Home / ਦੇਸ਼ ਵਿਦੇਸ਼ (page 10)

ਦੇਸ਼ ਵਿਦੇਸ਼

ਮੈਂਬਰ ਪਾਰਲੀਮੈਂਟ ਬਣੇ ਗੁਰਮੇਸ਼ ਸਿੰਘ

ਸਿਡਨੀ-ਆਸਟਰੇਲੀਆ ਵਿਚ ਪਹਿਲੀ ਵਾਰ ਪੰਜਾਬੀ ਪਿਛੋਕੜ ਵਾਲੇ ਗੁਰਮੇਸ਼ ਸਿੰਘ ਸਟੇਟ ਮੈਂਬਰ ਪਾਰਲੀਮੈਂਟ ਬਣੇ ਹਨ। ਸੂਬਾ ਨਿਊ ਸਾਊਥ ਵੇਲਜ਼ ਦੀਆਂ ਕੱਲ੍ਹ ਸਮਾਪਤ ਹੋਈਆਂ ਚੋਣਾਂ ਵਿਚ ਉਹ ਹੁਕਮਰਾਨ ਲਿਬਰਲ-ਨੈਸ਼ਨਲ ਕੁਲੀਸ਼ਨ ’ਚ ਨੈਸ਼ਨਲ ਪਾਰਟੀ ਆਫ਼ ਆਸਟਰੇਲੀਆ ਵੱਲੋਂ ਉਮੀਦਵਾਰ ਸਨ। ਗੁਰਮੇਸ਼ ਸਿੰਘ ਨੇ ਵਿਧਾਨ ਸਭਾ ਹਲਕਾ ਕੌਫ਼ਸ ਹਾਰਬਰ ਤੋਂ ਚੋਣ ਜਿੱਤੀ ਹੈ। ਇਹ ਖੇਤੀ ਪ੍ਰਧਾਨ ਖੇਤਰ ਹੈ ਤੇ ਇਥੇ ਹੀ ਪੰਜਾਬੀਆਂ ਦੀ ਵਸੋਂ ਦਾ ਟਾਊਨ ਵਲਗੂਲਗਾ ਵੀ ਹੈ।
ਗੁਰਮੇਸ਼ ਦੇ ਦਾਦਾ ਪ੍ਰੀਤਮ ਸਿੰਘ ਸਾਲ 1890 ’ਚ ਆਸਟਰੇਲੀਆ ਆਏ ਸਨ। ਉਹ ਨਵਾਂ ਸ਼ਹਿਰ ਦੇ ਪਿੰਡ ਭੰਗਲ ਦੇ ਵਾਸੀ ਸਨ। ਗੁਰਮੇਸ਼ ਸਿੰਘ ‘ਓਜ਼ੀ ਗਰੁੱਪ ਕੋਆਪਰੇਟਿਵ’ ਦੇ ਚੇਅਰਮੈਨ ਵੀ ਹਨ। ਇਹ ਸਹਿਕਾਰਤਾ ਗਰੁੱਪ ਬਲੂਬੈਰੀ ਦੀ ਕਾਸ਼ਤ ਵੱਲ ਵਧ ਰਹੇ ਸਿੱਖ ਕਿਸਾਨਾਂ ਦਾ ਇੱਕ ਸਾਂਝਾ ਸਮੂਹ ਹੈ ਜੋ ਆਸਟਰੇਲੀਆ ਤੇ ਹੋਰ ਦੇਸ਼ਾਂ ਨੂੰ ਬਲੂਬੈਰੀ ਦੀ ਸਭ ਤੋਂ ਵੱਡੀ ਮਾਤਰਾ ’ਚ ਸਪਲਾਈ ਕਰਦਾ ਹੈ। ਇਹ ਸੀਟ ਨੈਸ਼ਨਲ ਪਾਰਟੀ ਦੀ ਪੱਕੀ ਸੀਟ ਮੰਨੀ ਜਾਂਦੀ ਹੈ। ਇਥੋਂ ਪਾਰਟੀ ਦੇ ਪਿਛਲੇ 28 ਸਾਲ ਤੋਂ ਸੰਸਦ ਮੈਂਬਰ ਬਣਦੇ ਰਹੇ ਐਂਡਰਿਊ ਫਰੇਜ਼ਰ ਸਨ। ਉਨ੍ਹਾਂ ਚੋਣਾਂ ਤੋਂ ਪਹਿਲੋਂ ਸੇਵਾਮੁਕਤ ਹੋਣ ਦਾ ਫੈਸਲਾ ਕੀਤਾ। ਹਲਕੇ ਦੀਆਂ 43452 ਵੋਟਾਂ ਵਿਚੋਂ ਗੁਰਮੇਸ਼ ਨੂੰ 18000 ਤੋਂ ਵੱਧ ਵੋਟਾਂ ਪਈਆਂ। ਗੁਰਮੇਸ਼ ਨੇ ਕਿਹਾ ਕਿ ਉਹ ਐਂਡਰਿਊ ਵਾਂਗ ਸਥਾਨਕ ਤੇ ਕੌਮੀ ਮੱਦੇ ਮਜ਼ਬੂਤੀ ਨਾਲ ਸਦਨ ਵਿਚ ਰੱਖੇਗਾ। ਉਹ ਛੋਟੇ ਕਾਰੋਬਾਰੀਆਂ ਦੀ ਮਦਦ, ਟੈਕਸ ਦਰ ਘੱਟ ਕਰਨ ਤੇ ਭਾਈਚਾਰੇ ਦੀ ਬਿਹਤਰੀ ਲਈ ਕੰਮ ਕਰੇਗਾ। ਉਧਰ ਵੋਟਾਂ ਦੀ ਗਿਣਤੀ ਦੌਰਾਨ ਆਏ ਰੁਝਾਨ ਅਨੁਸਾਰ ਲਿਬਰਲ-ਨੈਸ਼ਨਲ ਨੂੰ ਸਰਕਾਰ ਬਣਾਉਣ ਲਈ ਲੋੜੀਂਦੀਆਂ 47 ਸੀਟਾਂ ਵਿੱਚੋਂ ਫ਼ਿਲਹਾਲ 46 ਮਿਲੀਆਂ ਹਨ।

