇ ਤਕੀ ਹੈ। ਇਹ ਸਾਰੇ ਨੌਜਵਾਨ ਸਿੱਖਿਅਤ ਹਨ ਜੋ ਮਸ਼ਹੂਰ ਫਰੰਟ ਆਫ਼ ਇੰਡੀਆ ਦੀ ਔਰੰਗਾਬਾਦ ਸ਼ਾਖਾ ਨਾਲ ਜੁੜੇ ਹੋਏ ਸਨ। ਇਸ ਸ਼ਾਖਾ ਦਾ ਪ੍ਰਮੁੱਖ ਸਲਮਾਨ ਦੱਸਿਆ ਜਾ ਰਿਹਾ ਹੈ। ਸਲਮਾਨ ਕੁੱਝ ਦਿਨ ਪਹਿਲਾਂ ਮੁੰਬਰਾ ਆਇਆ ਸੀ। ਪੁਲਿਸ ਸੂਤਰਾਂ ਦੇ ਮੁਤਾਬਕ ਮੁੰਬਰਾ ਦੇ ਚਾਰੇ ਸ਼ੱਕੀਆਂ ਦੀ ਸਲਮਾਨ ਨਾਲ ਰਮਜਾਨ ਰੋਜੇ ਦੇ ਸਮੇਂ ਮਸਜਿਦ ਵਿਚ ਹੋਣ ਵਾਲੀ ਬੈਠਕ ਦੇ ਦੌਰਾਨ ਮੁਲਾਕਾਤ ਹੋਈ ਸੀ।
ਇਸ ਤੋਂ ਬਾਅਦ ਇਹ ਸਾਰੇ ਸਲਮਾਨ ਦੇ ਨਾਲ ਲਗਾਤਾਰ ਸੰਪਰਕ ਵਿਚ ਸਨ। ਕੁੱਝ ਦਿਨ ਪਹਿਲਾਂ ਹੀ ਸਲਮਾਨ, ਫਹਾਦ ਸ਼ੇਖ ਦੇ ਘਰ ਉਤੇ ਆਇਆ ਸੀ ਅਤੇ ਅਪਣੇ ਨਾਲ ਇਹ ਕਹਿ ਕੇ ਔਰੰਗਾਬਾਦ ਲੈ ਗਿਆ ਕਿ ਉਸ ਦਾ ਵਿਆਹ ਹੈ। ਫਹਾਦ ਦੇ ਨਾਲ ਹੀ ਹੋਰ ਤਿੰਨੋਂ ਵੀ ਔਰੰਗਾਬਾਦ ਗਏ ਸਨ। ਐਟੀਐਸ ਨੇ ਸ਼ੱਕੀਆਂ ਦੇ ਘਰ ਉਤੇ ਛਾਪਾ ਮਾਰ ਕੇ ਘਰ ਦੇ ਸਾਰੇ ਮੈਬਰਾਂ ਦੇ ਮੋਬਾਇਲ ਫੋਨ, ਸਿਮ ਕਾਰਡ ਅਤੇ ਇਕ ਪੁਰਾਣਾ ਲੈਪਟਾਪ ਜ਼ਬਤ ਕਰ ਲਿਆ ਹੈ।

ਈਵੀਐੱਮਜ਼ ਨਾਲ ਛੇੜਛਾੜ: ਚੋਣ ਕਮਿਸ਼ਨ ਵੱਲੋਂ ਸ਼ੁਜਾ ਖ਼ਿਲਾਫ਼ ਸ਼ਿਕਾਇਤ

