ਮੁੱਖ ਖਬਰਾਂ
Home / ਦੇਸ਼ ਵਿਦੇਸ਼ (page 10)

ਦੇਸ਼ ਵਿਦੇਸ਼

ਮੈਨੀਟੋਬਾ ‘ਸਿੱਖ ਵਿਰਾਸਤ ਮਹੀਨੇ’ ਵਜੋਂ ਮਨਾਇਆ ਜਾਵੇਗਾ ਅਪਰੈਲ

ਵਿਨੀਪੈੱਗ-ਕੈਨੇਡਾ ਦੇ ਮੈਨੀਟੋਬਾ ਸੂਬੇ ਦੇ ਸਿੱਖਾਂ ਨੂੰ ਇਹ ਮਾਣ ਹਾਸਲ ਹੋਇਆ ਹੈ ਕਿ ਇੱਥੇ ਅਪਰੈਲ ਮਹੀਨੇ ਨੂੰ ‘ਸਿੱਖ ਵਿਰਾਸਤ ਮਹੀਨੇ‘ (ਸਿੱਖ ਹੈਰੀਟੇਜ ਮੰਥ) ਵਜੋਂ ਮਨਾਇਆ ਜਾਵੇਗਾ। ਇਸ ਸਾਲ ਅਪਰੈਲ ਦੇ ਮਹੀਨੇ ਵਿਚ ਸਿੱਖੀ ਨੂੰ ਸਮਰਪਿਤ ਸਮਾਗਮ ਵੱਡੇ ਪੱਧਰ ’ਤੇ ਕਰਵਾਏ ਜਾਣਗੇ ਅਤੇ ਲੋਕਾਂ ਨੂੰ ਸਿੱਖ ਇਤਿਹਾਸ ਬਾਰੇ ਜਾਣਕਾਰੀ ਦਿੱਤੀ ਜਾਵੇਗੀ। ਇਸ ਦੌਰਾਨ ਸਿੱਖਾਂ ਦੇ ਮਹਾਨ ਯੋਧਿਆਂ ਅਤੇ ਸੂਰਮਿਆਂ ਬਾਰੇ ਵੀ ਜਾਣੂ ਕਰਵਾਇਆ ਜਾਵੇਗਾ। ਸਿੱਖ ਵਿਰਾਸਤ ਮਹੀਨੇ ਦੀ ਸ਼ੁਰੂਆਤ ਦੇ ਉਦਘਾਟਨੀ ਸਮਾਗਮ ਵਿਚ ਲੈਜਿਸਲੇਟਿਵ ਬਿਲਡਿੰਗ ਵਿਚ ਅਰਦਾਸ ਤੋਂ ਸ਼ੁਰੂ ਕੀਤੀ ਗਈ। ਇਸ ਵਿਚ ਸਿੱਖ ਇਤਿਹਾਸ ਬਾਰੇ ਜਾਣਕਾਰੀ ਦਿੱਤੀ ਗਈ ਤੇ ਇਸ ਮਹੀਨੇ ਵਿਚ ਕਰਵਾਉਣ ਵਾਲੇ ਪ੍ਰੋਗਰਾਮਾਂ ਦਾ ਵੇਰਵਾ ਦਿੱਤਾ ਗਿਆ।
‘ਮੈਨੀਟੋਬਾ ਸਿੱਖ ਹੈਰੀਟੇਜ ਮੰਥ’ ਸੰਸਥਾ ਦੇ ਵਾਲੰਟੀਅਰਾਂ ਨੇ ਜਾਣਕਾਰੀ ਦਿੰਦੇ ਹੋਏ ਦੱਸਿਆ ਕਿ ਇਨ੍ਹਾਂ ਪ੍ਰੋਗਰਾਮਾਂ ਤਹਿਤ 6 ਅਪਰੈਲ ਨੂੰ ਕੈਨੇਡੀਅਨ ਹਿਊਮਨ ਰਾਈਟਸ ਮਿਊਜ਼ੀਅਮ ਵਿਚ ਸਿੱਖ ਗੁਰੂਆਂ ਬਾਰੇ ਜਾਣਕਾਰੀ ਦਿੱਤੀ ਜਾਵੇਗੀ। 12 ਅਪਰੈਲ ਨੂੰ ਸਿਟੀ ਹਾਲ ਵਿਚ ‘ਨਿਸ਼ਾਨ ਸਾਹਿਬ’ ਝੁਲਾਉਣ ਦੀ ਰਸਮ ਅਦਾ ਕੀਤੀ ਜਾਵੇਗੀ। 12 ਅਪਰੈਲ ਨੂੰ ਸਿਲੋਮਨ ਮਿਸ਼ਨ ਵਿਚ ਬੇਘਰੇ ਲੇਕਾਂ ਨੂੰ ਲੰਗਰ ਛਕਾਇਆ ਜਾਵੇਗਾ। 18 ਅਪਰੈਲ ਨੂੰ ਪੋਲੋ ਪਾਰਕ ਦੇ ਥੀਏਟਰ ਵਿਚ ‘ਟਾਈਗਰ’ ਨਾਮੀ ਫ਼ਿਲਮ ਦਿਖਾਈ ਜਾਵੇਗੀ ਤੇ 27 ਅਪਰੈਲ ਨੂੰ ਸਿੱਖਾਂ ਦੀਆਂ ਮੁਸ਼ਕਲਾਂ ’ਤੇ ਵਿਚਾਰ ਚਰਚਾ ਕੀਤੀ ਜਾਵੇਗੀ। ਇਸ ਮੌਕੇ ਮੈਨੀਟੋਬਾ ਦੀ ਮੰਤਰੀ ਕੈਥੀ ਕੌਕਸ ਨੇ ਮੁੱਖ ਮੰਤਰੀ ਬ੍ਰਾਈਅਨ ਪੈਲਿਸਟਰ ਦਾ ਸੁਨੇਹਾ ਪੜ੍ਹਿਆ ਤੇ ਸ਼ੁੱਭਕਾਮਨਾਵਾਂ ਦਿੱਤੀਆਂ। ਇਸ ਮੌਕੇ ਵਿਰੋਧੀ ਧਿਰ ਦੇ ਆਗੂ ਵੈੱਬ ਕੇ ਨਵ ਨੇ ਦੱਸਿਆ ਕਿ ਉਨ੍ਹਾਂ ਨੇ ‘228’ ਨਾਮੀ ਬਿਲ ਅਸੈਂਬਲੀ ਵਿਚ ਲਿਆਂਦਾ ਹੈ। ਇਸ ਨਾਲ ਅਪਰੈਲ ਮਹੀਨੇ ਨੂੰ ‘ਸਿੱਖ ਵਿਰਾਸਤ ਮਹੀਨੇ’ ਵਜੋਂ ਜਾਣਿਆ ਜਾਵੇਗਾ। ਇਸ ਮੌਕੇ ਮੈਨੀਟੋਬਾ ਦੀਆਂ ਪ੍ਰਮੁੱਖ ਸਿੱਖ ਸ਼ਖ਼ਸੀਅਤਾਂ ਸ਼ਾਮਲ ਸਨ।

ਮੋਦੀ ਦੇ ‘ਮਿਸ਼ਨ ਸ਼ਕਤੀ’ ਨੇ ਪਾਇਆ ਪੁਲਾੜ ‘ਚ ਪੁਆੜਾ, ਨਾਸਾ ਦਾ ਦਾਅਵਾ, ਬਲਾਸਟ ਭਾਰਤੀ ਸੈਟੇਲਾਈਟ ਦੇ ਹੋਏ 400 ਟੁਕੜੇ