ਪੁਲਵਾਮਾ ਹਮਲੇ ਲਈ ਵਰਤੇ ਗਏ ਸੀ ਵਰਚੁਅਲ ਸਿਮ

ਸ੍ਰੀਨਗਰ-ਪੁਲਵਾਮਾ ਹਮਲੇ ਦੌਰਾਨ ਵਰਤੇ ਗਏ ‘ਵਰਚੁਅਲ ਸਿਮ’ ਲਈ ਸੇਵਾ ਮੁਹੱਈਆ ਕਰਵਾਉਣ ਵਾਲੇ ਤੋਂ ਜਾਣਕਾਰੀ ਮੰਗਣ ਲਈ ਭਾਰਤ ਅਮਰੀਕਾ ਨੂੰ ਅਪੀਲ ਕਰੇਗਾ। ਅਧਿਕਾਰੀਆਂ ਨੇ ਦੱਸਿਆ ਕਿ ਇਨ੍ਹਾਂ ਸਿਮਾਂ ਦੀ ਵਰਤੋਂ ਪੁਲਵਾਮਾ ਹਮਲੇ ਲਈ ਜ਼ਿੰਮੇਵਾਰ ਜੈਸ਼-ਏ-ਮੁਹੰਮਦ ਦੇ ਹਮਲਾਵਰਾਂ ਅਤੇ ਕਸ਼ਮੀਰ ਤੇ ਪਾਕਿਸਤਾਨ ’ਚ ਉਸ ਦੇ ਅਤਿਵਾਦੀਆਂ (ਹੈਂਡਲਰਾਂ) ਵੱਲੋਂ ਕੀਤੀ ਗਈ ਸੀ।
ਅਤਿਵਾਦੀ ਹਮਲੇ ਵਾਲੀ ਥਾਂ ਦੀ ਜਾਂਚ, ਜੰਮੂ ਕਸ਼ਮੀਰ ਪੁਲੀਸ ਤੇ ਕੇਂਦਰੀ ਸੁਰੱਖਿਆ ਏਜੰਸੀਆਂ ਵੱਲੋਂ ਤਰਾਲ ਤੋਂ ਇਲਾਵਾ ਹੋਰਨਾਂ ਮੁਕਾਬਲਿਆਂ ਵਾਲੀਆਂ ਥਾਵਾਂ ’ਤੇ ਲਈ ਗਈ ਤਲਾਸ਼ੀ ਦੇ ਸਿਰਿਆਂ ਨੂੰ ਜੋੜਦਿਆਂ ਪਤਾ ਲੱਗਾ ਕਿ ਹਮਲਾਵਰ ਆਦਿਲ ਦਾਰ ਸਰਹੱਦ ਦੇ ਦੂਜੇ ਪਾਸੇ ਜੈਸ਼ ਨਾਲ ਲਗਾਤਾਰ ਸੰਪਰਕ ਵਿੱਚ ਸੀ। ਇਸ ਹਮਲੇ ਦਾ ਮੁੱਖ ਸਰਗਣਾ ਮੁਦੱਸਿਰ ਖਾਨ ਤਰਾਲ ਮੁਕਾਬਲੇ ਦੌਰਾਨ ਮਾਰਿਆ ਗਿਆ ਸੀ। ਅਧਿਕਾਰੀਆਂ ਨੇ ਦੱਸਿਆ ਕਿ ਇਹ ਕੰਮ ਕਰਨ ਦਾ ਨਵਾਂ ਢੰਗ ਹੈ ਜਿਸ ’ਚ ਸਰਹੱਦ ਪਾਰ ਤੋਂ ਅਤਿਵਾਦੀ ਇੱਕ ‘ਵਰਚੁਅਲ ਸਿਮ’ ਦੀ ਵਰਤੋਂ ਕਰ ਰਹੇ ਸਨ ਜੋ ਅਮਰੀਕੀ ਕੰਪਨੀ ਵੱਲੋਂ ਬਣਾਈ ਗਈ ਸੀ। ਅਧਿਕਾਰੀਆਂ ਨੇ ਦੱਸਿਆ ਕਿ ਪੁਲਵਾਮਾ ਹਮਲੇ ’ਚ ਦਾਰ ਇਸੇ ਤਕਨੀਕ ਦੀ ਮਦਦ ਨਾਲ ਜੈਸ਼ ਹੈਂਡਲਰ ਦੇ ਨਾਲ ਹੀ ਮੁਦੱਸਿਰ ਖਾਨ ਨਾਲ ਸੰਪਰਕ ’ਚ ਸੀ। ਉਨ੍ਹਾਂ ਦੱਸਿਆ ਕਿ ਅਮਰੀਕਾ ਨੂੰ ਭੇਜੀ ਜਾਣ ਵਾਲੀ ਅਪੀਲ ’ਚ ਵਰਚੁਅਲ ਸਿਮ ਰਾਹੀਂ ਸੰਪਰਕ ’ਚ ਆਉਣ ਵਾਲੇ ਨੰਬਰਾਂ ਤੇ ਇਸ ਨੂੰ ਚਾਲੂ ਕਿਸ ਨੇ ਕੀਤਾ ਵਰਗੀਆਂ ਜਾਣਕਾਰੀਆਂ ਮੰਗੀਆਂ ਜਾਣਗੀਆਂ।