ਨਵੀਂ ਦਿੱਲੀ-ਖ਼ੁਦ ਨੂੰ ਸਾਈਬਰ ਮਾਹਿਰ ਦੱਸ ਕੇ ਲੋਕ ਸਭਾ ਚੋਣਾਂ 2014 ਵਿਚ ਧਾਂਦਲੀ ਹੋਣ ਤੇ ਇਲੈਕਟ੍ਰਾਨਿਕ ਵੋਟਿੰਗ ਮਸ਼ੀਨਾਂ (ਈਵੀਐੱਮਜ਼) ਦੇ ਹੈਕ (ਛੇੜਛਾੜ) ਹੋਣ ਦਾ ਦਾਅਵਾ ਵਾਲੇ ਵਿਅਕਤੀ ਖ਼ਿਲਾਫ਼ ਚੋਣ ਕਮਿਸ਼ਨ ਨੇ ਦਿੱਲੀ ਪੁਲੀਸ ਨੂੰ ਐੱਫਆਈਆਰ ਦਰਜ ਕਰਨ ਲਈ ਕਿਹਾ ਹੈ। ਕਮਿਸ਼ਨ ਨੇ ਕਿਹਾ ਹੈ ਕਿ ਸਈਦ ਸ਼ੁਜਾ ਨੇ ਅਫ਼ਵਾਹ ਫੈਲਾ ਕੇ ਸਹਿਮ ਪੈਦਾ ਕਰਨ ਸਬੰਧੀ ਇਕ ਕਾਨੂੰਨ ਦੀ ਉਲੰਘਣਾ ਕੀਤੀ ਹੈ। ਚੋਣ ਕਮਿਸ਼ਨ ਨੇ ਸ਼ਿਕਾਇਤ ਵਿਚ ਸ਼ੁਜਾ ਦੇ ਦਾਅਵਿਆਂ ਦੀ ‘ਤੁਰੰਤ ਜਾਂਚ’ ਮੰਗੀ ਹੈ। ਉਸ ਨੇ ਇਹ ਦਾਅਵਾ ਸੋਮਵਾਰ ਲੰਡਨ ਵਿਚ ਹੋਏ ਇਕ ਈਵੈਂਟ ਵਿਚ ਕੀਤਾ ਸੀ। ਭਾਜਪਾ ਨੇ ‘ਸਾਈਬਰ ਮਾਹਿਰ’ ਦੇ ਦਾਅਵਿਆਂ ਨੂੰ ਕਾਂਗਰਸ ਦੀ ਸਾਜ਼ਿਸ਼ ਕਰਾਰ ਦਿੱਤਾ ਹੈ। ਕੇਂਦਰੀ ਮੰਤਰੀ ਰਵੀ ਸ਼ੰਕਰ ਪ੍ਰਸਾਦ ਨੇ ਕਿਹਾ ਕਿ ਕਾਂਗਰਸ ਭਾਰਤੀ ਲੋਕਤੰਤਰ ਤੇ ਚੋਣ ਕਮਿਸ਼ਨ ਨੂੰ ‘ਬਦਨਾਮ’ ਕਰਨ ਦੀ ਕੋਸ਼ਿਸ਼ ਕਰ ਰਹੀ ਹੈ। ਇਸ ‘ਸਾਈਬਰ ਮਾਹਿਰ’ ਨੇ ਦਾਅਵਾ ਕੀਤਾ ਸੀ ਕਿ ਭਾਜਪਾ ਨੇ ਇਲੈਕਟ੍ਰਾਨਿਕ ਵੋਟਿੰਗ ਮਸ਼ੀਨਾਂ ਨਾਲ ਛੇੜਛਾੜ ਕਰ ਕੇ 2014 ਦੀਆਂ ਲੋਕ ਸਭਾ ਚੋਣਾਂ ਜਿੱਤੀਆਂ ਸਨ। ਪ੍ਰਸਾਦ ਨੇ ਕਿਹਾ ਕਿ ਕਾਂਗਰਸ ਨੂੰ 2019 ਦੀਆਂ ਲੋਕ ਸਭਾ ਚੋਣਾਂ ਵਿਚ ਆਪਣੀ ਹਾਰ ਸਪੱਸ਼ਟ ਨਜ਼ਰ ਆ ਰਹੀ ਹੈ ਤੇ ਇਸੇ ਲਈ ਪਾਰਟੀ ਹੁਣ ਹਰ ਹੱਥਕੰਡਾ ਅਪਣਾ ਕੇ ਵਿਰੋਧੀਆਂ ਦੀ ਸਾਖ਼ ਖਰਾਬ ਕਰਨ ਦੀ ਕੋਸ਼ਿਸ਼ ਕਰ ਰਹੀ ਹੈ। ਕੇਂਦਰੀ ਮੰਤਰੀ ਨੇ ਕਿਹਾ ਕਿ ਲੰਡਨ ਵਿਚ ਮੀਡੀਆਂ ਕਾਨਫ਼ਰੰਸ ਕਰਵਾਉਣ ਵਾਲੀ ਇੰਡੀਅਨ ਜਰਨਲਿਸਟ’ਸ ਐਸੋਸੀਏਸ਼ਨ ਦਾ ਮੁਖੀ ਆਸ਼ੀਸ਼ ਰੇਅ ਹੈ ਤੇ ਉਹ ‘ਪੱਕਾ ਕਾਂਗਰਸੀ’ ਹੈ। ਪ੍ਰਸਾਦ ਨੇ ਦਾਅਵਾ ਕੀਤਾ ਕਿ ਉਹ ਉਹ ਕਾਂਗਰਸ ਪੱਖੀ ਨੈਸ਼ਨਲ ਹੈਰਾਲਡ ਲਈ ਲਿਖਦਾ ਰਿਹਾ ਹੈ ਤੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਖ਼ਿਲਾਫ਼ ਉਹ ਕਾਂਗਰਸ ਲਈ ਪ੍ਰਚਾਰ ਵੀ ਕਰਦਾ ਹੈ। ਇਸ ਤੋਂ ਇਲਾਵਾ ਉਸ ਨੇ ਰਾਹੁਲ ਗਾਂਧੀ ਲਈ ਲੰਡਨ ’ਚ ਜਨਤਕ ਇਕੱਠ ਦਾ ਵੀ ਪ੍ਰਬੰਧ ਕੀਤਾ ਸੀ। ਭਾਜਪਾ ਦੀ ਟਿੱਪਣੀ ’ਤੇ ਹਾਲੇ ਤੱਕ ਰੇਅ ਦੀ ਕੋਈ ਪ੍ਰਤੀਕਿਰਿਆ ਨਹੀਂ ਆਈ ਹੈ। ਪ੍ਰਸਾਦ ਨੇ ਲੰਡਨ ਦੀ ਕਾਨਫ਼ਰੰਸ ਵਿਚ ਕਾਂਗਰਸੀ ਆਗੂ ਕਪਿਲ ਸਿੱਬਲ ਦੀ ਮੌਜੂਦਗੀ ’ਤੇ ਵੀ ਸਵਾਲ ਉਠਾਇਆ। ਉਨ੍ਹਾਂ ਕਿਹਾ ਕਿ ਦਾਅਵਾ ਕਰਨ ਵਾਲੇ ਸ਼ੁਜਾ ਨੇ ਵੀ ਕੋਈ ਠੋਸ ਸਬੂਤ ਪੇਸ਼ ਨਹੀਂ ਕੀਤਾ ਹੈ ਤੇ ਇਹ ਸਾਰਾ ਸਿਆਸੀ ਡਰਾਮਾ ਹੈ। ਪ੍ਰਸਾਦ ਨੇ ਦੋਸ਼ ਲਾਇਆ ਕਿ ਪੱਛਮੀ ਬੰਗਾਲ ਵਿਚ ਹੋਈਆਂ ਸਥਾਨਕ ਚੋਣਾਂ ਵਿਚ ਤ੍ਰਿਣਮੂਲ ਕਾਂਗਰਸ ਨੇ ਬੈਲਟ ਪੇਪਰਾਂ ਨਾਲ ਛੇੜਛਾੜ ਕੀਤੀ ਸੀ ਕਿਉਂਕਿ ਈਵੀਐੱਮ ਨਹੀਂ ਵਰਤੀਆਂ ਗਈਆਂ। ਉਨ੍ਹਾਂ ਕਿਹਾ ਕਿ ਕੇਂਦਰੀ ਮੰਤਰੀ ਗੋਪੀਨਾਥ ਮੁੰਡੇ ਦੀ ਹੱਤਿਆ ਦਾ ਦੋਸ਼ ਭਾਜਪਾ ਸਿਰ ਮੜ੍ਹੇ ਜਾਣ ’ਤੇ ਪਾਰਟੀ ‘ਬੇਹੱਦ ਦੁਖੀ’ ਹੋਈ ਹੈ। ਉਨ੍ਹਾਂ ਕਿਹਾ ਕਿ ਈਵੀਐੱਮ 1996 ਤੋਂ ਵਰਤੀ ਜਾ ਰਹੀ ਹੈ ਤੇ ਕਈ ਗ਼ੈਰ-ਭਾਜਪਾ ਸਰਕਾਰਾਂ ਸੂਬਿਆਂ ਤੇ ਕੇਂਦਰ ਵਿਚ ਬਣੀਆਂ ਹਨ।
ਇਲੈਕਟ੍ਰਾਨਿਕਸ ਕਾਰਪੋਰੇਸ਼ਨ ਆਫ਼ ਇੰਡੀਆ (ਈਸੀਆਈਐੱਲ) ਨੇ ਦਾਅਵਾ ਕੀਤਾ ਹੈ ਕਿ ਵੋਟਿੰਗ ਮਸ਼ੀਨਾਂ ਨਾਲ ਛੇੜਛਾੜ ਦਾ ਦਾਅਵਾ ਕਰਨ ਵਾਲਾ ਸਈਦ ਸ਼ੁਜਾ ਕਦੇ ਵੀ ਕਾਰਪੋਰੇਸ਼ਨ ਦਾ ਹਿੱਸਾ ਨਹੀਂ ਰਿਹਾ ਤੇ ਨਾ ਆਰਜ਼ੀ ਤੌਰ ’ਤੇ ਇਸ ਨਾਲ ਜੁੜਿਆ ਰਿਹਾ ਹੈ। ਸ਼ੁਜਾ ਨੇ ਕਾਰਪੋਰੇਸ਼ਨ ਵਿਚ ਕੰਮ ਕਰਨ ਦਾ ਦਾਅਵਾ ਕੀਤਾ ਸੀ। ਜ਼ਿਕਰਯੋਗ ਹੈ ਕਿ ਈਵੀਐੱਮਜ਼ ਦਾ ਨਿਰਮਾਣ ਈਸੀਆਈਐੱਲ ਵੱਲੋਂ ਕੀਤੀ ਜਾਂਦਾ ਹੈ। ਦਿੱਲੀ ਪੁਲੀਸ ਦੇ ਡੀਸੀਪੀ ਮਧੁਰ ਵਰਮਾ ਨੇ ਕਿਹਾ ਕਿ ਚੋਣ ਕਮਿਸ਼ਨ ਦੀ ਸ਼ਿਕਾਇਤ ਮਿਲ ਗਈ ਹੈ ਤੇ ਬਣਦੀ ਕਾਰਵਾਈ ਕੀਤੀ ਜਾਵੇਗੀ।

ਅਮਿਤ ਸ਼ਾਹ ਨੇ ਮਹਾਂਗੱਠਜੋੜ ਦਾ ਉਡਾਇਆ ਮਖੌਲ

ਮਾਲਦਾ (ਪੱਛਮੀ ਬੰਗਾਲ)-ਪੱਛਮੀ ਬੰਗਾਲ ਵਿਚ ਆਪਣੀ ਪਾਰਟੀ ਦੀ ਲੋਕ ਸਭਾ ਚੋਣਾਂ ਬਾਰੇ ਮੁਹਿੰਮ ਦਾ ਆਗਾਜ਼ ਕਰਦਿਆਂ ਭਾਜਪਾ ਦੇ ਪ੍ਰਧਾਨ ਅਮਿਤ ਸ਼ਾਹ ਨੇ ਮਹਾਗਠਬੰਧਨ ਬਣਾਉਣ ਵਾਲੀਆਂ ਵਿਰੋਧੀ ਪਾਰਟੀਆਂ ਦੀ ਖਿੱਲੀ ਉਡਾਉਂਦਿਆਂ ਕਿਹਾ ਕਿ ਇਹ ਸੱਤਾ ਦੇ ਲੋਭ ਕਰ ਕੇ ਇਕੱਠੇ ਹੋਏ ਹਨ ਅਤੇ ਪ੍ਰਧਾਨ ਮੰਤਰੀ ਦੇ ਅਹੁਦੇ ਲਈ ਇਨ੍ਹਾਂ ਵਿਚ ਨੌਂ ਦਾਅਵੇਦਾਰ ਹਨ। ਪੱਛਮੀ ਬੰਗਾਲ ਦੀ ਮੁੱਖ ਮੰਤਰੀ ਤੇ ਤ੍ਰਿਣਮੂਲ ਕਾਂਗਰਸ ਦੀ ਮੁਖੀ ਮਮਤਾ ਬੈਨਰਜੀ ਦੇ ਉਦਮ ਨਾਲ ਪਿਛਲੇ ਸ਼ਨਿੱਚਰਵਾਰ ਕੋਲਕਾਤਾ ਵਿਚ ਕਰਵਾਈ ਗਈ ਮਹਾਂ ਰੈਲੀ ’ਤੇ ਚੁਟਕੀ ਲੈਂਦਿਆਂ ਸ੍ਰੀ ਸ਼ਾਹ ਨੇ ਕਿਹਾ ਕਿ 20-25 ਵੱਖ ਵੱਖ ਆਗੂਆਂ ਨੂੰ ਇਕ ਮੰਚ ’ਤੇ ਲਿਆਉਣ ਦਾ ਕੋਈ ਮਤਲਬ ਨਹੀਂ ਹੈ ਕਿਉਂਕਿ ਪ੍ਰਧਾਨ ਮੰਤਰੀ ਤਾਂ ਨਰਿੰਦਰ ਮੋਦੀ ਨੇ ਹੀ ਬਣਨਾ ਹੈ। ਬੰਗਾਲ ਵਿਚ ‘ਜਨਤੰਤਰ ਬਚਾਓ ਯਾਤਰਾ’ ਦੀ ਸ਼ੁਰੂਆਤ ਕਰਦਿਆਂ ਭਾਜਪਾ ਨੇਤਾ ਨੇ ਰਾਜ ਵਿੱਚੋਂ ਤ੍ਰਿਣਮੂਲ ਕਾਂਗਰਸ ਨੂੰ ਵੀ ਖਦੇੜਨ ਦਾ ਅਹਿਦ ਲਿਆ ਅਤੇ ਕਿਹਾ ਕਿ ਆਉਣ ਵਾਲੀਆਂ ਲੋਕ ਸਭਾ ਚੋਣਾਂ ਵਿਚ ਰਾਜ ਵਿਚ ਲੋਕਤੰਤਰ ਦੀ ਬਹਾਲੀ ਹੋਵੇਗੀ। ਸ੍ਰੀ ਸ਼ਾਹ ਸਿਹਤ ਵਿਗੜਨ ਕਰ ਕੇ ਉਥੋਂ ਹੀ ਨਵੀਂ ਦਿੱਲੀ ਪਰਤ ਆਏ।
ਉਧਰ, ਤ੍ਰਿਣਮੂਲ ਕਾਂਗਰਸ ਨੇ ਕਿਹਾ ਕਿ ਮਾਲਦਾ ਵਿਚ ਭਾਜਪਾ ਪ੍ਰ੍ਰਧਾਨ ਦਾ ਭਾਸ਼ਣ ਸੁਣ ਕੇ ਸਾਫ਼ ਪਤਾ ਚਲਦਾ ਸੀ ਕਿ ਉਹ ਕਿੰਨੇ ਪ੍ਰੇਸ਼ਾਨ ਹਨ। ਉਨ੍ਹਾਂ ਨੂੰ ਵੀ ਪਤਾ ਚੱਲ ਗਿਆ ਹੈ ਕਿ ਉਨ੍ਹਾਂ ਦੇ ਦਿਨ ਪੂਰੇ ਹੋ ਗਏ ਹਨ। ਉਨ੍ਹਾਂ ਦੇ ਭਾਸ਼ਣਾਂ ਵਿਚ ਕੋਈ ਤੱਥ ਸਦਾਕਤ ਨਹੀਂ ਤੇ ਸਲੀਕਾ ਤਾਂ ਬਿਲਕੁਲ ਵੀ ਨਹੀਂ।