ਨਵੀਂ ਦਿੱਲੀ-ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ‘ਮਿਸ਼ਨ ਸ਼ਕਤੀ’ ਨੇ ਦੁਨੀਆ ਭਰ ਦੇ ਵਿਗਿਆਨੀਆਂ ਨੂੰ ਫਿਕਰਾਂ ਵਿੱਚ ਪਾ ਦਿੱਤਾ ਹੈ। ਅਮਰੀਕੀ ਪੁਲਾੜ ਏਜੰਸੀ ਨਾਸਾ ਨੇ ਕਿਹਾ ਹੈ ਕਿ ਭਾਰਤੀ ਸੈਟੇਲਾਈਟ ਦੇ ਖ਼ਤਮ ਹੋ ਜਾਣ ਨਾਲ ਪੁਲਾੜ ‘ਚ 400 ਟੁਕੜੇ ਹੋਏ ਹਨ। ਇਹ ਪੁਲਾੜ ‘ਚ ਚੱਕਰ ਕੱਟ ਰਹੇ ਹਨ।
ਇਸ ਨਾਲ ਆਈਐਸਐਸ ਤੇ ਉਸ ‘ਚ ਰਹਿਣ ਵਾਲੇ ਪੁਲਾੜ ਯਾਤਰੀਆਂ ਨੂੰ ਖ਼ਤਰਾ ਹੋ ਸਕਦਾ ਹੈ। ਇਸਰੋ ਨੇ 27 ਮਾਰਚ ਨੂੰ ਐਂਟੀ-ਸੈਟੇਲਾਈਟ ਮਿਸਾਈਲ ਦਾ ਟੈਸਟ ਕੀਤਾ ਸੀ ਜਿਸ ਨੂੰ ਹੇਠਲੀ ਕਲਾਸ ‘ਚ ਲਾਈਵ ਸੈਟੇਲਾਈਟ ਨੂੰ ਨਸ਼ਟ ਕਰਨ ‘ਚ ਕਾਮਯਾਬੀ ਮਿਲੀ ਸੀ।
ਨਾਸਾ ਮੁਖੀ ਜਿਮ ਬ੍ਰਾਈਡਨ ਸਟਾਈਨ ਆਪਣੇ ਕਰਮਚਾਰੀਆਂ ਨੂੰ ਸੰਬੋਧਨ ਕਰ ਰਹੇ ਸੀ। ਇਸ ‘ਚ ਉਨ੍ਹਾਂ ਕਿਹਾ, “ਅਸੀਂ ਭਾਰਤੀ ਸੈਟੇਲਾਈਟ ਨੂੰ ਟ੍ਰੈਕ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਹਾਂ ਪਰ ਹੁਣ ਤਕ ਅਸੀਂ 10 ਸੈਮੀ ਜਾਂ ਉਸ ਤੋਂ ਵੱਡੇ 60 ਟੁਕੜਿਆਂ ਨੂੰ ਟ੍ਰੈਕ ਕੀਤਾ ਹੈ।”
ਬ੍ਰਾਈਡਨ ਸਟਾਈਨ ਮੁਤਾਬਕ, ’24 ਟੁਕੜੇ ਆਈਐਸਐਸ ਕੋਲ ਚੱਕਰ ਕੱਟ ਰਹੇ ਹਨ ਜੋ ਖ਼ਤਰਨਾਕ ਸਾਬਤ ਹੋ ਸਕਦੇ ਹਨ। ਸੈਟੇਲਾਈਟ ਨਸ਼ਟ ਕਰਨ ਤੋਂ ਬਾਅਦ ਮਲਬਾ ਆਈਐਸਐਸ ਉੱਤੇ ਪਹੁੰਚ ਗਿਆ ਹੈ। ਸਾਨੂੰ ਇਹ ਮਨਜ਼ੂਰ ਨਹੀਂ। ਨਾਸਾ ਦਾ ਰੁਖ ਇਸ ਮਾਮਲੇ ‘ਚ ਕਾਫੀ ਸਾਫ਼ ਹੈ।”
ਨਾਸਾ ਮੁਖੀ ਨੇ ਕਿਹਾ ਕਿ ਆਈਐਸਐਸ ਦੇ ਟੁਕੜਿਆਂ ਦੇ ਟਕਰਾਉਣ ਦਾ ਖ਼ਤਰਾ 44% ਤਕ ਵਧ ਚੁੱਕਿਆ ਹੈ। ਬੇਸ਼ੱਕ ਇਹ ਖ਼ਤਰਾ ਕੁਝ ਸਮੇਂ ਬਾਅਦ ਘੱਟ ਹੋ ਜਾਵੇਗਾ ਕਿਉਂਕਿ ਵਾਯੂਮੰਡਲ ‘ਚ ਪਹੁੰਚਣ ਨਾਲ ਮਲਬਾ ਸੜ੍ਹ ਜਾਵੇਗਾ।