ਜੇਲ੍ਹ ਵਿੱਚ ਬੰਦ ਨਵਾਜ਼ ਸ਼ਰੀਫ ਦੀ ਹਾਲਤ ਵਿਗੜਨ ਲੱਗੀ

ਲਾਹੌਰ-ਪਾਕਿਸਤਾਨ ਦੇ ਪ੍ਰਧਾਨ ਮੰਤਰੀ ਨਵਾਜ਼ ਸ਼ਰੀਫ ਦੀ ਧੀ ਮਰੀਅਮ ਨਵਾਜ਼ ਨੇ ਕਿਹਾ ਕਿ ਕਿਡਨੀ ਦੀ ਬਿਮਾਰੀ ਕਾਰਨ ਜੇਲ੍ਹ ਅੰਦਰ ਉਸ ਦੇ ਪਿਤਾ ਦੀ ਹਾਲਤ ਵਿਗੜ ਰਹੀ ਹੈ।
ਪਾਕਿਸਤਾਨ ਮੁਸਲਿਮ ਲੀਗ-ਨਵਾਜ਼ (ਪੀਐੱਮਐੱਲ-ਐੱਨ) ਦੀ ਮੁਖੀ ਮਰੀਅਮ ਨਵਾਜ਼ ਨੇ ਬੀਤੇ ਦਿਨ ਆਪਣੇ ਨਿੱਜੀ ਡਾਕਟਰ ਅਦਨਾਨ ਖਾਨ ਨਾਲ ਕੋਟ ਲਖਪਤ ਜੇਲ੍ਹ ’ਚ ਨਵਾਜ਼ ਸ਼ਰੀਫ ਨਾਲ ਮੁਲਾਕਾਤ ਤੋਂ ਬਾਅਦ ਟਵੀਟ ਕਰਕੇ ਇਸ ਸਬੰਧੀ ਜਾਣਕਾਰੀ ਦਿੱਤੀ ਹੈ। ਮਰੀਅਮ ਨੇ ਕਿਹਾ ਕਿ ਉਸ ਦੇ ਪਿਤਾ ਦਾ ਕਿਡਨੀ ਰੋਗ ਤੀਜੇ ਪੜਾਅ ’ਤੇ ਪਹੁੰਚ ਗਿਆ ਹੈ ਤੇ ਹੁਣ ਉਨ੍ਹਾਂ ਨੂੰ ਬਾਂਹ ਵਿੱਚ ਵੀ ਪੀੜ ਰਹਿਣ ਲੱਗੀ ਹੈ। ਮੀਡੀਆ ਰਿਪੋਰਟਾਂ ਅਨੁਸਾਰ ਮਰੀਅਮ ਨੇ ਵਧੀਕ ਮੁੱਖ ਸਕੱਤਰ ਨੂੰ ਪੱਤਰ ਲਿਖ ਕੇ ਮੰਗ ਕੀਤੀ ਹੈ ਕਿ ਜੇਲ੍ਹ ਵਿੱਚ ਸਿਹਤ ਮਾਹਿਰ ਭੇਜ ਕੇ ਨਵਾਜ਼ ਦੀ ਜਾਂਚ ਕੀਤੀ ਜਾਵੇ ਅਤੇ ਉਸ ਨੇ ਨਿੱਜੀ ਡਾਕਟਰ ਦੇ ਸਾਹਮਣੇ ਉਨ੍ਹਾਂ ਦਾ ਇਲਾਜ ਕੀਤਾ ਜਾਵੇ। ਇਸੇ ਦੌਰਾਨ ਪੀਐੱਮਐੱਲ-ਐੱਨ ਵਰਕਰ ਜੇਲ੍ਹ ਦੇ ਬਾਹਰ ਇਕੱਠੇ ਹੋ ਗਏ ਅਤੇ ਉਨ੍ਹਾਂ ਇੱਥੇ ਪਾਰਟੀ ਦੇ ਹੱਕ ’ਚ ਨਾਅਰੇ ਮਾਰਦਿਆਂ ਬੈਰੀਕੇਡ ਤੋੜਨ ਦੀ ਕੋਸ਼ਿਸ਼ ਕੀਤੀ।

ਚੀਨ ਕੈਮੀਕਲ ਪਲਾਂਟ ‘ਚ ਧਮਾਕੇ ਕਾਰਨ ਮਰਨ ਵਾਲਿਆਂ ਦੀ ਗਿਣਤੀ ਹੋਈ 64

ਬੀਜਿੰਗ-ਚੀਨ ਦੇ ਜਿਆਂਗਸੁ ਸੂਬੇ ਦੇ ਯਾਨਚੇਂਗ ਸ਼ਹਿਰ ‘ਚ ਇੱਕ ਕੈਮੀਕਲ ਪਲਾਂਟ ‘ਚ ਹੋਏ ਧਮਾਕੇ ਕਾਰਨ ਮਰਨ ਵਾਲਿਆਂ ਦੀ ਗਿਣਤੀ ਵੱਧ ਕੇ 64 ਹੋ ਗਈ ਹੈ, ਜਦੋਂਕਿ 28 ਲੋਕ ਅਜੇ ਵੀ ਲਾਪਤਾ ਹਨ। ਸ਼ਹਿਰ ਦੇ ਮੇਅਰ ਕਾਓ ਲੁਬਾਓ ਨੇ ਅੱਜ ਇਸ ਸੰਬੰਧੀ ਪੱਤਰਕਾਰਾਂ ਨੂੰ ਜਾਣਕਾਰੀ ਦਿੱਤੀ। ਉਨ੍ਹਾਂ ਦੱਸਿਆ ਕਿ ਮ੍ਰਿਤਕਾਂ ‘ਚੋਂ 26 ਲੋਕਾਂ ਦੀ ਪਹਿਚਾਣ ਕਰ ਲਈ ਗਈ ਹੈ। ਉਨ੍ਹਾਂ ਕਿਹਾ ਕਿ ਇਸ ਹਾਦਸੇ ਤੋਂ ਬਾਅਦ 617 ਲੋਕਾਂ ਨੂੰ ਹਸਪਤਾਲ ‘ਚ ਦਾਖ਼ਲ ਕਰਾਇਆ ਗਿਆ ਹੈ, ਜਿਨ੍ਹਾਂ ‘ਚੋਂ 143 ਲੋਕਾਂ ਦਾ ਇਲਾਜ ਅਜੇ ਵੀ ਜਾਰੀ ਹੈ। ਜ਼ਿਕਰਯੋਗ ਹੈ ਕਿ ਬੀਤੇ ਵੀਰਵਾਰ ਨੂੰ ਦੁਪਹਿਰ 2.48 ਕੈਮੀਕਲ ਪਲਾਂਟ ‘ਚ ਹੋਇਆ ਇਹ ਧਮਾਕਾ ਇੰਨਾ ਜ਼ਬਰਦਸਤ ਸੀ ਕਿ ਆਲੇ-ਦੁਆਲੇ ਦੀਆਂ ਇਮਾਰਤਾਂ ਤੱਕ ਹਿੱਲ ਗਈਆਂ ਅਤੇ ਮਕਾਨਾਂ ਦੀਆਂ ਖਿੜਕੀਆਂ ਦੇ ਕੱਚ ਟੁੱਟ ਗਏ। ਧਮਾਕੇ ਤੋਂ ਬਾਅਦ ਹਜ਼ਾਰਾਂ ਲੋਕਾਂ ਨੂੰ ਇਲਾਕੇ ‘ਚੋਂ ਬਾਹਰ ਕੱਢ ਕੇ ਸੁਰੱਖਿਅਤ ਥਾਵਾਂ ‘ਤੇ ਪਹੁੰਚਾਇਆ ਗਿਆ ਹੈ।