ਭੋਪਾਲ ‘ਚ ਇਕ ਘਰ ਤੋਂ ਮਿਲੀ ਪਰਵਾਰ ਦੇ 4 ਲੋਕਾਂ ਦੀ ਲਾਸ਼

ਭੋਪਾਲ-ਭੋਪਾਲ ਦੇ ਮੰਡੀਦੀਪ ਤੋਂ ਦਿਲ ਦਹਿਲਾ ਦੇਣ ਵਾਲੀ ਘਟਨਾ ਸਾਹਮਣੇ ਆਈ ਹੈ। ਇੱਥੇ ਦੀ ਹਿਮਾਂਸ਼ੁ ਕਲੋਨੀ ‘ਚ 24 ਘੰਟੇ ਤੋਂ ਬੰਦ ਮਕਾਨ ‘ਚ 2 ਬੱਚੇ ਅਤੇ 2 ਔਰਤਾਂ ਦੀਆਂ ਲਾਸ਼ਾਂ ਬਰਾਮਦ ਕੀਤੀਆਂ ਗਈਆਂ ਹਨ। ਪਰਵਾਰ ਦੇ ਮੁੱਖੀ ਸੰਨੂ ਨੂੰ ਗੰਭੀਰ ਹਾਲਤ ‘ਚ ਹਸਪਤਾਲ ‘ਚ ਭਰਤੀ ਕਰਵਾਇਆ ਗਿਆ।ਦੱਸ ਦਈਏ ਕਿ ਪੁਲਿਸ ਨੂੰ ਘਟਨਾ ਥਾਂ ‘ਤੇ ਕੋਈ ਸੁਸਾਇਡ ਨੋਟ ਨਹੀਂ ਮਿਲਿਆ, ਇਸ ਨੂੰ ਲੋਕ ਦਿੱਲੀ ਦੇ ਬੁਰਾੜੀ ਕਾਂਡ ਤੋਂ ਜੋੜ ਕੇ ਵੇਖ ਰਹੇ ਹਨ। ਦੂਜੇ ਪਾਸੇ ਪੁਲਿਸ ਵਲੋਂ ਮਾਮਲੇ ਦੀ ਜਾਂਚ ਜਾਰੀ ਹੈ।
ਪੁਲਿਸ ਦੇ ਮੁਤਾਬਕ ਛੱਤੀਸਗੜ੍ਹ ਨਿਵਾਸੀ 25 ਸਾਲ ਦਾ ਸੰਨੂ ਭੂਰਿਆ ਪਰਵਾਰ ਦੇ ਨਾਲ ਕਿਰਾਏ ਦੇ ਮਕਾਨ ‘ਚ ਰਹਿੰਦਾ ਹੈ। ਉਸਦਾ ਘਰ ਪਿਛਲੇ ਦੋ ਦਿਨ ਤੋਂ ਬੰਦ ਸੀ। ਨੇੜੇ-ਤੇੜੇ ਦੇ ਲੋਕਾਂ ਨੂੰ ਸ਼ੱਕ ਹੋਇਆ ਤਾਂ ਉਨ੍ਹਾਂ ਨੇ ਦਰਵਜਾ ਖੜਕਾਇਆ, ਪਰ ਕਿਸੇ ਨੇ ਜਵਾਬ ਨਹੀਂ ਦਿਤਾ। ਜਿਸ ਤੋਂ ਬਾਅਦ ਪੁਲਿਸ ਨੂੰ ਸੂਚਨਾ ਦਿੱਤੀ ਗਈ । ਮੌਕੇ ‘ਤੇ ਪਹੁੰਚ ਕੇ ਪੁਲਿਸ ਨੇ ਦਰਵਾਜਾ ਤੋੜਿਆ। ਉਨ੍ਹਾਂ ਨੇ ਵੇਖਿਆ ਕਿ 4 ਲੋਕਾਂ ਦੀ ਮੌਤ ਹੋ ਗਈ ਹੈ ਜਦੋਂ ਕਿ 25 ਸਾਲ ਦਾ ਸੰਨੂ ਦੀ ਸਾਂਸੇ ਚੱਲ ਰਹੀ ਹੈ।