ਭਾਰਤ ਤੇ ਚਿੱਲੀ ਅਤਿਵਾਦ ਦੇ ਖ਼ਾਤਮੇ ਲਈ ਆਲਮੀ ਭਾਗੀਦਾਰੀ ’ਤੇ ਸਹਿਮਤ

ਸਾਂਤਿਆਗੋ-ਭਾਰਤ ਅਤੇ ਚਿੱਲੀ ਅਤਿਵਾਦ ਦੇ ਖ਼ਾਤਮੇ ਲਈ ਆਲਮੀ ਭਾਗੀਦਾਰੀ ਨੂੰ ਮਜ਼ਬੂਤ ਕਰਨ ’ਤੇ ਸਹਿਮਤ ਹੋਏ ਹਨ। ਰਾਸ਼ਟਰਪਤੀ ਰਾਮ ਨਾਥ ਕੋਵਿੰਦ ਨੇ ਚਿੱਲੀ ਵਿਚ ਆਪਣੇ ਹਮਰੁਤਬਾ ਨਾਲ ਰੱਖਿਆ ਖੇਤਰ ਵਿਚ ਸਹਿਯੋਗ ਸਮੇਤ ਆਪਸੀ ਹਿੱਤ ਦੇ ਵੱਖ-ਵੱਖ ਮੁੱਦਿਆਂ ’ਤੇ ਚਰਚਾ ਕੀਤੀ। ਰਾਸ਼ਟਰਪਤੀ ਦੇ ਇਸ ਦੌਰੇ ਦੌਰਾਨ ਦੋਵਾਂ ਦੇਸ਼ਾਂ ਵਿਚਾਲੇ ਖਣਨ, ਸਭਿਆਚਾਰ ਅਤੇ ਦਿਵਿਆਂਗਤਾ ਦੇ ਖੇਤਰ ਵਿਚ ਤਿੰਨ ਸਮਝੌਤਿਆਂ ’ਤੇ ਦਸਤਖ਼ਤ ਕੀਤੇ ਗਏ। ਰਾਸ਼ਟਰਪਤੀ ਬੋਲੀਵੀਆ ਅਤੇ ਕ੍ਰੋਏਸ਼ੀਆ ਦੇ ਦੌਰੇ ਤੋਂ ਬਾਅਦ ਤਿੰਨ ਦੇਸ਼ਾਂ ਦੇ ਦੌਰੇ ਦੇ ਆਖਰੀ ਪੜਾਅ ’ਤੇ ਐਤਵਾਰ ਨੂੰ ਇੱਥੇ ਪੁੱਜੇ ਸਨ।
ਵਿਦੇਸ਼ ਮੰਤਰਾਲੇ ਦੇ ਤਰਜਮਾਨ ਰਵੀਸ਼ ਕੁਮਾਰ ਨੇ ਟਵੀਟ ਕੀਤਾ ਕਿ ਰਾਸ਼ਟਰਪਤੀ ਕੋਵਿੰਦ ਨੇ ਚਿੱਲੀ ਵਿਚ ਆਪਣੇ ਹਮਰੁਤਬਾ ਸਬੈਸਟੀਅਨ ਪਿਨੇਰਾ ਨਾਲ ਸੋਮਵਾਰ ਨੂੰ ਆਪਸੀ ਹਿੱਤਾਂ ਦੇ ਵੱਖ-ਵੱਖ ਮੁੱਦਿਆਂ ’ਤੇ ਚਰਚਾ ਕੀਤੀ ਸੀ। ਕੋਵਿੰਦ ਨੇ ਜੰਮੂ ਕਸ਼ਮੀਰ ਦੇ ਪੁਲਵਾਮਾ ਵਿਚ ਪਾਕਿਸਤਾਨ ਦੇ ਅਤਿਵਾਦੀ ਸੰਗਠਨ ਜੈਸ਼-ਏ-ਮੁਹੰਮਦ ਵਲੋਂ ਕੀਤੇ ਗਏ ਦਹਿਸ਼ਤੀ ਹਮਲੇ ਦੀ ਕਰੜੀ ਨਿੰਦਾ ਕਰਨ ਲਈ ਪਿਨੇਰਾ ਦਾ ਧੰਨਵਾਦ ਕੀਤਾ। ਰਾਸ਼ਟਰਪਤੀ ਨੇ ਕਿਹਾ ਕਿ ਅਤਿਵਾਦ ਨੂੰ ਠੱਲ੍ਹਣ ਅਤੇ ਉਸ ਦਾ ਖ਼ਾਤਮਾ ਕਰਨ ਲਈ ਆਲਮੀ ਭਾਗੀਦਾਰੀ ਨੂੰ ਮਜ਼ਬੂਤ ਕਰਨ ਲਈ ਭਾਰਤ ਅਤੇ ਚਿੱਲੀ ਮਿਲ ਕੇ ਕੰਮ ਕਰਨ ਲਈ ਸਹਿਮਤ ਹੋਏ ਹਨ। ਇੱਕ ਸਾਂਝੇ ਬਿਆਨ ਰਾਹੀਂ ਉਨ੍ਹਾਂ ਸਾਰੇ ਮੁਲਕਾਂ ਨੂੰ ਦਹਿਸ਼ਤਗਰਦਾਂ ਦੇ ਸੁਰੱਖਿਅਤ ਟਿਕਾਣਿਆਂ ਅਤੇ ਬੁਨਿਆਦੀ ਢਾਂਚੇ ਨੂੰ ਨਸ਼ਟ ਕਰਨ ਅਤੇ ਅਤਿਵਾਦੀਆਂ ਦੇ ਨੈੱਟਵਰਕ ਨੂੰ ਤੋੜਨ ਦੀ ਦਿਸ਼ਾ ਵਿੱਚ ਕੰਮ ਕਰਨ ਦਾ ਸੱਦਾ ਦਿੱਤਾ। ਉਨ੍ਹਾਂ ਅਤਿਵਾਦ ਦਾ ਮੁਕਾਬਲਾ ਕਰਨ ਲਈ ਮਜ਼ਬੂਤ ਕੌਮਾਂਤਰੀ ਸਾਂਝੇਦਾਰੀ ਦੀ ਲੋੜ ’ਤੇ ਜ਼ੋਰ ਦਿੱਤਾ। ਦੋਵੇਂ ਮੁਲਕ ਰੱਖਿਆ ਖੇਤਰ ਵਿਚ ਸਹਿਯੋਗ ਦੇ ਮੌਕੇ ਤਲਾਸ਼ਣ ’ਤੇ ਵੀ ਸਹਿਮਤ ਹੋਏ।
ਰਾਸ਼ਟਰਪਤੀ ਨੇ ‘ਮੇਕ ਇਨ ਇੰਡੀਆ’, ‘ਸਮਾਰਟ ਸਿਟੀਜ਼’ ਅਤੇ ‘ਡਿਜੀਟਲ ਇੰਡੀਆ’ ਪ੍ਰੋਗਰਮਾਾਂ ਤਹਿਤ ਭਾਰਤੀ ਖਣਨ, ਬੁਨਿਆਦੀ ਢਾਂਚੇ, ਰੱਖਿਆ ਅਤੇ ਫੂਡ ਪ੍ਰੋਸੈਸਿੰਗ ਦੇ ਖੇਤਰਾਂ ਵਿਖ ਨਿਵੇਸ਼ ਕਰਨ ਲਈ ਚਿੱਲੀ ਦੀਆਂ ਕੰਪਨੀਆਂ ਨੂੰ ਸੱਦਾ ਦਿੱਤਾ। ਉਨ੍ਹਾ ਕਿਹਾ ਕਿ ਭਾਰਤ ਦੁਨੀਆਂ ਭਰ ਵਿਚ ਸੂਰਜੀ ਊਰਜਾ ਨੂੰ ਹੱਲਾਸ਼ੇਰੀ ਦੇਣ ਅਤੇ ਵਾਤਾਵਰਨ ਤਬਦੀਲੀ ਨਾਲ ਨਜਿੱਠਣ ਲਈ ਆਲਮੀ ਭਾਗੀਦਾਰੀ ਵਧਾਉਣ ਲਈ ਚਿਲੀ ਨਾਲ ਕੰਮ ਕਰਨ ਦਾ ਇਛੁਕ ਹੈ।

ਪਾਕਿ ’ਚ ਨਾਬਾਲਗ ਨੌਕਰਾਣੀ ਦੀ ਹੱਤਿਆ ਦਾ ਮਾਮਲਾ ਭਖਿਆ

ਲਾਹੌਰ-ਪਾਕਿਸਤਾਨ ਵਿੱਚ ਘਰੇਲੂ ਨੌਕਰਾਂ ਵਿਸ਼ੇਸ਼ ਤੌਰ ’ਤੇ ਬੱਚਿਆਂ ’ਤੇ ਤਸ਼ੱਦਦ ਦਾ ਤਾਜ਼ਾ ਮਾਮਲਾ ਸਾਹਮਣੇ ਆਇਆ ਹੈ। 16 ਵਰ੍ਹਿਆਂ ਦੀ ਨੌਕਰਾਣੀ ਓਜ਼ਮਾ ਬੀਬੀ ਦੀ ਗਲੀ-ਸੜੀ ਲਾਸ਼ ਨਹਿਰ ਵਿਚੋਂ ਮਿਲਣ ਮਗਰੋਂ ਉਸਦੇ ਅਮੀਰ ਮਾਲਕ ਖ਼ਿਲਾਫ਼ ਕਤਲ ਦੇ ਦੋਸ਼ ਲੱਗੇ ਹਨ। ਪੁਲੀਸ ਦਾ ਕਹਿਣਾ ਹੈ ਕਿ ਓਜ਼ਮਾ ਦੀ ਮੌਤ ਸਿਰ ਵਿੱਚ ਰਸੋਈ ਦਾ ਕੋਈ ਬਰਤਨ ਵੱਜਣ ਨਾਲ ਹੋਈ ਹੈ। ਉਹ ਪਿਛਲੇ ਅੱਠ ਮਹੀਨਿਆਂ ਤੋਂ ਲਾਹੌਰ ਵਿੱਚ ਇੱਕ ਪਰਿਵਾਰ ਦੇ ਘਰ ਕੰਮ ਕਰਦੀ ਸੀ ਅਤੇ ਇਸ ਵਰ੍ਹੇ ਜਨਵਰੀ ਵਿੱਚ ਉਸਦੀ ਹੱਤਿਆ ਕਰ ਦਿੱਤੀ ਗਈ। ਉਸ ਦਾ ਮਾਲਕ ਅਤੇ ਦੋ ਹੋਰ ਔਰਤਾਂ ਪੁਲੀਸ ਹਿਰਾਸਤ ਵਿਚ ਹਨ। ਪੁਲੀਸ ਵਲੋਂ ਓਜ਼ਮਾ ਦੇ ਕਤਲ ਤੇ ਤਸ਼ੱਦਦ ਸਬੰਧੀ ਲੱਗੇ ਦੋਸ਼ਾਂ ਦੀ ਜਾਂਚ ਕੀਤੀ ਜਾ ਰਹੀ ਹੈ।
ਧੀ ਦੀ ਮੌਤ ਕਾਰਨ ਹਤਾਸ਼ ਹੋਏ ਓਜ਼ਮਾ ਦੇ ਪਿਤਾ ਮੁਹੰਮਦ ਰਿਆਜ਼ ਦਾ ਕਹਿਣਾ ਹੈ, ‘‘ਮੈਂ ਹਾਰ ਨਹੀਂ ਮੰਨਾਂਗਾ, ਮੈਂ ਮੌਤ ਨੂੰ ਤਰਜੀਹ ਦੇਵਾਂਗਾ ਪਰ ਦੋਸ਼ੀਆਂ ਨੂੰ ਬਖ਼ਸ਼ਾਂਗਾ ਨਹੀਂ। ਮੈਂ ਉਨ੍ਹਾਂ ਨੂੰ ਆਪਣੇ ਕੀਤੇ ਦੀ ਸਜ਼ਾ ਭੁਗਤਦਿਆਂ ਦੇਖਣਾ ਚਾਹੁੰਦਾ ਹਾਂ। ’’
ਓਜ਼ਮਾ ਬੀਬੀ ਦੀ ਤਨਖਾਹ ਕੇਵਲ ਚਾਰ ਹਜ਼ਾਰ ਰੁਪਏ ਮਹੀਨਾ ਸੀ। ਵਿਸ਼ਵ ਲੇਬਰ ਸੰਸਥਾ ਦੇ ਅੰਕੜਿਆਂ ਅਨੁਸਾਰ ਪਾਕਿਸਤਾਨ ਵਿੱਚ ਕੁੱਲ 8.5 ਮਿਲੀਅਨ ਘਰੇਲੂ ਨੌਕਰ ਹਨ, ਜਿਨ੍ਹਾਂ ਵਿੱਚ ਬਹੁਤੇ ਬੱਚੇ ਸ਼ਾਮਲ ਹਨ। ਇਹ ਨੌਕਰ ਅਮੀਰ ਪਰਿਵਾਰਾਂ ਦੇ ਘਰਾਂ ਵਿਚ ਕੰਮ ਕਰਦੇ ਹਨ। ਦੱਸਣਯੋਗ ਹੈ ਕਿ ਓਜ਼ਮਾ ਦੇ ਕਤਲ ਦੇ ਵੇਰਵਿਆਂ ਦਾ ਮਸ਼ਹੂੁਰ ਟੀਵੀ ਸ਼ੋਅ ਦੌਰਾਨ ਸੰਚਾਲਕ ਮੁਕੱਰਮ ਕਲੀਮ ਨੇ ਖ਼ੁਲਾਸਾ ਕੀਤਾ ਸੀ। ਉਨ੍ਹਾਂ ਓਜ਼ਮਾ ਲਈ ਇਨਸਾਫ ਦੀ ਮੰਗ ਵੀ ਕੀਤੀ ਸੀ।

ਕਿਰਪਾਨ ਪਹਿਨੀ ਰੱਖਣ ‘ਤੇ ਸਿੱਖ ਜੋੜੇ ‘ਤੇ ਕੇਸ ਦਰਜ

ਵੀਨਸ-ਇਟਲੀ ਦੀ ਵਿਚੈਂਸਾ ਪੁਲਿਸ ਨੇ ਇੱਥੋਂ ਦੇ ਇੱਕ ਸਿੱਖ ਜੋੜੇ ‘ਤੇ ਕਿਰਪਾਨ ਪਹਿਨੀ ਰੱਖਣ ‘ਤੇ ਕੇਸ ਦਰਜ ਕਰ ਦਿੱਤਾ ਹੈ। ਇਹ ਅਮ੍ਰਿਤਧਾਰੀ ਸਿੱਖ ਜੋੜਾ ਪਿਛਲੇ ਕੁਝ ਸਾਲਾਂ ਤੋਂ ਹਮੇਸ਼ਾ ਕਿਰਪਾਨ ਪਹਿਨ ਕੇ ਰਖਦਾ ਸੀ। ਜਾਣਕਾਰੀ ਅਨੁਸਾਰ ਵਿਚੈਂਸਾ ਜ਼ਿਲ੍ਹੇ ਦੇ ਮਤੋਰਸੋ ਵਿਚਨਤੇਨਾ ਕਸਬੇ ਦੇ ਵਸਨੀਕ ਸਤਨਾਮ ਸਿੰਘ ਮੁਲਤਾਨੀ ਜਦੋਂ ਅਪਣੀ ਪਤਨੀ ਸਿਮਰਜੀਤ ਕੌਰ ਮੁਲਤਾਨੀ ਨੂੰ ਇਲਾਜ ਲਈ ਇਟਲੀ ਦੇ ਵਿਚੈਂਸਾ ਸਥਿਤ ਹਸਪਤਾਲ ਦੇ ਐਮਰਜੈਂਸੀ ਵਿਭਾਗ ਵਿਚ ਲੈ ਕੇ ਗਏ ਤਾਂ ਡਾਕਟਰਾਂ ਨੇ Îਇਲਾਜ ਦੌਰਾਨ ਸਿਮਰਜੀਤ ਕੌਰ ਦੇ ਕਿਰਪਾਨ ਪਹਿਨੀ ਦੇਖ ਕੇ ਤੁਰੰਤ ਪੁਲਿਸ ਨੂੰ ਫੋਨ ਕਰ ਦਿੱਤਾ। ਪੁਲਿਸ ਨੇ ਹਸਪਤਾਲ ਪਹੁੰਚ ਕੇ ਅਮ੍ਰਿਤਧਾਰੀ ਜੋੜੇ ਨੂੰ ਕਿਰਪਾਨਾਂ ਉਤਾਰਨ ਲਈ ਕਿਹਾ ਅਤੇ ਕਿਹਾ ਕਿ ਇਟਾਲੀਅਨ ਕਾਨੂੰਨ ਦੇ ਮੁਤਾਬਕ ਤੁਸੀਂ ਇਟਲੀ ਵਿਚ ਜਨਤਕ ਥਾਵਾਂ ‘ਤੇ ਕਿਰਪਾਨ ਪਾ ਕੇ ਨਹੀਂ ਚਲ ਸਕਦੇ। ਇਸੇ ਦੌਰਾਨ ਪੁਲਿਸ ਨੇ ਉਕਤ ਜੋੜੇ ਖ਼ਿਲਾਫ਼ ਕੇਸ ਵੀ ਦਰਜ ਕਰ ਲਿਆ। ਭਾਵੇਂ ਕਿ ਸ. ਸਤਨਾਮ ਸਿੰਘ ਨੇ ਇਟਾਲੀਅਨ ਪੁਲਿਸ ਨੂੰ ਸਿੱਖ ਧਰਮ ਵਿਚ ਕਿਰਪਾਨ ਦੀ ਮਹੱਤਤਾ ਬਾਰੇ ਸਮਝਾਉਣ ਦੀ ਕੋਸ਼ਿਸ਼ ਕੀਤੀ ਪ੍ਰੰਤੂ ਇਟਾਲੀਅਨ ਪੁਲਿਸ ਨੇ ਕਿਹਾ ਕਿ ਜਨਤਕ ਸੁਰੱਖਿਆ ਦੇ ਮੱਦੇਨਜ਼ਰ ਕੋਈ ਵੀ ਵਿਅਕਤੀ ਹਥਿਆਰ ਜਾਂ ਤੇਜ਼ਧਾਰ ਚਾਕੂ ਜਾਂ ਕਿਰਪਾਨ ਲੈ ਕੇ ਨਹੀਂ ਚਲ ਸਕਦਾ, ਚਾਹੇ ਉਹ ਧਾਰਮਿਕ ਚਿੰਨ੍ਹ ਹੀ ਕਿਉਂ ਨਾ ਹੋਵੇ। ਉਧਰ ਇਸ ਘਟਨਾ ਨੂੰ ਲੈ ਕੇ ਸਮੁੱਚੇ ਸਿੱਖ ਭਾਈਚਾਰੇ ਵਿਚ ਰੋਸ ਦੀ ਲਹਿਰ ਦੌੜ ਗਈ ਅਤੇ ਇਸ ਸਬੰਧ ਵਿਚ ਗੁਰਦੁਆਰਾ ਸ੍ਰੀ ਗੁਰੂ ਰਾਮਦਾਸ ਨਿਵਾਸ ਕਿਆਂਪੋ (ਵਿਚੈਂਸਾ) ਦੇ ਮੁੱਖ ਪ੍ਰਬੰਧਕ ਭਾਈ ਅਵਤਾਰ ਸਿੰਘ ਮਿਆਣੀ ਅਤੇ ਜਨਰਲ ਸਕੱਤਰ ਭਾਈ ਬਲਜੀਤ ਸਿੰਘ ਨੇ ਵਿਚੈਂਸਾ ਦੇ ਮੁੱਖ ਪੁਲਿਸ ਅਧਿਕਾਰੀ ਨਾਲ ਮੁਲਾਕਾਤ ਕਰਕੇ ਇਸ ਕੇਸ ਵਿਚ ਰਾਹਤ ਦੇਣ ਲਈ ਅਪੀਲ ਵੀ ਕੀਤੀ।

ਡੌਨ ਦਾਊਦ ਦੀ ਭੈਣ ਦਾ ਫਲੈਟ 1.80 ਕੋਰੜ ‘ਚ ਨਿਲਾਮ

ਮੁੰਬਈ-ਅੰਡਰਵਰਲਡ ਡੌਨ ਡਾਊਦ ਇਬਰਾਹਮ ਦੀ ਭੈਣ ਹਸੀਨਾ ਪਾਰਕਰ ਦਾ ਮੁੰਬਈ ਸਥਿਤ ਫਲੈਟ ਨਿਲਾਮੀ ‘ਚ ਵਿੱਕ ਗਿਆ। ਨਾਗਪਾੜਾ ਦੇ ਗਾਰਡਨ ਅਪਾਰਟਮੈਂਟ ‘ਚ ਵਰਗ ਫੁੱਟ ‘ਚ ਬਣੇ ਇਸ ਫਲੈਟ ਦੀ ਬੋਲੀ ਕਾਮਯਾਬ ਰਹੀ। ਇਸ ਦੀ ਬੋਲੀ 1.80 ਕਰੋੜ ਰੁਪਏ ਲੱਗੀ। ਇਸ ਫਲੈਟ ਦੀ ਕੀਮਤ 1.69 ਕਰੋੜ ਰੁਪਏ ਲਾਈ ਗਈ ਸੀ।
ਇਸ ਫਲੈਟ ਦੀ ਨਿਲਾਮੀ ਤਸਕਰੀ ਤੇ ਵਿਦੇਸ਼ੀ ਮੁਦਰਾ ਜੋੜ-ਤੋੜ ਅਧਿਨਿਯਮ ਐਕਟ ਤਹਿਤ ਕੀਤੀ ਗਈ ਹੈ। ਇਹ ਫਲੈਟ ਕਈ ਕਾਰਨਾਂ ਕਰਕੇ ਖਾਸ ਸੀ। ਭਾਰਤ ਵਿੱਚੋਂ ਭੱਜਣ ਤੋਂ ਪਹਿਲਾਂ ਡੌਨ ਦਾਊਦ ਇੱਥੇ ਹੀ ਰਹਿੰਦਾ ਸੀ। ਉਸ ਦੀ ਭੈਣ ਵੀ ਮਰਨ ਤੋਂ ਪਹਿਲਾਂ ਇਸੇ ਫਲੈਟ ‘ਚ ਰਹਿੰਦੀ ਸੀ।
ਇਸ ਫਲੈਟ ਦਾ ਕਬਜ਼ਾ ਆਪਣੇ ਹੱਥ ਲੈਣ ਦੀ ਕੋਸ਼ਿਸ਼ ਸੀਬੀਆਈ 1997 ਤੋਂ ਕਰ ਰਹੀ ਸੀ। ਕੋਰਟ ‘ਚ ਮਾਮਲੇ ਦੀ ਸੁਣਵਾਈ ਕਾਰਨ ਸੀਬੀਆਈ ਕਾਮਯਾਬ ਨਹੀਂ ਹੋ ਸਕੀ। ਬਾਅਦ ‘ਚ ਇਹ ਮਾਮਲਾ ਸੁਪਰੀਮ ਕੋਰਟ ‘ਚ ਸੁਲਝਿਆ। ਇਸ ਤੋਂ ਬਾਅਦ SAFEMA ਐਕਟ ਤਹਿਤ ਇਸ ਫਲੈਟ ‘ਤੇ ਕਬਜ਼ਾ ਕੀਤਾ ਗਿਆ।