ਭਾਰਤੀ ਮੂਲ ਦੀ ਨਾਓਮੀ ਜਹਾਂਗੀਰ ਬਣੀ ਅਮਰੀਕਾ ਦੀ ਸ਼ਕਤੀਸ਼ਾਲੀ ਅਦਾਲਤ ਦੀ ਜੱਜ

ਵਾਸ਼ਿੰਗਟਨ- ਭਾਰਤੀ ਮੂਲ ਦੀ ਪ੍ਰਸਿੱਧ ਅਮਰੀਕੀ ਵਕੀਲ ਨਾਓਮੀ ਜਹਾਂਗੀਰ ਰਾਓ (45) ਨੇ ‘ਡਿਸਟਿ?ਕ ਆਫ ਕੋਲੰਬੀਆ ਸਰਕਟ ਕੋਰਟ ਆਫ ਅਪੀਲਜ਼’ ਦੀ ਅਮਰੀਕੀ ਸਰਕਟ ਜੱਜ ਵਜੋਂ ਬੀਤੇ ਦਿਨੀਂ ਸਹੁੰ ਚੁੱਕੀ। ਉਹ ਸ੍ਰੀਨਿਵਾਸਨ ਤੋਂ ਬਾਅਦ ਦੂਜੀ ਭਾਰਤੀ ਅਮਰੀਕੀ ਹਨ ਜਿਹੜੀ ਇਸ ਸ਼ਕਤੀਸ਼ਾਲੀ ਅਦਾਲਤ ਦਾ ਹਿੱਸਾ ਬਣੀ ਹੈ ਇਸ ਨਾਲੋਂ ਜ਼ਿਆਦਾ ਸ਼ਕਤੀਸ਼ਾਲੀ ਸਿਰਫ਼ ਅਮਰੀਕੀ ਸੁਪਰੀਮ ਕੋਰਟ ਹੈ ਸ੍ਰੀਨਿਵਾਸਨ ਸਾਬਕਾ ਰਾਸ਼ਟਰਪਤੀ ਬਰਾਕ ਓਬਾਮਾ ਦੇ ਕਾਰਜਕਾਲ ਦੌਰਾਨ ਨਾਮਜ਼ਦ ਹੋਏ ਸਨ। ਸਹੁੰ ਚੁੱਕ ਸਮਾਗਮ ਦੌਰਾਨ ਰਾਓ ਦੇ ਪਤੀ ਐਲਨ ਲੈਫੇਕੋਵਿਟਜ਼ ਵੀ ਮੌਜੂਦ ਸਨ। ਅਮਰੀਕੀ ਸੁਪਰੀਮ ਕੋਰਟ ਦੇ ਜਸਟਿਸ ਕਲੇਰੈਂਸ ਥਾਮਸ ਨੇ ਮੰਗਲਵਾਰ ਨੂੰ ਵ੍ਹਾਈਟ ਹਾਊਸ ਦੇ ਰੂਜ਼ਵੈਲਟ ਰੂਮ ਵਿਚ ਰਾਓ ਨੂੰ ਸਹੁੰ ਚੁਕਾਈ। ਉਨ੍ਹਾਂ ਬਾਈਬਲ ਦੀ ਸਹੁੰ ਚੁੱਕੀ ਰਾਓ ਨੇ ਬ੍ਰੈਡ ਕਾਵਾਨਾਘ ਦੀ ਥਾਂ ਲਈ ਹੈ ਜਿਹੜੇ ਵਿਵਾਦਾਂ ਵਿਚ ਘਿਰ ਗਏ ਸਨ ਵ੍ਹਾਈਟ ਹਾਊਸ ਦੇ ਪ੍ਰੋਗਰਾਮ ਮੁਤਾਬਕ, ਰਾਸ਼ਟਰਪਤੀ ਡੋਨਾਲਡ ਟਰੰਪ ਵੀ ਸਹੁੰ ਚੁੱਕ ਸਮਾਗਮ ਵਿਚ ਸ਼ਾਮਲ ਹੋਏ ਡੈਟ੍ਰਾਇਟ ਵਿਚ ਭਾਰਤ ਦੇ ਪਾਰਸੀ ਡਾਕਟਰ ਜੈਰੀਨ ਰਾਓ ਅਤੇ ਜਹਾਂਗੀਰ ਨਰੀਓਸ਼ਾਂਗ ਰਾਓ ਦੇ ਘਰ ਨਾਓਮੀ ਰਾਓ ਦਾ ਜਨਮ ਹੋਇਆ ਸੀ ਉਨ੍ਹਾਂ ਨੂੰ ਰਾਸ਼ਟਰਪਤੀ ਟਰੰਪ ਨੇ ਦੀਵਾਲੀ ਦੌਰਾਨ ਉੱਚ ਅਹੁਦੇ ਲਈ ਨਾਮਜ਼ਦ ਕੀਤਾ ਸੀ। ਪਿਛਲੇ ਹਫ਼ਤੇ ਹੀ ਸੈਨੇਟ ਨੇ ਉਨ੍ਹਾਂ ਦੀ ਨਿਯੁਕਤੀ ਨੂੰ 53-46 ਮਤਾਂ ਨਾਲ ਮਨਜ਼ੂਰੀ ਦਿੱਤੀ ਸੀ।