ਉਸ ਨੂੰ ਤੁਰਤ ਮੰਡੀਦੀਪ ਹਸਪਤਾਲ ‘ਚ ਭਰਤੀ ਕਰਵਾਇਆ ਗਿਆ। ਇੱਥੋਂ ਉਸਨੂੰ ਹਮੀਦਿਆ ਹਸਪਤਾਲ ਰੈਫਰ ਕਰ ਦਿਤਾ ਗਿਆ। ਜਾਣਕਾਰੀ ਮੁਤਾਬਕ ਸੰਨੂ ਭੂਰਿਆ ਪਰਵਾਰ ਦੇ ਨਾਲ ਕਿਰਾਏ ਦੇ ਮਕਾਨ ‘ਚ ਰਹਿੰਦਾ ਹੈ। ਉਹ ਇੱਕ ਨਿਜੀ ਕੰਪਨੀ ‘ਚ ਕੰਮ ਕਰਦਾ ਹੈ। ਹਾਲਤ ਨਾਜੁਕ ਹੋਣ ਦੇ ਕਾਰਨ ਉਹ ਗੱਲ ਨਹੀਂ ਕਰ ਪਾ ਰਿਹਾ ਹੈ। ਪੁਲਿਸ ਨੇ ਉਸ ਦੇ ਘਰ ਤੋਂ ਉਸਦੀ ਪਤਨੀ ਪੂਰਨਮਾਸ਼ੀ, 12 ਦਿਨ ਦੀ ਬੱਚੀ ਤੋਂ ਇਲਾਵਾ ਦੀਪਲਤਾ ਅਤੇ ਅਕਾਸ਼ ਦੀ ਲਾਸ਼ ਬਰਾਮਦ ਕੀਤੀ ਹੈ।
ਦੱਸ ਦਈਏ ਕਿ ਸ਼ੁਰੂਆਤੀ ਜਾਂਚ ਦੇ ਆਧਾਰ ‘ਤੇ ਇਹ ਕਿਹਾ ਜਾ ਰਿਹਾ ਹੈ ਕਿ ਚਾਰਾਂ ਲੋਕਾਂ ਦੀ ਮੌਤ ਸਿਗੜੀ ਦੇ ਕਾਰਨ ਹੋਈ। ਠੰਡ ਕਾਰਨ ਪਰਵਾਰ ਰਾਤ ‘ਚ ਸਿਗੜੀ ਜਲਾ ਕੇ ਸੋ ਗਿਆ ਸੀ ਅਤੇ ਦਮ ਘੁੱਟਣ ਕਾਰਨ ਚਾਰਾਂ ਲੋਕਾਂ ਦੀ ਮੌਤ ਹੋ ਗਈ , ਪਰ ਕਿਹਾ ਇਹ ਵੀ ਜਾ ਰਿਹਾ ਹੈ ਕਿ ਜੇਕਰ ਸਾਰੇ ਘਰ ਵਾਲਿਆਂ ‘ਤੇ ਸਿਗੜੀ ਦਾ ਅਸਰ ਹੋਇਆ ਤਾਂ ਸੰਨੂ ਨੂੰ ਕੋਈ ਫਰਕ ਕਿਉਂ ਨਹੀਂ ਪਿਆ। ਫਿਲਹਾਲ ਪੁਲਿਸ ਵਲੋਂ ਇਸ ਮਾਮਲੇ ਦੀ ਗੰਭੀਰਤਾ ਨਾਲ ਜਾਂਚ ਕੀਤੀ ਜਾ ਰਹੀ ਹੈ।