ਪਾਕਿਸਤਾਨ ਨੇ ਮੰÎਨਿਆ, ਭਾਰਤ ਖ਼ਿਲਾਫ਼ ਇਸਤੇਮਾਲ ਕੀਤਾ ਸੀ ਐਫ-16 ਲੜਾਕੂ ਜਹਾਜ਼

ਨਵੀਂ ਦਿੱਲੀ-ਪਾਕਿਸਤਾਨ ਨੇ ਪਹਿਲੀ ਵਾਰ ਸੰਕੇਤ ਦਿੱਤੇ ਹਨ ਕਿ 27 ਫਰਵਰੀ ਨੂੰ ਭਾਰਤੀ ਲੜਾਕੂ ਜਹਾਜ਼ਾਂ ਦੇ ਨਾਲ ਹੋਏ ਹਵਾਈ ਟਕਰਾਅ ਵਿਚ ਐਫ-16 ਜਹਾਜ਼ ਦਾ ਇਸਤੇਮਾਲ ਕੀਤਾ ਸੀ। ਹਾਲਾਂਕਿ, ਹੁਣ ਤੱਕ ਪਾਕਿਸਤਾਨ ਇਹੀ ਕਹਿੰਦਾ ਆ ਰਿਹਾ ਸੀ ਕਿ ਉਸ ਨੇ ਅਮਰੀਕੀ ਐਫ-16 ਜਹਾਜ਼ਾਂ ਦਾ ਇਸਤੇਮਾਲ ਨਹੀਂ ਕੀਤਾ।
ਪਾਕਿਸਤਾਨੀ ਸੈਨਾ ਦੇ ਬੁਲਾਰੇ ਮੇਜਰ ਜਨਰਲ ਆਸਿਫ ਗਫੂਰਫ ਨੇ ਸੋਮਵਾਰ ਨੂੰ ਐਫ-16 ਜਹਾਜ਼ ਡੇਗੇ ਜਾਣ ‘ਤੇ ਵਾਰ ਵਾਰ ਭਾਰਤੀ ਦਾਅਵੇ ਦੇ ਬਾਰੇ ਵਿਚ ਬਿਆਨ ਜਾਰੀ ਕੀਤਾ। ਗਫੂਰ ਨੇ ਕਿਹਾ, ਕੰਟਰੋਲ ਰੇਖਾ ਦੇ ਕੋਲ ਪਾਕਿਸਤਾਨੀ ਹਵਾਈ ਫ਼ੌਜ ਨੇ ਕਾਰਵਾਈ ਕੀਤੀ ਸੀ। Îਇਹ ਜੇਐਫ 17 ਵਲੋਂ ਕੀਤਾ ਗਿਆ ਸੀ।
ਹੁਣ ਇਸ ਗੱਲ ਦਾ ਕੋਈ ਮਤਲਬ ਨਹੀਂ ਹੈ ਕਿ ਜਿਸ ਨੇ ਦੋ ਭਾਰਤੀ ਲੜਾਕੂ ਜਹਾਜ਼ਾਂ ਨੂੰ ਡੇਗਿਆ, ਉਹ ਜਹਾਜ਼ ਐਫ 16 ਸੀ ਜਾਂ ਜੇਐਫ 17, ਜੇਕਰ ਅਸੀਂ ਐਫ 16 ਦਾ ਵੀ ਇਸਤੇਮਾਲ ਕੀਤਾ ਸੀ ਤਾਂ ਅਹਿਮ ਇਹ ਹੈ ਕਿ ਅਸੀਂ ਦੋ ਭਾਰਤੀ ਜਹਾਜ਼ਾਂ ਨੂੰ ਡੇਗਿਆ।
ਭਾਰਤ ਵਲੋਂ ਐਫ 16 ਦਾ ਮਲਬਾ ਦਿਖਾਏ ਜਾਣ ਦੇ ਦਾਅਵੇ ‘ਤੇ ਗਫੂਰ ਨੇ ਕਿਹਾ ਕਿ ਭਾਰਤ ਨੂੰ ਇਹ ਅਧਿਕਾਰ ਹੈ ਕਿ ਉਹ ਕਲਪਨਾ ਕਰਦਾ ਰਹੇ ਕਿ ਇਹ ਐਫ 16 ਹੈ ਕਿ ਕੋਈ ਹੋਰ ਜਹਾਜ਼ ਹੈ। ਅਹਿਮ ਗੱਲ ਹੈ ਕਿ ਪਾਕਿਸਤਾਨ ਨੂੰ ਅਪਣੀ ਰੱਖਿਆ ਵਿਚ ਕੁਝ ਵੀ ਕਦਮ ਚੁੱਕਣ ਦਾ ਅਧਿਕਾਰ ਹੈ।
27 ਫਰਵਰੀ ਦੀ ਘਟਨਾ ਹੁਣ ਇਤਿਹਾਸ ਬਣ ਚੁੱਕੀ ਹੈ। ਭਾਰਤ ਨੇ ਪਾਕਿਸਤਾਨ ਦਾ ਕੋਈ ਐਫ 16 ਜਹਾਜ਼ ਨਹੀਂ ਡੇਗਿਆ ਸੀ। ਗੌਰਤਲਬ ਹੈ ਕਿ ਪਿਛਲੇ ਮਹੀਨੇ ਗਫੂਰ ਨੇ ਕਿਹਾ ਸੀ ਕਿ ਪਾਕਿਸਤਾਨ ਨੇ ਜੇਐਫ 17 ਜਹਾਜ਼ ਦਾ ਇਸਤੇਮਾਲ ਕੀਤਾ ਸੀ।
ਭਾਰਤ ਨੇ ਅਮਰੀਕਾ ਨੂੰ ਐਫ 16 ਲੜਾਕੂ ਜਹਾਜ਼ ਡੇਗਣ ਦੇ ਸਬੂਤ ਦਿਖਾਏ ਸਨ। ਭਾਰਤ ਨੇ ਐਫ 16 ਵਲੋਂ ਦਾਗੀ ਗਈ ਮਿਜ਼ਾਈਲ ਦੇ ਹਿੱਸੇ ਦਿਖਾਏ ਸੀ, ਜੋ ਭਾਰਤੀ ਖੇਤਰ ਵਿਚ ਡਿੱਗੇ ਸਨ। ਅਮਰੀਕੀ ਵਿਦੇਸ਼ ਮੰਤਰਾਲਾ ਵੀ ਇਸ ਸਬੰਧ ਵਿਚ ਜਾਂਚ ਕਰ ਰਿਹਾ ਹੈ। ਐਫ 16 ਦਾ ਇਸ ਤਰ੍ਹਾਂ ਇਸਤੇਮਾਲ ਹੋਣਾ ਇਸ ਸਬੰਧ ਵਿਚ ਹੋਏ ਸਮਝੌਤੇ ਦਾ ਉਲੰਘਣ ਹੈ।