ਮਹਿਲਾ ਫੁੱਟਬਾਲਰ ਮਾਮਲੇ ‘ਚ ਆਸਟ੍ਰੇਲੀਆ ਦੇ ਪ੍ਰਧਾਨ ਮੰਤਰੀ ਨੇ ਕੀਤਾ ਬਚਾਅ

ਮੈਲਬੌਰਨ-ਅਪਣੀ ਇੱਕ ਫੋਟੋ ਕਾਰਨ ਵਿਵਾਦਾਂ ਵਿਚ ਆਈ ਮਹਿਲਾ ਫੁੱਟਬਾਲਰ ਪਲੇਅਰ ਟਾਈਲਾ ਹੈਰਿਸ ਦੇ ਸਮਰਥਨ ਵਿਚ ਆਸਟ੍ਰੇਲੀਆ ਦੇ ਪ੍ਰਧਾਨ ਮੰਤਰੀ ਸਕਾਟ ਮਾਰਿਸਨ ਵੀ ਆ ਗਏ ਹਨ। ਉਨ੍ਹਾਂ ਨੇ ਟਵੀਟ ਕਰਕੇ ਹੈਰਿਸ ਦੀ ਫ਼ੋਟੋ ‘ਤੇ ਭੱਦੇ ਕੁਮੈਂਟ ਕਰਨ ਵਾਲੇ ਲੋਕਾਂ ਨੂੰ ਕੀੜੇ ਮਕੌੜੇ ਤੱਕ ਕਹਿ ਦਿੱਤਾ। ਇਸ ਤੋਂ ਪਹਿਲਾਂ ਹੈਰਿਸ ਵੀ ਅਪਣੀ ਉਕਤ ਫ਼ੋਟੋ ਨੂੰ ਸੈਕਸ ਸ਼ੋਸ਼ਣ ਨਾਲ ਜੋੜ ਚੁੱਕੀ ਸੀ। ਦਰਅਸਲ ਫੁੱਟਬਾਲ ਖੇਡਦੇ ਸਮੇਂ ਹੈਰਿਸ ਨੇ ਜਦੋਂ ਕਿੱਕ ਮਾਰੀ ਤਾਂ ਇੱਕ ਅਜਿਹੀ ਫ਼ੋਟੋ ਫ਼ੋਟੋਗਰਾਫਰ ਨੇ ਕਲਿਕ ਕੀਤੀ ਜਿਸ ਵਿਚ ਉਸ ਦੀ ਇੱਕ ਪੂਰੀ ਲੱਤ ਦਿਸ ਰਹੀ ਸੀ। ਤਸਵੀਰ ਆਨਲਾਈਨ ਪਬਲਿਸ਼ ਕਰਨ ਵਾਲੀ ਏਜੰਸੀ ਨੇ ਪਹਿਲਾਂ ਤਾਂ ਉਕਤ ਫ਼ੋਟੋ ਹਟਾ ਲਈ ਪਰ ਬਾਅਦ ਵਿਚ ਉਸ ਨੇ ਫੇਰ ਤੋਂ ਇਹ ਕਹਿ ਕੇ ਪਬਲਿਸ਼ ਕਰ ਦਿੱਤੀ ਕਿ ਇਸ ਨਾਲ ਉਸ ਦਾ ਅਕਸ ਪ੍ਰਭਾਵਤ ਹੋਇਆ। ਲੋੜ ਹੈ ਟਰੋਲਰਸ ‘ਤੇ ਰੋਕ ਲਾਉਣ ਦੀ। ਫੋਟੋ ਤੇ ਫੋਟੋਗਰਾਫਰ ਦੇ ਮਨ ਵਿਚ ਕੋਈ ਗੜਬੜੀ ਨਹੀਂ ਹੈ। ਉਧਰ ਇਸ ਘਟਨਾ ਨੇ ਪੂਰੇ ਆਸਟ੍ਰੇਲੀਆ ਵਿਚ ਇੱਕ ਬਹਿਸ ਦਾ ਮੁੱਦਾ ਬਣ ਗਿਆ ਹੈ। ਲੋਕ ਮਹਿਲਾ ਫੁੱਟਬਾਲਰ ਖਿਡਾਰਨ ਦੇ ਪੱਖ ਵਿਚ ਟਵੀਟ ਤੇ ਫੇਸਬੁੱਕ ‘ਤੇ ਪੋਸਟਾਂ ਪਾਉਣ ਲੱਗੇ ਹਨ।

ਕੈਨੇਡਾ ਵਿਚ ਪ੍ਰਵਾਸੀਆਂ ਦੀ ਆਮਦ ਨੇ ਤੋੜਿਆ 100 ਸਾਲ ਦਾ ਰਿਕਾਰਡ

ਟੋਰਾਂਟੋ- ਕੈਨੇਡਾ ਵਿਚ ਪ੍ਰਵਾਸੀਆਂ ਨੇ ਆਮਦ ਨੇ 2018 ਵਿਚ 100 ਸਾਲ ਦਾ ਰਿਕਾਰਡ ਤੋੜ ਦਿਤਾ। ਸਟੈਟਿਸਟਿਕਸ ਕੈਨੇਡਾ ਦੇ ਤਾਜ਼ਾ ਅਨੁਮਾਨਾਂ ਮੁਤਾਬਕ ਪਿਛਲੇ ਵਰ•ੇ 3 ਲੱਖ 21 ਹਜ਼ਾਰ ਨਵੇਂ ਪ੍ਰਵਾਸੀਆਂ ਨੇ ਕੈਨੇਡਾ ਦੀ ਧਰਤੀ ‘ਤੇ ਕਦਮ ਰੱਖਿਆ। ਅੰਕੜੇ ਕਹਿੰਦੇ ਹਨ ਕਿ 1913 ਵਿਚ 401,000 ਪ੍ਰਵਾਸੀ ਕੈਨੇਡਾ ਆਏ ਸਨ ਜਿਸ ਰਾਹੀਂ ਮੁਲਕ ਦੀ ਆਬਾਦੀ ਵਧਾਉਣ ਵਿਚ ਸਹਾਇਤਾ ਮਿਲੀ। 2018 ਵਿਚ ਪ੍ਰਵਾਸੀਆਂ ਦੇ ਤੇਜ਼ ਆਮਦ ਸਦਕਾ ਕੈਨੇਡਾ ਦੀ ਕੁਲ ਆਬਾਦੀ ਵਿਚ 528,421 ਦਾ ਵਾਧਾ ਦਰਜ ਕੀਤਾ ਗਿਆ। ਪ੍ਰਤੀਸ਼ਤ ਦੇ ਹਿਸਾਬ ਨਾਲ ਪਿਛਲੇ ਸਾਲ ਕੈਨੇਡਾ ਦੀ ਆਬਾਦੀ ਵਿਚ 1.4 ਫ਼ੀ ਸਦੀ ਵਾਧਾ ਹੋਇਆ ਜੋ 1990 ਤੋਂ ਬਾਅਦ ਸਭ ਤੋਂ ਤੇਜ਼ ਵਾਧਾ ਮੰਨਿਆ ਜਾ ਰਿਹਾ ਹੈ। ਤਾਜ਼ਾ ਅੰਕੜਿਆਂ ਵਿਚ ਕਾਨੂੰਨੀ ਤਰੀਕੇ ਨਾਲ ਦਾਖ਼ਲ ਹੋਣ ਵਾਲੇ ਰਫ਼ਿਊਜੀ ਸ਼ਾਮਲ ਹਨ ਪਰ ਗ਼ੈਰਕਾਨੂੰਨੀ ਤਰੀਕੇ ਨਾਲ ਸਰਹੱਦ ਪਾਰ ਕਰਨ ਵਾਲਿਆਾਂਂ ਨੂੰ ਇਸ ਵਿਚ ਸ਼ਾਮਲ ਨਹੀਂ ਕੀਤਾ ਗਿਆ। ਫਿਰ ਵੀ ਰਫ਼ਿਊਜੀਆਂ ਦਾ ਅਸਲ ਅੰਕੜਾ ਪੇਸ਼ ਨਹੀਂ ਕੀਤਾ ਗਿਆ। ਸਟੈਟਿਸਟਿਕਸ ਵਿਭਾਗ ਨੇ ਦੱਸਿਆ ਕਿ ਪਿਛਲੇ ਸਾਲ ਦੇ ਆਖ਼ਰੀ ਤਿੰਨ ਮਹੀਨੇ ਦੌਰਾਨ ਅੰਦਾਜ਼ਨ 71,131 ਪ੍ਰਵਾਸੀ ਕੈਨੇਡਾ ਪੁੱਜੇ। ਦੂਜੇ ਪਾਸੇ ਕੈਨੇਡਾ ਦੀ ਆਬਾਦੀ ਵਿਚ ਕੁਦਰਤੀ ਵਾਧੇ ਦਾ ਸਿਲਸਿਲਾ ਢਿੱਲਾ ਰਿਹਾ ਅਤੇ ਪਿਛਲੇ ਸਾਲ ਮੌਤਾਂ ਦੀ ਗਿਣਤੀ ਮਨਫ਼ੀ ਕਰਨ ਮਗਰੋਂ 2018 ਵਿਚ ਸਿਰਫ਼ 103,176 ਨਵੇਂ ਜੀਆਂ ਦੀ ਆਮਦ ਹੋਈ।