ਜੈਸਿੰਡਾ ਨੇ ਚੀਨ ਨਾਲ ਸਬੰਧਾਂ ਨੂੰ ‘ਬੇਹੱਦ ਮਹੱਤਵਪੂਰਨ’ ਦੱਸਿਆ

ਪੇਈਚਿੰਗ-ਨਿਊਜ਼ੀਲੈਂਡ ਦੀ ਪ੍ਰਧਾਨ ਮੰਤਰੀ ਜੈਸਿੰਡਾ ਆਰਡਨ ਨੇ ਅੱਜ ਚੀਨ ਦੇ ਦੌਰੇ ਮੌਕੇ ਰਾਸ਼ਟਰਪਤੀ ਸ਼ੀ ਜਿਨਪਿੰਗ ਨਾਲ ਮੁਲਾਕਾਤ ਕੀਤੀ। ਇਸ ਮੌਕੇ ਜੈਸਿੰਡਾ ਨੇ ਚੀਨ ਨਾਲ ਨਿਊਜ਼ੀਲੈਂਡ ਦੇ ਸਬੰਧਾਂ ਨੂੰ ‘ਬੇਹੱਦ ਮਹੱਤਵਪੂਰਨ’ ਦੱਸਿਆ। ਜਦਕਿ ਚੀਨੀ ਟੈਲੀਕਾਮ ਕੰਪਨੀ ‘ਵ੍ਹਾਵੇਅ’ ਨਾਲ ਨਿਊਜ਼ੀਲੈਂਡ ਦੇ ਸੁਰੱਖਿਆ ਦੇ ਪੱਖ ਤੋਂ ਬਣੇ ਟਕਰਾਅ ਦਰਮਿਆਨ ਜਿਨਪਿੰਗ ਨੇ ‘ਆਪਸੀ ਭਰੋਸਾ’ ਬਰਕਰਾਰ ਰੱਖਣ ਦੇ ਨੁਕਤੇ ਉੱਤੇ ਜ਼ੋਰ ਦਿੱਤਾ। ਜ਼ਿਕਰਯੋਗ ਹੈ ਕਿ ਨਿਊਜ਼ੀਲੈਂਡ ਦੀਆਂ ਖ਼ੁਫੀਆ ਏਜੰਸੀਆਂ ਨੇ ਲੰਘੇ ਨਵੰਬਰ ‘ਗੰਭੀਰ ਸੁਰੱਖਿਆ ਕਾਰਨਾਂ’ ਕਰ ਕੇ ਚੀਨ ਦੀ ਟੈਲੀਕਾਮ ਫਰਮ ‘ਹੁਵੇਈ’ ਦੇ ਉਪਕਰਨ ਤੇ ਹੋਰ ਤਕਨੀਕਾਂ ਨੂੰ ਮੁਲਕ ਦੇ 5ਜੀ ਨੈੱਟਵਰਕ ਲਈ ਵਰਤਣ ਤੋਂ ਮਨ੍ਹਾਂ ਕਰ ਦਿੱਤਾ ਸੀ। ਕ੍ਰਾਈਸਟਚਰਚ ਮਸਜਿਦਾਂ ਉੱਤੇ ਹੋਏ ਹਮਲਿਆਂ ਤੋਂ ਬਾਅਦ ਜੈਸਿੰਡਾ ਨੇ ਆਪਣੇ ਪਹਿਲੀ ਵਿਦੇਸ਼ੀ ਦੌਰੇ ਮੌਕੇ ਅੱਜ ਗ੍ਰੇਟ ਹਾਲ ਆਫ਼ ਪੀਪਲ ਵਿਚ ਚੀਨੀ ਰਾਸ਼ਟਪਤੀ ਨਾਲ ਮੁਲਾਕਾਤ ਕੀਤੀ। ਜਿਨਪਿੰਗ ਨੇ ਕਿਹਾ ਕਿ ਜੈਸਿੰਡਾ ਦਾ ਦੌਰਾ ਚੀਨ ਨੂੰ ਨਿਊਜ਼ੀਲੈਂਡ ਵੱਲੋਂ ਦਿੱਤੀ ਜਾਂਦੀ ਅਹਿਮੀਅਤ ਨੂੰ ਦਰਸਾਉਂਦਾ ਹੈ। ਉਨ੍ਹਾਂ ਨਿਊਜ਼ੀਲੈਂਡ ਨੂੰ ‘ਸੁਲਝਿਆ ਮਿੱਤਰ ਤੇ ਸਾਥੀ’ ਗਰਦਾਨਿਆ। ਆਰਡਨ ਦਾ 2017 ਵਿਚ ਪ੍ਰਧਾਨ ਮੰਤਰੀ ਚੁਣੇ ਜਾਣ ਤੋਂ ਬਾਅਦ ਚੀਨ ਦਾ ਇਹ ਪਹਿਲਾ ਦੌਰਾ ਹੈ। ਦੌਰਾ ਇਸ ਪੱਖ ਤੋਂ ਵੀ ਮਹੱਤਵਪੂਰਨ ਹੈ ਕਿ ਚੀਨ ਨਾਲ 2008 ਵਿਚ ਮੁਕਤ ਵਪਾਰ ਸਮਝੌਤਾ ਕਰਨ ਦੇ ਬਾਵਜੂਦ ਨਿਊਜ਼ੀਲੈਂਡ ਦੇ ਪ੍ਰਧਾਨ ਮੰਤਰੀ ਨੇ ਪੇਈਚਿੰਗ ਦਾ ਦੌਰਾ ਕਰਨ ਲਈ ਐਨਾ ਲੰਮਾ ਵਕਤ ਲਿਆ ਹੈ। ਆਰਡਨ ਨੇ ਦੋਵਾਂ ਦੇਸ਼ਾਂ ਦੇ ਸਬੰਧਾਂ ਨੂੰ ਬੇਹੱਦ ਅਹਿਮ ਕਰਾਰ ਦਿੰਦਿਆਂ ਕਿਹਾ ਕਿ ਉਹ ਇਨ੍ਹਾਂ ਰਿਸ਼ਤਿਆਂ ਨੂੰ ਹੋਰ ਮਜ਼ਬੂਤ ਕਰਨ ਦੇ ਚਾਹਵਾਨ ਹਨ। ਜੈਸਿੰਡਾ ਨੇ ਕਿਹਾ ਕਿ ਚੀਨ ਉਨ੍ਹਾਂ ਦੇ ਮੁਲਕ ਨਾਲ ਦੁਵੱਲਾ 18.4 ਬਿਲੀਅਨ ਅਮਰੀਕੀ ਡਾਲਰ ਦਾ ਵਪਾਰ ਕਰਦਾ ਹੈ। ਆਰਡਨ ਨੇ ਚੀਨੀ ਕੰਪਨੀ ਨਾਲ ਸੁਰੱਖਿਆ ਦੇ ਲਿਹਾਜ਼ ਤੋਂ ਬਣੇ ਟਕਰਾਅ ਬਾਰੇ ਕੋਈ ਜ਼ਿਆਦਾ ਗੱਲ ਨਹੀਂ ਕੀਤੀ।
ਉਨ੍ਹਾਂ ਲੰਘੇ ਮਹੀਨੇ ਕਿਹਾ ਸੀ ਕਿ ਇਸ ਸਬੰਧੀ ਕੰਪਨੀ ਨਾਲ ਗੱਲਬਾਤ ਕੀਤੀ ਜਾ ਰਹੀ ਹੈ। ਜਿਨਪਿੰਗ ਨੇ ਕਿਹਾ ਕਿ ਦੋਵਾਂ ਮੁਲਕਾਂ ਨੂੰ ‘ਆਪਸੀ ਭਰੋਸਾ ਤੇ ਲਾਭ ਬਰਕਰਾਰ ਰੱਖਣ’ ਬਾਰੇ ਸੋਚਣਾ ਚਾਹੀਦਾ ਹੈ। ਜੈਸਿੰਡਾ ਨੇ ਚੀਨ ਨਾਲ ਇਸ ਮੌਕੇ ਬੈਲਟ ਤੇ ਰੋਡ ਪ੍ਰਾਜੈਕਟ ਬਾਰੇ ਵੀ ਗੱਲਬਾਤ ਕੀਤੀ। ਨਿਊਜ਼ੀਲੈਂਡ ਦੀ ਪ੍ਰਧਾਨ ਮੰਤਰੀ ਨੇ ਮੁਲਕ ਵਿਚ ‘ਉੱਚ ਗੁਣਵੱਤਾ ਵਾਲੇ ਨਿਵੇਸ਼ ਦਾ ਸੱਦਾ’ ਵੀ ਦਿੱਤਾ।