ਮੋਦੀ ਦੇ ਸੱਤਾ ‘ਚ ਆਉਣ ਤੋਂ ਬਾਅਦ ਭਾਰਤ ਨਾਲ ਰਿਸ਼ਤੇ ਬਿਹਤਰ ਹੋਏ : ਟਰੰਪ

ਵਾਸ਼ਿੰਗਟਨ- ਮੋਦੀ ਸਰਕਾਰ ਵਿਚ ਭਾਰਤ ਤੇ ਅਮਰੀਕਾ ਦੇ ਵਿਚ ਰਿਸ਼ਤੇ ਬਿਹਤਰ ਹੋਏ ਹਨ। ਟਰੰਪ ਪ੍ਰਸ਼ਾਸਨ ਨੇ ਲੋਕ ਸਭਾ ਚੋਣਾਂ ਤੋਂ ਬਾਅਦ ਸਬੰਧਾਂ ਨੂੰ ਹੋਰ ਮਜ਼ਬੂਤੀ ਮਿਲਣ ਦੀ ਉਮੀਦ ਜਤਾਈ ਹੈ। ਸੀਨੀਅਰ ਅਮਰੀਕੀ ਅਧਿਕਾਰੀ ਮੁਤਾਬਕ ਦਿੱਲੀ ਵਿਚ ਪਿਛਲੇ ਸਾਲ ਸਤੰਬਰ ਵਿਚ ਦੋਵੇਂ ਦੇਸ਼ਾਂ ਦੇ ਵਿਚ ਹੋਈ 2+2 ਵਾਰਤਾ ਨਾਲ ਰਿਸ਼ਤਿਆਂ ਨੂੰ ਅੱਗੇ ਲੈ ਜਾਣ ਵਿਚ ਕਾਫੀ ਮਦਦਗਾਰ ਰਹੀ।
ਅਮਰੀਕੀ ਅਧਿਕਾਰੀ ਕੋਲੋਂ ਮੋਦੀ ਸਰਕਾਰ ਦੇ ਪੰਜ ਸਾਲ ਦੇ ਕਾਰਜਕਾਲ ਅਤੇ ਵਿਦੇਸ਼ ਸਕੱਤਰ ਵਿਜੇ ਗੋਖਲੇ ਦੇ ਅਮਰੀਕੀ ਦੌਰ ‘ਤੇ ਸਵਾਲ ਪੁਛਿਆ ਗਿਆ ਸੀ। ਇਸ ‘ਤੇ ਉਨ੍ਹਾਂ ਕਿਹਾ ਕਿ ਨਰਿੰਦਰ ਮੋਦੀ ਦੇ ਸੱਤਾ ਸੰਭਾਲਣ ਤੋਂ ਬਾਅਦ ਦੋਵੇਂ ਦੇਸ਼ਾਂ ਦੇ ਰਿਸਤਿਆਂ ਵਿਚ ਸੁਧਾਰ ਆਇਆ ਹੈ। ਪ੍ਰਧਾਨ ਮੰਤਰੀ ਮੋਦੀ ਨੇ ਜੂਨ 2017 ਵਿਚ ਵਾਈਟ ਹਾਊਸ ਦਾ ਦੌਰਾ ਕੀਤਾ ਸੀ। ਆਉਣ ਵਾਲੀ ਲੋਕ ਸਭਾ ਚੋਣਾਂ ਵਿਚ ਜੋ ਵੀ ਸਰਕਾਰ ਵਿਚ ਆਵੇ, ਅਸੀਂ ਉਨ੍ਹਾਂ ਦੇ ਨਾਲ ਕੰਮ ਕਰਨ ਲਈ ਉਤਸ਼ਾਹਤ ਹਾਂ।
ਅਧਿਕਾਰੀ ਨੇ ਕਿਹਾ ਕਿ ਅਮਰੀਕਾ ਚਾਹੁੰਦਾ ਹੇ ਕਿ ਭਾਰਤ ਦੇ ਨਾਲ ਰਿਸ਼ਤੇ ਇਸ ਤਰ੍ਹਾਂ ਹੀ ਮਜ਼ਬੂਤ ਹੁੰਦੇ ਰਹਿਣ। ਦੁਨੀਆ ਦੇ ਬਿਹਰਤੀ ਦੇ ਲਈ ਅਸੀਂ ਭਾਰਤ-ਪ੍ਰਸ਼ਾਂਤ ਖੇਤਰ ਵਿਚ ਸਹਿਯੋਗਾਤਮਕ ਰਵੱਈਆ ਬਰਕਰਾਰ ਰੱਖਣਾ ਚਾਹੁੰਦੇ ਹਨ। ਉਨ੍ਹਾਂ ਕਿਹਾ ਕਿ ਭਾਰਤੀ ਵਿਦੇਸ਼ ਸਕੱਤਰ ਦੀ ਯਾਤਰਾ ਮੀਲ ਦਾ ਪੱਥਰ ਸਾਬਤ ਹੋਵੇਗੀ। ਗੋਖਲੇ ਨੇ ਅਮਰੀਕਾ ਵਿਚ ਵਿਦੇਸ਼ ਮੰਤਰੀ ਮਾਈਕ ਪੋਂਪੀਓ ਅਤੇ ਕੌਮੀ ਸੁਰੱਖਿਆ ਸਲਾਹਕਾਰ ਜੌਨ ਬੋਲਟਨ ਨਾਲ ਵੀ ਮੁਲਾਕਾਤ ਕੀਤੀ।
ਟਰੰਪ ਪ੍ਰਸ਼ਾਸਨ ਮੁਤਾਬਕ ਪਿਛਲੇ ਹਫ਼ਤੇ ਤਿੰਨ ਦਿਨ ਦੀ ਯਾਤਰਾ ਵਿਚ ਗੋਖਲੇ ਨੇ ਵਿਦੇਸ਼ ਮੰਤਰਾਲੇ ਅਤੇ ਰੱਖਿਆ ਮੰਤਰਾਲੇ ਦੇ ਅਧਿਕਾਰੀਆਂ ਨਾਲ ਕੂਟਨੀਤਕ ਸਹਿਯੋਗ ‘ਤੇ ਚਰਚਾ ਕੀਤੀ। ਇਸ ਦੌਰਾਨ ਵਿਆਪਕ ਪੱਧਰ ‘ਤੇ ਦੁਵੱਲੇ ਸਬੰਧਾਂ ਨੂੰ ਲੈ ਕੇ ਵੀ ਗੱਲਬਾਤ ਹੋਈ। ਪਾਕਿਸਤਾਨ ਅਤੇ ਅਫ਼ਗਾÎਨਸਤਾਨ ਦੇ ਨਾਲ ਭਾਰਤ ਦੇ ਰਿਸ਼ਤਿਆਂ ‘ਤੇ ਚਰਚਾ ਹੋਈ।
ਮੋਦੀ ਦੇ ਅਮਰੀਕੀ ਦੌਰ ‘ਤੇ ਦੋਵੇਂ ਦੇਸ਼ਾਂ ਦੇ ਵਿਚ ਰਿਸ਼ਤਿਆਂ ਦੀ ਰੂਪ ਰੇਖਾ ਤੈਅ ਕੀਤੀ ਗਈ ਸੀ। ਇਸੇ ਦੌਰਾਨ ਦਿੱਲੀ ਵਿਚ 2+2 ਵਾਰਤਾ ‘ਤੇ ਸਹਿਮਤੀ ਬਣੀ ਸੀ। ਇਸ ਤੋਂ ਬਾਅਦ ਪਿਛਲੇ ਸਾਲ ਸਤੰਬਰ ਵਿਚ ਭਾਰਤ-ਅਮਰੀਕਾ ਦੇ ਵਿਚ ਪਹਿਲੀ 2+2 ਵਾਰਤਾ ਹੋਈ। ਅਮਰੀਕੀ ਰੰਖਿਆ ਅਤੇ ਵਿਦੇਸ਼ ਮੰਤਰੀਆਂ ਦੇ ਨਾਲ ਸੁਸ਼ਮਾ ਸਵਰਾਜ ਅਤੇ ਨਿਰਮਲਾ ਸੀਤਾ ਰਮਨ ਦੀ ਬੈਠਕ ਵਿਚ ਸਮਝੌਤੇ ‘ਤੇ ਦਸਤਖਤ ਕੀਤੇ ਗਏ ਸਨ।

ਗੂਗਲ ਨੇ ਸਾਬਕਾ ਅਧਿਕਾਰੀ ਅਮਿਤ ਸਿੰਘਲ ਨੂੰ 3.5 ਕਰੋੜ ਡਾਲਰ ਦੀ ‘ਐਗਜ਼ਿਟ ਪੈਕੇਜ’ ਵਜੋਂ ਕੀਤੀ ਅਦਾਇਗੀ

ਸਾਨ ਫਰਾਂਸਿਸਕੋ-ਗੂਗਲ ਨੇ ਸਾਬਕਾ ਖੋਜ ਅਧਿਕਾਰੀ ਅਮਿਤ ਸਿੰਘਲ ਨੂੰ ਨੌਕਰੀ ਛੱਡਣ ਦੇ ਪੈਕੇਜ ਵਜੋਂ 3.5 ਕਰੋੜ ਡਾਲਰ ਦੀ ਅਦਾਇਗੀ ਕੀਤੀ ਹੈ | ਇਕ ਮਾਮਲੇ ਵਿਚ ਸਰੀਰਕ ਸ਼ੋਸ਼ਣ ਦੀ ਜਾਂਚ ਉਪਰੰਤ ਕੰਪਨੀ ਨੇ ਸਿੰਘਲ ਨੂੰ ਅਸਤੀਫਾ ਦੇਣ ਲਈ ਮਜਬੂਰ ਕਰ ਦਿੱਤਾ ਸੀ | ਸਿੰਘਲ ਨੂੰ ਪੈਕੇਜ ਦੇਣ ਦਾ ਖੁਲਾਸਾ ਅਦਾਲਤ ਵਲੋਂ ਜਾਰੀ ਦਸਤਾਵੇਜ਼ਾਂ ਤੋਂ ਹੋਇਆ ਹੈ | ਭਾਰਤੀ ਮੂਲ ਦੇ ਅਮਰੀਕੀ ਸਿੰਘਲ ਖੋਜ ਵਿੰਗ ਦੇ ਸੀਨੀਅਰ ਉੱਪ ਪ੍ਰਧਾਨ ਸਨ | ਉਸ ਨੇ 2016 ਵਿਚ ਕੰਪਨੀ ਛੱਡ ਦਿੱਤੀ ਸੀ | ਦੂਸਰੇ ਪਾਸੇ ਸਿੰਘਲ ਨੇ ਆਪਣੇ ਵਿਰੁੱਧ ਲੱਗੇ ਦੋਸ਼ਾਂ ਤੋਂ ਇਨਕਾਰ ਕਰਦਿਆਂ ਕਿਹਾ ਸੀ ਕਿ ਉਸ ਨੇ ਕੰਪਨੀ ਆਪਣੀਆਂ ਸ਼ਰਤਾਂ ਉੱਪਰ ਛੱਡੀ ਹੈ | ਉਸ ਵਿਰੁੱਧ ਲਾਏ ਦੋਸ਼ਾਂ ਵਿਚ ਕੋਈ ਸਚਾਈ ਨਹੀਂ ਹੈ |

ਇਰਾਕ ਦੇ ਮੋਸੁਲ ਨੇੜੇ ਕਿਸ਼ਤੀ ਡੁੱਬਣ ਨਾਲ 83 ਲੋਕਾਂ ਦੀ ਮੌਤ

ਮੋਸੁਲ- ਮੋਸੁਲ ਦੇ ਜਿਹਾਦੀ ਗੜ ਵਿਚ ਕੁਰਦਿਸ਼ ਨਵੇਂ ਸਾਲ ਦਾ ਜਸ਼ਨ ਮਨਾ ਰਹੇ ਪਰਵਾਰਾਂ ਦੇ ਨਾਲ ਭਰੀ ਹੋਈ ਕਿਸ਼ਤੀ ਸੂਲਨ ਨਦੀ ਵਿਚ ਡੁੱਬ ਗਈ। ਇਕ ਕਿਸ਼ਤੀ ਡੁੱਬਣ ਨਾਲ 83 ਲੋਕਾਂ ਦੀ ਮੌਤ ਹੋ ਗਈ ਜਾਣਕਾਰੀ ਅਨੁਸਾਰ ਕਿਸ਼ਤੀ ਵਿਚ ਸਮਰੱਥਾ ਤੋਂ ਜ਼ਿਆਦਾ ਲੋਕ ਸਵਾਰ ਸਨ ਅਤੇ ਇਹ ਕੁਰਦ ਕਬੀਲੇ ਦੇ ਲੋਕ ਸਨ ਜੋ ਨਵਾਂ ਸਾਲ ਮਨਾ ਰਹੇ ਸਨ। ਉਤਰੀ ਨਾਈਨਵੇਹ ਸੂਬੇ ਵਿਚ ਨਾਗਰਿਕ ਸੁਰੱਖਿਆ ਦੇ ਮੁਖੀ ਕਰਨਲ ਹੁਸਾਮ ਖਲੀਲ ਨੇ ਦੱਸਿਆ ਕਿ ਘਟਨਾ ਉਸ ਸਮੇਂ ਵਾਪਰੀ ਜਦੋਂ ਵੱਡੀ ਗਿਣਤੀ ਵਿਚ ਲੋਕ ਨਵਰੋਜ਼ ਮਨਾਉਣ ਲਈ ਬਾਹਰ ਨਿਕਲੇ ਸਨ।
ਸਿਹਤ ਮੰਤਰਾਲੇ ਦੇ ਬੁਲਾਰੇ ਸੈਫ ਅਲ ਬਦਰ ਦਾ ਕਹਿਣਾ ਏ ਕਿ ਨਦੀ ਵਿਚ ਡਿੱਗੇ ਲੋਕਾਂ ਦੀ ਭਾਲ ਲਈ ਅਜੇ ਵੀ ਤਲਾਸ਼ੀ ਮੁਹਿੰਮ ਜਾਰੀ ਹੈ। ਉਨ੍ਹਾਂ ਕਿਸ਼ਤੀ ਪਲਟਣ ਦਾ ਕਾਰਨ ਤਕਨੀਕੀ ਸਮੱਸਿਆ ਦੱਸਿਆ ਜਿਸ ਕਾਰਨ ਇਹ ਹਾਦਸਾ ਵਾਪਰਿਆ ਮ੍ਰਿਤਕਾਂ ਵਿਚ ਜ਼ਿਆਦਾਤਰ ਔਰਤਾਂ ਅਤੇ ਬੱਚੇ ਸ਼ਾਮਲ ਹਨ। ਦਸ ਦਈਏ ਕਿ ਹਾਲੇ ਕੁੱਝ ਮਹੀਨੇ ਪਹਿਲਾਂ ਹੀ ਇਸ ਸ਼ਹਿਰ ਨੂੰ ਆਈਐਸਆਈਐਸ ਦੇ ਅਤਿਵਾਦੀਆਂ ਦੇ ਚੁੰਗਲ ਵਿਚੋਂ ਆਜ਼ਾਦ ਕਰਵਾਇਆ ਗਿਆ ਸੀ।