ਅਮਰੀਕਨ ਰੈਪਰ ਨਿਪਸੀ ਹਸਲ ਦੀ ਗੋਲੀ ਮਾਰ ਕੇ ਹੱਤਿਆ

ਨਵੀਂ ਦਿੱਲੀ-ਗ੍ਰੈਮੀ ਨਾਮਜ਼ਦ ਰੈਪਰ ਨਿਪਸੀ ਹਸਲ ਦੀ ਐਤਵਾਰ ਨੂੰ ਉਸ ਦੇ ਕੱਪੜਿਆਂ ਦੇ ਸਟੋਰ ਦੇ ਬਾਹਰ ਗੋਲੀ ਮਾਰ ਕੇ ਹੱਤਿਆ ਕਰ ਦਿੱਤੀ ਗਈ ਹੈ | ਇਸ ਘਟਨਾ ਦੇ ਬਾਅਦ ਤੋਂ ਯੂ. ਐਸ. ਮਨੋਰੰਜਨ ਜਗਤ ਸੋਗ ‘ਚ ਆ ਗਿਆ ਹੈ | ਗੀਤਕਾਰ ਰਿਹਾਣਾ, ਡ੍ਰੇਕ ਤੇ ਹੋਰ ਕਈ ਅਮਰੀਕੀ ਫ਼ਿਲਮੀ ਸਿਤਾਰਿਆਂ ਨੇ ਦੁੱਖ ਪ੍ਰਗਟ ਕੀਤਾ ਹੈ | ਰੈਪਰ ਨਿਪਸੀ ਦੀ ਉਮਰ 33 ਸਾਲ ਸੀ | ਯੂ.ਐਸ. ਪੁਲਿਸ ਦਾ ਕਹਿਣਾ ਹੈ ਕਿ ਰੈਪਰ ਦੀ ਹੱਤਿਆ ਬ੍ਰੋਵਾਰਡ ਕਾਊਾਟੀ ‘ਚ ਉਸ ਸਮੇਂ ਹੋਈ ਜਦ ਉਹ ਮੋਟਰ ਸਾਈਕਲ ਖ਼ਰੀਦਣ ਗਿਆ ਹੋਇਆ ਸੀ | ਉੱਥੇ ਮੌਜੂਦ ਲੋਕਾਂ ਮੁਤਾਬਿਕ ਰੈਪਰ ਉਪਰ ਕਈ ਗੋਲੀਆਂ ਚਲਾਈਆਂ ਗਈਆਂ | ਨਿਪਸੀ ਨੂੰ ਤੁਰੰਤ ਹਸਪਤਾਲ ਪਹੁੰਚਾਇਆ ਗਿਆ, ਪਰ ਡਾਕਟਰਾਂ ਨੇ ਨਿਪਸੀ ਨੂੰ ਮਿ੍ਤਕ ਐਲਾਨ ਦਿੱਤਾ |

ਭਾਰਤ ’ਚ ਅਸਲ ਮੁੱਦਾ ਵਿਕਾਸ ਦੀ ਗਤੀ: ਇੰਦਰਾ ਨੂਈ

ਨਿਊਯਾਰਕ-ਪੈਪਸੀਕੋ ਦੀ ਸਾਬਕਾ ਚੇਅਰਪਰਸਨ ਇੰਦਰਾ ਨੂਈ ਨੇ ਕਿਹਾ ਹੈ ਕਿ ਭਾਰਤ ਵਿਚ ਅਸੀਮ ਸਮਰੱਥਾ ਹੈ ਅਤੇ ਅਸਲ ਮੁੱਦਾ ਵਿਕਾਸ ਦੀ ਗਤੀ ਅਤੇ ਇਸ ਗੱਲ ਦਾ ਹੈ ਕਿ ਇਹ ਆਪਣੇ ਰਾਹ ਵਿਚ ਆਉਣ ਵਾਲੀਆਂ ਕਿੰਨੀਆਂ ਔਕੜਾਂ ਦੂਰ ਕਰਨੀਆਂ ਚਾਹੁੰਦਾ ਹੈ। ਨੂਈ ਨੇ ਪਿਛਲੇ ਸਾਲ ਅਕਤੂਬਰ ਵਿਚ 24 ਸਾਲ ਵਿਸ਼ਵ ਪੱਧਰੀ ਕੰਪਨੀ ਪੈਪਸੀਕੋ ਨਾਲ ਕੰਮ ਕਰਨ ਮਗਰੋਂ ਇਸਦੀ ਸੀਈਓ ਵਜੋਂ ਅਸਤੀਫ਼ਾ ਦੇ ਦਿੱਤਾ ਸੀ।
ਉਨ੍ਹਾਂ ਕਿਹਾ,‘ਭਾਰਤ ਵਿਚ ਅਸੀਮ ਸਮਰੱਥਾ ਹੈ, ਹੁਨਰ ਪੱਖੋਂ, ਆਬਾਦੀ, ਹਰ ਪੱਖੋਂ। ਉਹ ਸ਼ਹਿਰ ਵਿਚ ਭਾਰਤ ਦੇ ਕੌਂਸੁਲੇਟ ਜਨਰਲ ਵਲੋਂ ਕੌਂਸਲ ਜਨਰਲ ਸੰਦੀਪ ਚੱਕਰਵਰਤੀ ਦੀ ਅਗਵਾਈ ਤੇ ‘ਯੂਐੱਸ-ਇੰਡੀਆ ਸਟਰੈਟੇਜਿਕ ਪਾਰਟਰਨਰਸ਼ਿਪ ਫੋਰਮ’ (ਯੂਐਸਆਈਐਸਪੀਐਫ) ਦੇ ਸਹਿਯੋਗ ਨਾਲ ਕਰਵਾਏ ਇੱਕ ਸਮਾਗਮ ‘ਨਿਊ ਇੰਡੀਆ ਲੈਕਚਰ’ ਵਿਚ ਭਾਰਤ ਤੇ ਇਸਦੀ ਵਿਕਾਸ ਦੀ ਸਮਰੱਥਾ ਬਾਰੇ ਪੁੱਛੇ ਇੱਕ ਸੁਆਲ ਦਾ ਜੁਆਬ ਦੇ ਰਹੇ ਸਨ।
ਉਨ੍ਹਾਂ ਕਿਹਾ,‘ਭਾਰਤ ਨੂੰ ਉਹ ਕੰਮ ਕਰਨ ਦੀ ਲੋੜ ਹੈ, ਜੋ ਇਸ ਲਈ ਸਹੀ ਹੈ। ਮੈਂ ਇਸ ਵਿਸ਼ੇ ਬਾਰੇ ਆਪਣੀ ਰਾਇ ਦੇਣ ਵਾਲੀ ਵਿਅਕਤੀ ਵਿਸ਼ੇਸ਼ ਨਹੀਂ ਹਾਂ। ਭਾਰਤ ਨੂੰ ਉਹੀ ਕੰਮ ਕਰਨਾ ਚਾਹੀਦਾ ਹੈ, ਜੋ ਇਸ ਲਈ ਸਹੀ ਹੈ, ਬਿਲਕੁਲ ਉਵੇਂ ਹੀ ਜਿਵੇਂ ਕਿ ਯੂਰਪ ਨੂੰ ਉਹੀ ਕੰਮ ਕਰਨਾ ਚਾਹੀਦਾ ਹੈ, ਜੋ ਇਸ ਲਈ ਸਹੀ ਹੈ।’ ਉਨ੍ਹਾਂ ਕਿਹਾ ਕਿ ਪਿਛਲੇ ਸਮੇਂ ਦੌਰਾਨ ਕਈ ਵਾਰ ਕੌਮਾਂਤਰੀ ਪੱਧਰ ਉੱਤੇ ਅਨਿਸ਼ਚਿਤਤਾ ਦਾ ਮਾਹੌਲ ਬਣਿਆ ਹੈ।
ਉਨ੍ਹਾਂ ਕਿਹਾ,‘ਇਹ ਅਨਿਸ਼ਚਿਤਤਾ ਵੱਖ ਵੱਖ ਰੂਪਾਂ ਵਿਚ ਰਹੀ ਹੈ ਪਰ ਇਹ ਹਮੇਸ਼ਾਂ ਹੀ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਹਮੇਸ਼ਾ ਹੀ ਇਹ ਗੱਲ ਆਖੀ ਹੈ ਕਿ ਜਦੋਂ ਵੀ ਤੁਸੀਂ ਕਿਸੇ ਮੁਲਕ ਵਿਚ ਜਾਉ ਤਾਂ ਤੁਹਾਨੂੰ ਇਸ ਢੰਗ ਨਾਲ ਕੰਮ ਕਰਨਾ ਚਾਹੀਦਾ ਹੈ ਕਿ ਜਿਵੇਂ ਤੁਸੀਂ ਉਸ ਮੁਲਕ ਦੇ ਨਾਗਰਿਕ ਹੋ।’